ސްރީ ލަންކާގެ ކުރީގެ ރައީސް ރަނިލް ބިޑި އަޅުވައިގެން ޖަލަށް ގެންގޮސްފި

ޚިޔާނާތުގެ ތުހުމަތުގައި ހުކުރު ދުވަހު ހައްޔަރު ކުރި ލަންކާގެ ކުރީގެ ރައީސް ރަނިލް ވިކްރަމަސިންހަ ބިޑި އަޅުވައިގެން ޖަލަށް ގެން ގޮސްފިއެވެ.

ކުރީގެ ރައީސް ރަނިލް ވިކްރަމަސިންހަ ގެ މައްޗަށް ތުހުމަތު ކުރެވުނީ އިތުރު، 10 މީހުންގެ ބަޔަކާއެކު އަމިއްލަ ބޭނުމަކަށް ކުރެއްވި ބޭރު ދަތުރެއްގައި 16.6 މިލިއަން ސްރީ ލަންކަން ރުޕީސް ނަހަމަ ގޮތުގައި ބޭނުންކުރި ކަމަށެވެ.

މި މައްސަލައިގައި ހުކުރު ދުވަހު ކޮލޮމްބޯ ފޯޓް މެޖިސްޓްރޭޓް ނިލުޕުލި ލަންކަޕޫރާ އޭނާ އޯގަސްޓް 26 އާ ހަމައަށް ބަންދުގައި ބަހައްޓަން ވަނީ އަމުރު ކޮށްފައެވެ.

ބީބީސީ ސިންހަލަ އިން ބުނާ ގޮތުގައި، 76 އަހަރުގެ ރަނިލް ވިކްރަމަސިންހަ ރައީސްކަމުގައި ހުންނެވި މުއްދަތުގައި 23 ބޭރު ދަތުރު ކުރައްވާފައިވެއެވެ. މި ދަތުރުތަކަށް 600 މިލިއަން ސްރީލަންކަން ރުޕީސް އަށް ވުރެ ގިނަ އަދަދެއް (2 މިލިއަން އެމެރިކާ ޑޮލަރު) ޚަރަދުވެފައިވެއެވެ.

ނިއުސް އެޖެންސީ އޭއެފްޕީ އިން ރިޕޯޓުކުރާ ގޮތުގައި، ހުކުރު ދުވަހު އޭނާ ހައްޔަރުކުރެވުނީ 2023 ވަނަ އަހަރު ކިއުބާގައި ބޭއްވުނު ޖީ77 ސަމިޓަކަށްފަހު އެނބުރި ވަޑައިގަންނަވަމުން އިނގިރޭސިވިލާތައް ކުރެއްވި ދަތުރުފުޅަކާ ގުޅިގެންނެވެ.

އެ ދަތުރުގައި، އޭނާ އާއި އޭނާގެ އަނބިކަނބަލުން ވޯލްވަރހެމްޕްޓަން ޔުނިވަރސިޓީގެ ރަސްމިއްޔާތެއްގައި ބައިވެރިވެވަޑައިގެންނެވިއެވެ.

ސްރީ ލަންކާގެ ސީއައިޑީ އިން ތުހުމަތު ކުރަނީ މިއީ އަމިއްލަ ދަތުރެއް ކަމަށާއި، މި ދަތުރަށް ދައުލަތުގެ ފައިސާ ބޭނުން ކުރެވުނު ކަމަށެވެ. ނަމަވެސް ވިކްރަމަސިންހަ ވަނީ މިކަން ދޮގު ކުރައްވާފައެވެ.

އޭނާގެ ޔުނައިޓެޑް ނޭޝަނަލް ޕާޓީ (ޔޫއެންޕީ) ގެ އޮފިޝަލަކު ކޯޓުން ބޭރުގައި ނޫސްވެރިންނާ ވާހަކަ ދައްކަމުން ބުނެފައި ވަނީ އޭނާ އަކީ މައުސޫމް ބޭފުޅެއް ކަމަށާއި، މި މައްސަލަ އަކީ ސިޔާސީ ބޭނުމަކަށް ހުށަހެޅިފައިވާ މައްސަލައެއް ކަމަށެވެ.

"ރަނިލް ވިކްރަމަސިންހަ އެއްވެސް އިރެއްގައި ރައްޔިތުންގެ ފައިސާ ނުވަތަ ދައުލަތުގެ ފައިސާ ނަހަމަ ގޮތުގައި ބޭނުން ކޮށްފައެއް ނުވޭ،" ކުރީގެ ރައީސް ކޯޓަށް ޙާޟިރު ކުރެވުނު ވަގުތު ކޮލޮމްބޯގެ ކޯޓު ކޮމްޕްލެކްސް ބޭރުގައި އެއްވެފައިވާ ނޫސްވެރިންނާ މުޚާޠަބުކޮށް ޔޫއެންޕީގެ މެންބަރު ނިޝާންތަ ސްރީ ވަރްނަސިންހަ ބުންޏެވެ.

"އިޤްތިޞާދު ފުނޑުފުނޑުވެގެން ދިޔައިރު، ޤައުމު ސަލާމަތް ކުރުމަށް ކުރިމަތިލައި، އެ ޒިންމާ ގަބޫލު ކުރެއްވި ފަރާތަކީ އޭނާ،" ވަރްނަސިންހަ ހާމަ ކުރިއެވެ. "މިއަދު މި ސަރުކާރުން މިހާ ދަށުދަރަޖައިގައި މުޢާމަލާތް ކުރަމުން ދަނީ އެ ފަރާތާ."

ޤާނޫނީ ވަކީލެއް ކަމުގައިވާ، އަދި ސްރީލަންކާގެ ބޮޑުވަޒީރުކަން ރެކޯޑު އަދަދަކަށް 6 ފަހަރު ކުރައްވާފައިވާ ރަނިލް ވިކްރަމަސިންހަ، 2022 ގައި ރައީސްކަމަށް ވަޑައިގަތީ އެ ގައުމަށް ކުރިމަތިވި ނުރައްކާތެރި މާލީ ހީނަރުކަން އެންމެ ގޯސްވެފައިވާ ދަނޑިވަޅުގައެވެ.

ޔޫއެންޕީގެ ލީޑަރު ރަނިލް ވެރިކަމާ ޙަވާލުވެވަޑައިގަތީ އިޤްތިޞާދު ބޮއްސުންލުމުގެ ސަބަބުން އެ ގައުމުގެ ރައްޔިތުން މަގުތަކަށް ނުކުމެ ކުރަމުން ދިޔަ ފުޅާ ދާއިރާ އެއްގެ އިހުތިޖާޖުތަކާ ގުޅިގެން އޭރު ހުންނެވި ރައީސް ގޮތަބަޔާ ރާޖަޕަކްސާ ޤައުމުން ފިއްލަވައިގެން ވަޑައިގަތުމަށްފަހު އިސްތިޢުފާ ދެއްވުމުންނެވެ.

އިޤްތިޞާދީ ހީނަރުކަމަށްފަހު ބޭއްވުނު ފުރަތަމަ ރިޔާސީ އިންތިޚާބުގައި އޭނާ އަށް ލިބިވަޑައިގަތީ ތިން ވަނަ އެވެ. މި އިންތިޚާބު ކާމިޔާބު ކުރެއްވީ މާކްސިސްޓް ވިސްނުމުގެ އަނޫރާ ކުމާާރާ ޑިސަނަޔަކެ އެވެ. ދެވަނަ ހޯއްދެވީ އިދިކޮޅު ލީޑަރު ސަޖިތް ޕްރެމަދާސާ އެވެ.

ލަންކާ މީޑީއާ އިން ރިޕޯޓު ކޮށްފައިވާ ގޮތުގައި ރަނިލް ވަނީ ހުކުރު ދުވަހުގެ ރޭ ޖަލަށް ގެނައުމަށް ފަހު ޖަލު ހޮސްޕިޓަލަށް ބަދަލުކުރެވިފައެވެ. ޖަލު ހޮސްޕިޓަލް އަށް ބަދަލު ކުރެވުނީ ވެލިކަޑަ ޖަލަށް ގެނެވުނު ފަހުން ކުުރެވުނު މެޑިކަލް ޗެކަޕަކަށްފަހު ކަމަށް ރިޕޯޓުތައް ބުނެއެވެ.