ލަންކާގެ ޚުދުމުޚުތާރު ސަރުކާރާ ދެކޮޅަށް އިދިކޮޅު ފަރާތްތަކުން ގުޅިގެން 1000 މުޒާހަރާ އިންތިޒާމު ކުރުމަށް ރަނިލް ގޮވާލައްވައިފި

ސްރީ ލަންކާގެ މިހާރުގެ ސަރުކާރުން ޚުދުމުޚުތާރު ވެރިކަމެއް ޤާއިމު ކުރަން މަސައްކަތް ކުރަމުންދާތީ، އެކަމާ ދެކޮޅަށް އިދިކޮޅު ފަރާތްތަކުން ގުޅިގެން 1،000 މުޒާހަރާ އިންތިޒާމު ކުރުމަށް ލަންކާގެ ކުރީގެ ރައީސް ރަނިލް ވިކްރަމަސިންގެ ހޮނިހިރު ދުވަހު ގޮވާލައްވައިފިއެވެ.

"އެކި އިދިކޮޅު ސިޔާސީ ފަރާތްތަކުން ގުޅިގެން މިކަމަށް މަސައްކަތް ކުރުމަށް ގޮވާލާ އަޑު އަޅުގަނޑުމެންނަށް އިވިއްޖެ. މިއަދުގެ ބައްދަލުވުމަކީ އެއް ބައެއްގެ ގޮތުގައި މަސައްކަތް ކުރުމުގެ ފެށުން،" ވިކްރަމަސިންހަ ވިދާޅުވި ކަމަށް ލަންކާގެ މީޑިއާ އިން ރިޕޯޓު ކޮށްފައިވެއެވެ.

އޭނާ ގޮވާލެއްވީ ހުރިހާ ޕާޓީތައް އެކުގައި ސްރީ ލަންކާގެ ޚުދުމުޚުތާރު ސަރުކާރާ ދެކޮޅަށް މަސައްކަތް ކުރުމަށް އެންމެ އެއްބައިވެ ތެދުވުމަށެވެ.

ޔުނައިޓެޑް ނޭޝަނަލް ޕާޓީ (ޔޫއެންޕީ) ގެ ބައްދަލުވުމަކަށް ހާޒިރުވެ ތިބި ބަޔަކާ މުޚާތަބު ކުރައްވަމުން، އެނާ ދާދި ފަހުން ހައްޔަރުކުރުމާ ބެހޭގޮތުން ވެސް ވާހަކަފުޅު ދައްކެވިއެވެ. ދައުލަތުގެ ފައިސާ ބޭނުން ކުރައްވައިގެން އިނގިރޭސިވިލާތައް އަމިއްލަ ދަތުރުފުޅެއް ކުރެއްވި ކަމުގެ ތުހުމަތުގައި ވިކްރަމަސިންހަ ހައްޔަރު ކުރިކުރުމާ ބެހޭ ގޮތުން ވިދާޅުވީ އެނާ ކުރެއްވީ ރަސްމީ ބޭރު ދަތުރުފުޅެއް ކަމުގައެވެ.

"އަޅުގަނޑު ވޭތުވެދިޔަ މަހު ހައްޔަރު ކުރެވުނީ ހަމައެކަނި އެކި ޤައުމުތަކަށް ރަސްމީ ދަތުރު ކުރުމާ ގުޅިގެން،" އޭނާ ވިދާޅުވިއެވެ. "އަޅުގަނޑު ހަވާނާ ގައި ބޭއްވުނު ޖީ77 ސަމިޓަށް ހާޒިރުވެ، އޭގެފަހުން އދ. ގެ ޖަލްސާތަކަށް އެމެރިކާ އަށް ދިޔައިން، އަދި އެތާނގައި ވޯލްޑް ބޭންކް އަދި އައިއެމްއެފްގެ އިސްވެރިންނާވެސް ބައްދަލު ކުރިން. އިނގިރޭސިވިލާތު ގައި މަޑުކުރީ ހަމައެކަނި ޓްރާންސިޓަށް. މި ދަތުރުގައި އަޅުގަނޑު ދައުލަތުގެ ފައިސާ ބޭނުމެއް ނުކުރަން. އަޅުގަނޑުގެ ޤާނޫނީ ވަކީލުންގެ ލަފާގެ މަތިން، މިވަގުތު ހައްޔަރުކުރުމާ ބެހޭގޮތުން އިތުރަށް ވާހަކައެއް ނުދައްކާނަން،" ވިކްރަމަސިންހަ ވިދާޅުވިއެވެ.