އާއިލާގެ ނުރުހުމުގައި އޮޓޮޕްސީ ހަދަން ނިންމައި، އަންނަ މަހު 2 ގައި އަދީލްގެ ހަށިގަނޑު އިންޑިއާއަށް ފޮނުވަނީ

ރިސޯޓެއްގައި މަރުވި އަދީލް އަހުމަދުގެ އޮޓޮޕްސީ ހަދަން ބޭނުންނުވާ ކަމަށް އާއިލާއިން ބުނެފި އެވެ.

ރާއްޖެއެމްވީއަށް، އަދީލްގެ މަންމަ ނާޖިދާ ހަސަން ބުނީ، ރާއްޖެއެމްވީއިން ރިޕޯޓު އާއްމު ކުރުމާއެކު، އަދީލްގެ މަރުގެ މައްސަލަ ތަހުގީގު ކުރަމުންދާ ކަމަށް ފުލުހުން ބުނެފައިވާ ކަމަށާއި، މަރުވި ސަބަބު ދެނެގަތުމަށް ކަމަށް ބުނެ އޮޓޮޕްސީ ހަދަން ނިންމާފައިވާކަން ހުކުރު ދުވަހު އަންގާފައިވާ ކަމަށެވެ.

ނާޖިދާ ބުނީ، އޮޓޮޕްސީ ހެދުމަށް ސެޕްޓެންބަރު މަހުގެ 2 ވަނަ ދުވަހު އިންޑިއާ އަށް ގެންދަން ނިންމާފައިވާ ކަމަށާއި، އެމަހުގެ 7 ވަނަ ދުވަހު ހަށިގަނޑު ރާއްޖެއަށް ގެނެސް އާއިލާއާ ހަވާލު ކުރާނެ ކަމަށް ބުނެފައިވާ ކަމަށެވެ.

ނަމަވެސް މި ނިންމުން ފުލުހުން ނިންމާފައިވަނީ އެއްވެސް ވަރަކަށް އާއިލާއާ މަޝްވަރާ ކުރުމެއް ނެތި ކަމަށާއި، އޮޓޮޕްސީ ހަދަން ބޭނުންނުވާ ކަމަށެވެ. އަދި އަދީލްގެ ހަށިގަނޑަށް އިތުރު އަނިޔާއެއް ދޭން ބޭނުންނުވާ ކަމަށާއި، ބޭނުންވަނީ އަދީލްގެ ހަށިގަނޑުގެ ވަޅުލައި، ކަށުނަމާދުގެ އެންމެހައި ކަންކަން ނިންމަން ކަމަށް އަދީލްގެ މަންމަ ބުންޏެވެ.

މިގައުމުގައި އަނިޔާ ލިބޭ މީހުންނަށް ނުވަތަ މަރުތަކުގެ މައްސަލާގައި އިންސާފު މިހާތަނަށް ލިބިފައިނުވާކަން ފާހަގަކޮށް ނާޖިދާ ބުނީ، އަދީލްއަށް އިންސާފު ލިބޭނެ ކަމަށް އުންމީދު ނުކުރާ ކަމަށެވެ.

ނާޖިދާ ވަނީ އޭނާގެ ދަރިފުޅު އަމިއްލައަށް މަރުވި ކަމަށް ބުނާ ވާހަކަތައް ދޮގު ކޮށްފައެވެ.

އަދީލް މަރުވިފަހުން ހަފްތާއަކަށްވުރެ ގިނަ ދުވަސްވެފައިވާއިރު، ހަށިގަނޑު އާއިލާއާ ހަވާލުނުކޮށް މޯޗަރީގައި ބާއްވައި، ތަހުގީގުގެ މައުލޫމާތު ވެސް ހިއްސާ ނުކުރާތީ އެކަމުގެ ކަންބޮޑުވުން އާއިލާގެ ފަރާތުން ކޮށްފައިވެއެވެ.

މި މައްސަލައާ ގުޅިގެން ހޮނިހިރު ދުވަހު ފުލުހުން ބުނީ، ބ.އަތޮޅުގައި ހިންގާ ރިސޯޓެއްގައި 21 އަހަރުގެ ދިވެހި ފިރިހެނަކު މަރުވި މައްސަލައެއް 23 އޯގަސްޓް 2025 ގައި ރިޕޯޓުކޮށްފައިވާ ކަމަށެވެ. އަދި މި މަރުގައި ބަލަންޖެހޭ ކަންތައްތަކެއް ހުރުމުންް އޮޓޮޕްސީ ހަދަން ނިންމާފައިވާ ކަމަށެވެ.

މި މައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.