ފާތިހުގެ ސުވާލެއް ރައީސް މުއިއްޒު އަށް: ގުޅީފަޅާއި ގިރާވަރު ފަޅުގެ މަގުތަކާއި، ތަންތަން ހެދުމުގެ ކޮންޓްރެކްޓް ކޮބައިތޯ؟
23 އޯގަސްޓު 2025 | ހޮނިހިރު 16:58ގުޅީފަޅާއި ގިރާވަރު ފަޅުގެ މަގުތަކާއި އެންމެހާ ތަންތަން ހެދުމަށް ހަދާފައިވާ ކޮންޓްރެކްޓް ކޮބައިތޯ ވަނީ ސުވާލު އުފައްދާފަ
މާލެސިޓީ ކައުންސިލުގެ މެންބަރު މުހައްމަދު ސައިފް ފާތިހް: ވިދާޅުވީ މާލޭގެ ރައްޔިތުންނަށް ބޯހިޔާވަހިކަމުގެ މައްސަލަ ހައްލުކުރުމަށް މި ސަރުކާރުން އެއްވެސް މަސައްކަތެއް ނުކުރައްވާ ކަމަށް
ގުޅީފަޅާއި ގިރާވަރު ފަޅުގެ މަގުތަކާއި އެންމެހާ ތަންތަން ހެދުމަށް ހަދާފައިވާ ކޮންޓްރެކްޓް ކޮބައިތޯ ވިދާޅުވެ، މާލެ ސިޓީގެ ކައުންސިލް މެމްބަރު މުހައްމަދު ސައިފް ފާތިހް ރައީސް ޑރ މުހައްމަދު މުއިއްޒު އަށް ސުވާލެއް ކުރިމަތިކުރައްވައިފި އެވެ.
ސައިފުގެ މި ސުވާލު ރައީސް މުއިއްޒަށް އަމާޒު ކުރެއްވީ ހުކުރު ދުވަހުގެ ރޭ ބޭއްވި ގިރާވަރު ބިންވެރިޔާ ސައްލާގައި ވާހަކަ ދައްކަވަމުންނެވެ.
ސައިފް ވިދާޅުވީ އަވާމެންދުރަކަށް ވެލިއަޅުއްވާ ބޭކާރު މަސައްކަތްތަކެއް ކުރައްވަމުން ގެންދަވާއިރު، މިހާރުވެސް ގޯތިތަކެއް ކަނޑާ ދީފައި އެބަހުރި ކަމަށާއި އެ ގޯތިތަކުގެ ރެޖިސްޓްރީ ވެސް އެތައްބަޔަކަށް ލިބިފައިވާ ކަމަށެވެ. އެހެންކަމުން މިހާރު ސަރުކާރުން އެކުރައްވާ ބޭކާރު މަސައްކަތްތަކުގެ ބަދަލުގައި ލިބިފައި ހުރި ގޯތިތައް އޭގެ ހައްގުވެރިންނަށް ދިނުމަށް ސައިފު ވަނީ ގޮވާލައްވާފަ އެވެ.
ސައިފު ވިދާޅުވީ މަގުތައްހަދާ ނިމި، ޕާކުތައް އަޅަންވާ ތަންތަނާއި މިސްކިތްތަކާއި ސްކޫލުތައް އަޅަންވާ ތަންތަން ފާހަގަކުރެވި ލޭންޑް ޔޫސް ޕްލޭން ވެސް ހަދާ ނިމިފައި ކަމަށެވެ. އެހެން ނަމަވެސް މަސައްކަތް ނިމި އެތައްބައެއްގެ އުންމީދާއި ގުޅިލާމެހިފައި އޮތްތަނަކަށް އަޅާނުލައްވާ، އަލުން ކަނޑަށް ވެލިއަޅުއްވަމުން އެ ގެންދަވަނީ ކޮން ވިސްނުމެއްގައިތޯ ސުވާލު އުފެދޭ ކަމަށް އޭނާ ވިދާޅުވި އެވެ.
ސައިފު ވިދާޅުވީ މި ސަރުކާރުން އެކަން އެ ކުރަނީ ކޮންކަހަލަ މޮޔަ ވިސްނުމެއްގައި ކަން އެއްގޮތަކަށް ވެސް ނުވިސްނޭ ކަމަށެވެ. އަދި ބޭކާރު، ނުކުރެވޭކަންކަން ކުރައްވަން އުޅުމުގެ ނަތީޖާއަކަށް ވެފައިވަނީ ސަރުކާރު ދަރާވިކުން ކަމަށް ވެސް އޭނާ ވަނީ ވިދާޅުވެފަ އެވެ.
އަދި އޭގެ ބަދަލުގައި މިހާރު ދީފައި ހުރި ތަންތަނަށް ރައްޔިތުންނަށް ދެވޭނޭ ގޮތް ހައްދަވައިދެއްވުން މާ ރަނގަޅުކަމަށް ވެސް ސައިފު ވިދާޅުވި އެވެ.
ތިންވަނަ ނުކުތާއެއްގެ ގޮތުގައި އަޅުގަނޑު ފާގަކޮށްލަން ބޭނުންވަނީ ކޮބައިތޯ އޭ، ރައީސުލްޖުމްހޫރިއްޔާ އަދި ހައުސިންގ މިނިސްޓަރަށް، ކޮބައިތޯ އޭ، ގިރާވަރުފަޅާއި ގުޅީފަޅުގެ މަގުތަކާއި ތަންތަން ހެދުމުގެ އެގްރީމެންޓް. ކޮންޓްރެކްޓެއް ހައްދަވައިފިންތޯ ތި ބޭފުޅުން؟ ތިބޭފުޅުން އެބަ އުޅުއްވަންތޯ މަގުތައް ހައްދަވަން، ކޭބަލް ތައް ވަޅުލަން، ފެންހުރި، ކަރަންޓު ހުރި، މިހުރިހާ މަސައްކަތެއް އެބަހިނގާތޯ އޭ؟މާލެ ސިޓީގެ ކައުންސިލް މެމްބަރު މުހައްމަދު ސައިފް ފާތިހް
ސައިފް ވިދާޅުވީ މި ސަރުކާރުން ދައްކަވަނީ ހުސް ވާހަކަތަކެއް ކަމަށާއި އަސްލުމަސައްކަތެއް ކުރާތަން ފެނިގެން ނުދާ ކަމަށެވެ. އަދި އެފަދަ މަސައްކަތެއް ކުރުމަށް ކޮންޓެރެކްޓެއް ވެސް މި ސަރުކާރަށް ހެދިފައިނުވާ ކަމަށް ސައިފް ވިދާޅުވި އެވެ.
ސައިފް ވިދަޅުވީ ބޭކާރު ވާހަތައް ދެއްކުމާއި، ކޮންޓްރެކްތަރުންނަށް ބޭކާރު ފައިސާ ހަރަދުކުރުން ނޫން ކަމެއް މި ސަރުކާރުން ކުރައްވަމުން ނުގެއްދަވާ ކަމަށެވެ.
