އިނގިރޭސިވިލާތުގެ ލަންޑަންގައި ބުރާސްފަތި ދުވަހު ހަވީރު "މޯލްޑިވްސް-ޔޫކޭ ބިޒްނަސް ފޯރަމް" ބާއްވައިފިއެވެ.

މި މަހުގެ ފުރަތަމަ ދުވަހު ސިންގަޕޫރުގައި ވެސް ސަރުކާރުން ވަނީ ބިޒްނަސް ފޯރަމް އެއް ބާއްވާފައެވެ.

ސިންގަޕޫރުގެ ބިޒްނަސް ފޯރަމް ބޭއްވިތާ ދެހަފްތާ ގެ މުއްދަތުގެ ތެރޭގައި އިނގިރޭސިވިލާތުގައި ބޭއްވި ބިޒްނަސް ފޯރަމް ގައި ވެސް ރައީސް ޑރ. މުޙައްމަދު މުޢިއްޒު ބައިވެރިވެވަޑައިގަތެވެ.

މިހާތަނަށް ބޭއްވި އެއްވެސް ބިޒްނަސް ފޯރަމް އެއް ގެ ނަތީޖާ ސަރުކާރުން ހާމަ ކޮށްފައި ނުވާއިރު، ސަރުކާރުން ބުނަނީ މިއީ، އިކޮނޮމިކް މިނިސްޓްރީ އިން، ދުނިޔޭގެ އެކި ކަންކޮޅު ތަކުގައި ކުރިއަށް ގެންދާ ސިލްސިލާ ފޯރަމްގެ 8 ވަނަ ބައްދަލުވުން ކަމުގައެވެ.

ފޯރަމްގައި ރައީސް މުއިއްޒު ދެއްކެވި ވާހަކަފުޅުގައި، އިނގިރޭސިވިލާތުގެ ވިޔަފާރިތަކުން ދިވެހިރާއްޖޭ ގައި އިންވެސްޓް ކުރެވިދާނެ މައިގަނޑު ފަސް އިސްތިރާޖީ ދާއިރާއެއްގެ މައްޗަށް އަލިއަޅުވާލެއްވިއެވެ.

އެ ފަސް ދާއިރާ އަކީ، އުފެއްދުންތެރިކަމާއި ޘަޤާފަތާއި ފިކުރީ މުދަލުގެ މައްޗަށް އެކުލެވޭ ކްރިއޭޓިވް އިކޮނޮމީގެ ދާއިރާ، ޑިޖިޓަލް ޓްރާންސްފޯރމޭޝަން، އިޔާދަކުރަނިވި ހަކަތައިގެ ދާއިރާ، މަސްވެރިކަމާއި ކަނޑުގެ ވަޞީލަތްތަކުން އީޖާދީ ބޭނުން ހިފުމުގެ ދާއިރާ އަދި ފަތުރުވެރިކަމުގެ ދާއިރާއެވެ.

މީގެ އިތުރުން، ދިވެހިރާއްޖޭގައި އިންވެސްޓް ކުރުމުގެ މާޙައުލު އިތުރަށް ހަރުދަނާ ކުރުމަށް ސަރުކާރުން ކުރަމުން ގެންދާ މަސައްކަތްތަކުގެ ތެރޭގައި، ފޮރިން އިންވެސްޓްމަންޓްގެ އާ ޤާނޫނެއް ތަންފީޒު ކުރުމާއި، ޚާއްޞަ އިޤްތިޞާދީ ސަރަޙައްދުތަކުގެ ހަރަކާތްތައް އަލުން ހިންގަން ފެށުން ހިމެނޭކަން މުއިއްޒު ފާހަގަ ކުރެއްވިއެވެ.

ރާއްޖޭގެ ދަޅު މަސް އެންމެ ގިނައިން ޒަމާނުއްސުރެ އެކްސްޕޯޓު ކުރާ އެއް ގައުމު ކަމުގައިވާ އިނގިރޭސިވިލާތުގައި ބޭއްވި ބިޒްނަސް ފޯރަމްގައި މުއިއްޒު ވަނީ، ދިވެހިރާއްޖޭގެ މަސްވެރިކަން ޕްރޮމޯޓް ކުރުމަށް ބޭނުންކުރާ ބްރޭންޑް "ފްރޮމް މޯލްޑިވްސް" އިފްތިތާޙް ކޮށްދެއްވާފައެވެ.

މިފަދަ ބްރޭންޑެއްގެ މަޤްޞަދަކީ، ދެމެހެއްޓެނިވި ގޮތެއްގައި މަސްވެރިކަން ކުރުމަށް ދިވެހިރާއްޖެ އިން ކުރާ މަސައްކަތްތައް ކުރިއަރުވައި، ޕްރިމިއަމް އެކްސްޕޯޓް ޕްރޮޑަކްޓެއްގެ ގޮތުގައި ދުނިޔޭގެ ބާޒާރުގައި ދިވެހި ސީފުޑް ޕްރޮމޯޓް ކުރުން ކަމަށް ރައީސް އޮފީހުން ބުނެއެވެ.

މި ފޯރަމްގައި، ދެ ޤައުމުގެ ވިޔަފާރީގެ ގުޅުން އިތުރަށް ހަރުދަނާ ކުރުމަށް ޓަކައި، ވެސްޓް ލަންޑަން ޗެމްބަރސް އޮފް ކޮމަރސް އާއި ދިވެހިރާއްޖޭގެ އިކޮނޮމިކް މިނިސްޓްރީ އާ ދެމެދު ފަހުމުނާމާއެއް ގައި ވަނީ ސޮއި ކޮށްފައެވެ.

"އިންވެސްޓިންގް އިން ދަ ފިއުޗަރ: އަ ޑަޔަލޮގް އޮން މޯލްޑިވްސް އިކޮނޮމިކް ވިޜަން" – މި ޝިޢާރުގެ ދަށުން ބުރާސްފަތި ދުވަހުގެ ފޯރަމްގައި، މަތީ ފަންތީގެ ޕެނަލް ޑިސްކަޝަނެއް ވެސް ކުރިއަށް ގެންދިޔައެވެ. މި ޑިސްކަޝަން ގައި ފަތުރުވެރިކަމާއި މަސްވެރިކަމާއި އިޔާދަކުރަނިވި ހަކަތަ އާއި ކުނި މެނޭޖްކުރުމާއި ފައިނޭންސިންގ ފަދަ މުހިންމު ދާއިރާ ތަކުން ގުޅުން ބަދަހި ކުރުމަށް ހުރި ފުރުޞަތުތަކުގެ މައުލޫމާތު ބައިވެރިންނާއެކު ޙިއްޞާކުރެވިފައިވާ ކަމަށް ރައީސް އޮފީހުން ބުނެއެވެ.