ސްރީ ލަންކާގެ ކުރީގެ ރައީސް ރަނިލް ވިކްރަމަސިންހަ ހުކުރު ދުވަހުގެ މެންދުރު އެ ގައުމުގެ ސީ.އައި.ޑީ އިން ހައްޔަރުކޮށްފިއެވެ.

ރަނިލް ހައްޔަރު ކުރެވުނީ އޭނާ ރައީސްކަމުގައި ހުންނެވިއިރު ލަންޑަނަށް ކުރެއްވި އަމިއްލަ ދަތުރަކަށް ދައުލަތުގެ ފައިސާ ނަހަމަ ގޮތުގައި ބޭނުން ކުރެއްވި ކަމުގެ ތުހުމަތު ގައެވެ.

އޭނާ މިއަދު ހެނދުނު ފައިނޭންޝަލް ކްރައިމްސް އިންވެސްޓިގޭޝަން ޑިވިޜަން (އެފް.ސީ.އައި.ޑީ) އަށް ބަޔާނެއް ދެއްވުމަށް ވަޑައިގެންނެވި ކަމަށް އެ ގައުމުގެ މީޑިއާތަކުން ރިޕޯޓު ކޮށްފައިވެއެވެ.

މިއީ އެ ގައުމުގެ ކުރީގެ ރައީސަކު ހައްޔަރު ކުރި ފުރަތަމަ ފަހަރެވެ.

ތަޙުޤީޤުކުރާ ފަރާތްތަކުން ބުނާ ގޮތުގައި، އޭނާ ކުރެއްވި ރަސްމީ ބޭރު ދަތުރެއްގެ ބައެއްގެ ގޮތުގައި ކުރެވުނު މި ދަތުރަކީ ރަސްމީ ދަތުރުގެ ބައެއް ނޫނެވެ. ނަމަވެސް މި ދަތުރު ކުރެވިފައި ވަނީ ސަރުކާރުގެ ފައިސާ އިންނެވެ.

މި މަހުގެ ކުރީކޮޅު، ކުރީގެ ރައީސް ގެ ސެކްރެޓަރީ ސަމަން އެކަނަޔަކެ އަދި ކުރީގެ ޕްރައިވެޓް ސެކްރެޓަރީ ސެންޑްރާ ޕެރޭރާއާ މި ދަތުރު އިންތިޒާމުކުރުމުގައި އެ ދެ ފަރާތުގެ ދައުރާ ބެހޭ ގޮތުން ވަނީ ސުވާލު ކޮށްފައެވެ.

2022 އިން 2024 އަށް ސްރީލަންކާގެ ރައީސް ކަން ކުރެއްވި ވިކްރަމަސިންހަ އަކީ ފަހަކަށް އައިސް އެ ގައުމުގައި ހައްޔަރު ކުރެވުނު އެންމެ އިސް ސިޔާސީ ފަރާތެވެ.

އޭނާ އަކީ ސްރީ ލަންކާ ގެ އިގްތިސާދު ބަނގުރޫޓު ވުމުގެ ހާލަތުން ސަލާމަތް ކުރުމުގައި މުހިންމު ދައުރެއް އަދާ ކުރެއްވި ބޭފުޅެކެވެ.

ވިކްރަމަސިންހަ އަކީ 1990 ގެ އަހަރުތަކުން ފެށިގެން 6 ދައުރެއްގައި ބޮޑުވަޒީރުކަން ކުރެއްވި ބޭފުޅެކެވެ.

ބީބީސީ ސިންހަޅަ އިން ބުނާ ގޮތުގައި، އުމުރުން 76 އަހަރުގެ ރަނިލް ރައީސްކަމުގައި ހުންނެވި މުއްދަތުގައި 23 ބޭރު ދަތުރު ކުރައްވާފައިވެއެވެ. މި ދަތުރުތަކުގެ ޚަރަދު 600 މިލިއަން ރުޕީސް (2 މިލިއަން ޑޮލަރު) އަށް ވުރެ މައްޗަށް އަރައެވެ.

ހުކުރު ދުވަހުގެ ހައްޔަރު ކުރުން ގުޅިފައިވަނީ 2023 ވަނަ އަހަރު ކިއުބާގައި ބޭއްވުނު ޖީ77 ސަމިޓުން އެނބުރި ވަޑައިގަންނަވަމުން އިނގިރޭސިވިލާތުގައި، މަޑުކުރެއްވުމަށް ކަމަށް އޭއެފްޕީ ނިއުސް އޭޖެންސީން ރިޕޯޓު ކުރެއެވެ.

އެ މަޑު ކުރެއްވުމުގައި، އޭނާ އާއި އޭނާގެ އަނބިކަނބަލުން ވޯލްވަރހެމްޕްޓަން ޔުނިވަރސިޓީގެ ރަސްމިއްޔާތެއްގައި ބައިވެރިވެވަޑައިގެންނެވިއެވެ.

ސްރީ ލަންކާ ގެ ސީއައިޑީން ތުހުމަތު ކުރަނީ މިއީ އަމިއްލަ ދަތުރެއް ކަމަށާއި، މި ދަތުރަށް ދައުލަތުގެ ފައިސާ ބޭނުން ކުރެވުވުނު ކަމަށެވެ. ނަމަވެސް ރަނިލް މިކަމާ ދެކޮޅު ހައްދަވާފައި ވެއެވެ.

ރަނިލް އަކީ 1977 ގައި ގާނޫނު ހަދާ މަޖިލިހުގެ މެމްބަރަކަށް ހޮވުނީއް ސުރެ އެ ޤައުމުގެ ސިޔާސީ މައިދާނުގައި ހަރަކާތްތެރިވެ ވަޑައިގަންނަވާ ބޭފުޅެކެވެ.

ގާނޫނީ ވަކީލެއްގެ ގޮތުން މަސައްކަތްކުރައްވާ ރަނިލް އަކީ ސިޔާސީ އަދި ވިޔަފާރިވެރިން ހިމެނޭ ތަނަވަސް ޢާއިލާއަކުން ވަޑައިގެން ބޭފުޅެކެވެ.

1994 ގައި ޔުނައިޓެޑް ނޭޝަނަލް ޕާޓީ (ޔޫއެންޕީ) ގެ ލީޑަރު ކަމާ ހަވާލުވުމަށް ފަހު، ކޮރަޕްޓް ޕާޓީ މެންބަރުން ގެ ކިބައިން ޕާޓީ ސާފުކުރުމަށް ޑިސިޕްލިނަރީ ކޮމިޝަނެއް އުފެއްދުމުގެ ސަބަބުން، ޕާޓީގެ އިމޭޖް ރީތި ކުރުމުގެ ކްރެޑިޓް އޭނާއަށް ލިބުނެވެ.

އަހަރުތަކެއް ވަންދެން، ސްރީލަންކާގެ ރައީސް ކަމަށް ވާދަކުރެއްވި ނަމަވެސް، އޭނާ އަށް އެ މަޤާމު ލިބިވަޑައިގަތީ 2022 ގައި ރާޖަޕަކްސާ ރައީސް ކަން ދޫކޮށްލައްވައި ފިއްލެވުމުގެ ސަބަބުންނެވެ.

ލަންކާގެ ރައީސް ކަން ލިބިވަޑައިގަތް އިރު އޭނާ އަކީ ޕާލިމެންޓުގައި އޭނާގެ ޕާޓީ ތަމްސީލު ކުރައްވަން ހުންނެވި ހަމައެކަނި މެމްބަރެވެ.

އެހެން ނަމަވެސް 2024 ގެ އިންތިޚާބުގައި އަނުރަ ކުމާރަ ޑިސަނަޔަކެ އާ ވާދަކުރައްވާ ރަނިލް އަށް ނާކާމިޔާބު ވިއެވެ.