ރައީސް މުއިއްޒު އަށް މަރުހަބާ ކިޔަން ފަނޑިޔާރުންނަށް ނިކުމެވޭނެ: ޖޭއެސްސީ
ރައީސް މުއިއްޒު އެންމެ ފަހުން ރަށްރަށަށް ވަޑައިގެންނެވިއިރު ވަނީ ރަށްރަށުގެ މެޖިސްޓްރޭޓް ކޯޓުތައް ހިމެނޭހެން ހުރިހާ އިދާރާތަކަކާ ބައްދަލުކުރައްވާފަ
ރައީސް ޑރ. މުހައްމަދު މުއިއްޒު ނިމިގެންދިޔަ ހަފްތާގައި ބ. އަތޮޅަށް ކުރެއްވި ދަތުރުފުޅުގެ ތެރެއިން - ފައިލް
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރަށްރަށަށް ވަޑައިގެންނެވުމުން، މަރުހަބާ ދެންނެވުމަށް އެ ރަށެއްގައި ތިއްބަވާ ފަނޑިޔާރުންނަށް ނިކުންނެވޭނެ ކަމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން ކަނޑައަޅައިފި އެވެ.
އެ ކޮމިޝަނުން ބުދަ ދުވަހު ބޭއްވި ބައްދަލުވުމެއްގައި މަޝްވަރާކޮށްފައިވަނީ، ދައުލަތުގެ އެންމެ އިސްވެރިޔާ ނުވަތަ ރައީސް ރަށްރަށަށް ކުރައްވަމުން ގެންދަވާ ދަތުރުފުޅުގައި މަރުހަބާ ދެންނެވުމަށް ބައިވެރިވުމާއި މުއައްސަސާތަކުގެ ވެރިންނާ އެކު ބާއްވަވާ ބައްދަލުވުންތަކުގައި ފަނޑިޔާރުން އަދި މުވައްޒަފުން ބައިވެރިކުރުމާ ގުޅޭ ގޮތުންނެވެ. ރައީސް މުއިއްޒު އެންމެ ފަހުން ރަށްރަށަށް ވަޑައިގެންނެވިއިރު ވަނީ ރަށްރަށުގެ މެޖިސްޓްރޭޓް ކޯޓުތައް ހިމެނޭހެން ހުރިހާ އިދާރާތަކަކާ ބައްދަލުކުރައްވާފަ އެވެ.
އެގޮތުން ރައީސަށް މަރުހަބާ ދަންނަވަން ފަނޑިޔާރުން ނިކުމެވަޑައިގަތުމަކީ ރަނގަޅު ކަމެއް ކަމަށް ޖޭއެސްސީ އިން ވަނީ ނިންމާފަ އެވެ. ނަމަވެސް ފަނޑިޔާރުންގެ ސުލޫކީ ހަމަތައް ހިފަހައްޓަން ޖެހޭނެ ކަމަށް ވަނީ ކަނޑައަޅާފަ އެވެ.
ޖޭއެސްސީ އިން މިގޮތަށް ހުއްދަދިން އިރު، ފަނޑިޔާރުން ސިޔާސީ ހަރަކާތްތަކުގައި ބައިވެރިވުމަކީ ގާނޫނާއި ގަވާއިދުތަކުން މަނާ ކަމެކެވެ. ރައީސް މުއިއްޒު ވެރިކަމަށް ވަޑައިގެންނެވުމަށްފަހު، މި ސަރުކާރުން ޖުޑިޝަރީއަށް ނުފޫޒު ފޯރުވާކަމުގެ ފާޑުކިޔުންތައް ވަނީ ވަރަށް ބޮޑުވެފަ އެވެ.
