ލަންޑަންގައި މުޒާހަރާ ކުރި ފަލަސްތީނަށް ތާއީދުކުރާ އެކްޓިވިސްޓުންތަކެއް ހައްޔަރުކޮށްފި
ހައްޔަރު ކުރި މީހުން ރާވާފައިވަނީ ލަންޑަނުގެ ބައެއް ތަންތަނަށް ޓެރެރިސްޓް ހަމަލާތައް ދޭންކަމަށް ފުލުހުން ބުނޭ
ލަންޑަންގައި ކުރިއަށްދިޔަ މުޒާހަރާގެ ތެރެއިން
ލަންޑަން ސްޓޮކް އެކްސްޗޭންޖުގެ މަސައްކަތަށް ހުރަސް އަޅަން އުޅުނު ކަމުގެ ތުހުމަތުގައި ފަލަސްތީނަށް ތާއީދުކުރާ އެކްޓިވިސްޓުންތަކެއް ހައްޔަރުކޮށްފިއެވެ.
އެ މީހުން ހައްޔަރުކޮށްފައިވަނީ ލަންޑަން، ލިވަޕޫލް އަދި ބްރައިޓަން އިންނެވެ. އުމުރުން 26 އަހަރާއި 31 އަހަރާ ދެމެދުގެ މި ދެ މީހުން އަދިވެސް ތިބީ ބަންދުގައެވެ.
މެޓްރޯޕޮލިޓަން ފުލުހުން ބުނީ އެލްއެސްއީ ހިންގަމުންދިޔަ އިމާރާތް ހުޅުވަން އައި މީހުންނަށް ހުރަސްއަޅައި އެތަނުގެ ޚިދުމަތް ހުއްޓުވުމުގެ ގޮތުން ގެއްލުންދީ ހަދާފައިވާ ކަމުގެ މައުލޫމާތު އިނގިރޭސި ވިލާތުގެ ނޫހެއް ކަމަށްވާ ޑެއިލީ އެކްސްޕްރެސް އިން ކަމާބެހޭ ފަރާތްތަކަށް ދީފައިވާ ކަމަށެވެ.
ޑިޓެކްޓިވް ސުޕްރިންޓެންޑެންޓް ސިއާން ތޯމަސް ވިދާޅުވި ގޮތުގައި ހައްޔަރު ކުރި މީހުން ރާވާފައިވާ ގޮތަށް ކަންތައްތައް ކުރިއަށް ދިޔަނަމަ އެ އިމާރާތަށާއި، އެހެނިހެން ތަންތަނަށްވެސް ބޮޑެތި ގެއްލުންތަކެއް ލިބިދާނެ ފަދަ ހަރަކާތްތަކެއް އެމީހުން ރާވާފައިވާ ކަމަށެވެ. އަދި ކުރިއަށް އޮތް ދުވަސްތަކުގައި އޮފިސަރުން ތިބޭނީ އެފަދަ ކަމެއް ހިނގާފާނެތޯ ބަލަން ކަމަށް އޭނާ ވިދާޅުވިއެވެ.
މިދިޔަ އޮކްޓޯބަރު މަހުގެ ހަތް ވަނަ ދުވަހު އިސްރާއީލާއި ހަމާސް އާ ދެމެދު ހިނގި ހަނގުރާމައަށްފަހު ލަންޑަނާއި އިނގިރޭސިވިލާތުގެ އެހެން ސިޓީތަކުގައި ފަލަސްތީނަށް ތާއީދުކުރާ އަދި އިސްރާއީލަށް ތާއީދުކުރާ ގިނަ މުޒާހަރާތަކެއް ވަނީ ކުރިއަށް ގެންގޮސްފައެވެ. ބައެއް އެއްވުންތަކުގައި ފުލުހުންނާ ދެމެދު ހަމަނުޖެހުންތައް ވެސް ހިނގާފައިވެއެވެ.
ޣައްޒާގައި ހަނގުރާމަ ހުއްޓާލުމަށް ގޮވާލަމުން ދިޔަ ފަލަސްތީނުގެ ސަޕޯޓަރުންތަކެއް ވަނީ މެދުތެރޭ ލަންޑަންގެ ކިންގްސް ކްރޮސް ސްޓޭޝަނުގައި މިދިޔަ ނޮވެމްބަރު މަހުގެ ކުރީކޮޅު ވެސް އިހުތިޖާޖުކޮށްފައެވެ. އެއްވެ އުޅުމަށް އަޅާފައިވާ ފިޔަވަޅުތަކާ ހިލާފުވެގެން ފަސް މީހަކު އެ އެއްވުމުން ވެސް ހައްޔަރުކޮށްފައިވެއެވެ.
ފަލަސްތީނަށް ތާއީދުކުރާ ފަރާތްތަކުން ވަނީ މިމަހުގެ ކުރީކޮޅު ވެސް ލަންޑަނުގެ ޕާލަމެންޓް އިމާރާތް ހުރި މަގުތައް ކުޑަ ވަގުތުކޮޅަކަށް ބަންދުކޮށްފައެވެ.
މެދުއިރުމަތީގައި އެންމެ ފަހުން ހިނގި ހަމަނުޖެހުންތައް ފެށުނީ މިދިޔަ އޮކްޓޯބަރު މަހުގެ ހަތް ވަނަ ދުވަހު ހަމާސް ޖަމާއަތާއި ގުޅިފައިވާ ފަލަސްތީނުގެ ހަނގުރާމަވެރި ޖަމާއަތްތަކުން އިސްރާއީލުގެ ދެކުނުގެ ސަރަހައްދަށް ހަމަލާދީ 1200 އެއްހާ މީހުން މަރާލައި 200 އަށް ވުރެ ގިނަ މީހުން ރަހީނުކޮށްގެންނެވެ.
އިސްރާއީލުން ރައްދު ދިނީ ހަމާސްއާ ދެކޮޅަށް ހަނގުރާމަ އިއުލާނުކޮށް ޣައްޒާގައި އަސްކަރީ އޮޕަރޭޝަނެއް ހިންގަމުންނެވެ. އޭގެ ފަހުން ފަލަސްތީނުގެ 23،000 އަށް ވުރެ ގިނަ މީހުން ޝަހީދުވެފައިވާ ކަމަށް ހަމާސް ޖަމާއަތުން ވެރިކަން ހިންގާ އެ ގައުމުގެ ކަމާބެހޭ ފަރާތްތަކުން ބުނެއެވެ.
