އިމިގްރޭޝަނަށް ފިލައިގެން ދިރިއުޅޭތާ 6 އަހަރުވެފައިވާ ބިދޭސީ އެއް މުދަލަށް ގެއްލުންދިން ކަމުގެ ތުހުމަތުގައި ހައްޔަރުކޮށް ބަންދަށް 15 ދުވަސް
23 އޯގަސްޓު 2025 | ހޮނިހިރު 07:50އެއީ ބަންގްލަދޭޝްއަށް ނިސްބަތްވާ 45 އަހަރުގެ އެމްޑީ ސަރާޖް މިއާ ނަމަކަށް ކިޔާ ފިރިހެނެއް
ހުޅުމާލޭ ފުރަތަމަ ފިޔަވަހީގައި ހުންނަ ރަށު މާރުކޭޓުގައި އިމިގްރޭޝަނުން ހިންގި އޮޕަރޭޝަނުގެ ތެރެއިން- ފައިލް ފޮޓޯ
ދިވެހިރާއްޖޭގައި އިމިގްރޭޝަނަށް ފިލައިގެން ދިރިއުޅޭތާ 6 އަހަރުވެފައިވާ ބިދޭސީއެއް މުދަލަށް ގެއްލުންދިން ކަމުގެ ތުހުމަތުގައި ހައްޔަރުކޮށް ބަންދުގެ މުއްދަތު ޖަހައިފި އެވެ.
އެއީ ބަންގްލަދޭޝްއަށް ނިސްބަތްވާ 45 އަހަރުގެ އެމްޑީ ސަރާޖް މިއާ ނަމަކަށް ކިޔާ ފިރިހެނެކެވެ.
ހުކުރު ދުވަހު އޭނާގެ ބަންދަށް 15 ދުވަސް ޖަހައި، ކަސްޓޯޑިއަލް ޖަލެއްގައި ބަންދުކުރުމަށް އަމުރުކޮށްފައިވެ އެވެ.
ކޯޓު އަމުރުގައި ބުނެފައިވަނީ، އޭނާގެ މައްޗަށް ތުހުމަތުކޮށްފައިވާ ކުށް އޭނާ ކުރިކަމަށް ތަހުމަތުކުރެވޭ ކޮންމެވެސް މިންވަރެއްގެ ހެކި ހުށަހަޅާފައިވާ ކަމަށެވެ.
މުދަލަށް ގެއްލުންދިން ކަމުގެ ތުހުމަތުކޮށްފައިވާއިރު، ވަކީލަކު ބޭނުންނުވާ ކަމަށް އޭނާ ބުނެފައިވާ ކަމަށް އަމުރުގައި ބުނެފައިވެ އެވެ. އޭނާ އެ ފޯނު ހަލާކުކޮށްލި ކަމަށް އެއްބަސްވި ކަމަށާއި، އެކަން ކުރީ އެފަރާތަކީ އޭނާ ރާއްޖެއަށް ގެނައި ފަރާތަށްވެފައި ވަޒީފާ އެއްވެސް ހަމަޖައްސައިނުދީ ޕޯސްޕޯޓު ވެސް އަތުލައިގެން އުޅޭތީ ކަމަށް ބުނެފައިވާ ކަމަށެވެ.
މީގެ އިތުރުން އޭނާއަކީ، 2019 ވަނަ އަހަރުން ފެށިގެން އިމިގްރޭޝަނަށް ފިލައިގެން އުޅޭ ބިދޭސީއެއްކަން އައިއޯ ފާހަގަކުރި ކަމަށް ކޯޓު އަމުރުގައި ބުނެފައިވެ އެވެ.
ގަވާއިދާ ހިލާފަށް ރާއްޖޭގައި އުޅޭ ބިދޭސީންގެ މައްސަލަ ވަރަށް ބޮޑެވެ. ބައެއް ބިދޭސީން އެކި ކުށްތަކަށް އަރައިގަންނަމުންދާއިރު، ބައެއް ބިދޭސީން ބޮޑެތި މާރާމާރީތަކުގައި ވެސް ބައިވެރިވާ ކަމަށް ކަމާބެހޭ އިދާރާތަކުން މީގެ ކުރިން ބުނެފައިވެ އެވެ.
