ޝާހިދު، އދ ގެ ސެކެރެޓަރީ ޖެނެރަލް އާއި ބައްދަލުކުރައްވައިފި
އިންޓަނޭޝަނަލް ކޮމިއުނިޓީ އޯގަނައިޒޭޝަންގެ 'ފޮރ އަވަރ ފިއުޗަރ' ރިޕޯޓާއި ބެހޭ މައުލޫމާތުވެސް ޝާހިދު އދގެ ސެކެރެޓަރީ ޖެނެރަލް އާއި ހިއްސާކުރެއްވި
އަބްދުالله ޝާހިދު، އދގެ ސެކެޓްރީ ޖެނެރަލްއާއި ބައްދަލުކުރައްވައިފި
އެމް.ޑީ.ޕީ ގެ ރައީސް އަދި ކުރީގެ ޚާރިޖީ ވަޒީރު ޢަބްދުﷲ ޝާހިދު، އދގެ ސެކެރެޓަރީ ޖެނެރަލް އެންޓޯނިއޯ ގުޓިރޭޒް އާއި ނިއުޔޯކްގައި ބައްދަލުކުރައްވައިފި އެވެ.
މި ބައްދަލުކުރެއްވުމުގައި ޝާހިދު އާއި ގުޓިރޭޒް ވަނީ ޝާހިދުގެ ރިޔާސަތުގެ ދަށުން އދގެ އާއްމު މަޖިލީހުގެ 76 ވަނަ ސެޝަން ކުރިއަށްދިޔަ އިރު، ދެބޭފުޅުން އެކުގައި ކުރެއްވި މަސައްކަތްޕުޅަށާއި، އޭރު ޝާހިދު ފެއްޓެވި ބައެއް މަސައްކަތްޕުޅުތައް މިހާރު ގޮސްފައިވާ ހިސާބާއި ގުޅޭ ގޮތުން މަޝްވަރާކުރައްވާފަ އެވެ. އަދި އިންޓަނޭޝަނަލް ކޮމިއުނިޓީ އޯގަނައިޒޭޝަންގެ 'ފޮރ އަވަރ ފިއުޗަރ' ރިޕޯޓާއި ބެހޭ މައުލޫމާތުވެސް ޝާހިދު އދގެ ސެކެޓްރީ ޖެނެރަލް އާއި ހިއްސާކުރެއްވި އެވެ.
އދގެ މެމްބަރު 70 ޤައުމާއި އދގެ ބައެއް ޖަމްއިއްޔާތަކުން ބައިވެރިވި ރަސްމިއްޔާތެއްގައި ޝާހިދު ވަނީ މި ރިޕޯޓާއި ގުޅޭ ގޮތުން ކީނޯޓް ސްޕީޗެއް ވެސް ދެއްވާފަ އެވެ. އެރަސްމިއްޔާތުގައި ޝާހިދު ދެއްކެވި ވާހަކަފުޅުގައި، ޒަމާނީ މައްސަލަތަކަށް ހައްލު ހޯދުމުގައި ޒުވާނުންގެ ދައުރު ފުޅާކުރުމާއި ބެހޭ ގޮތުން ވާހަކަ ދެއްކެވި އެވެ. ޚާއްސަކޮށް، މިއަދުގެ މައްސަލަތަކަށް ހޯދާ ހައްލުތަކާއެކު ގިނަ ދުވަހު އެހައްލުތަކުގެ ނަތީޖާ ތަހައްމަލުކުރަން ޖެހޭނީ މިއަދުގެ ޒުވާނުންކަން ފާހަގަކޮށް، ޒުވާނުން ކުރިއެރުވުމަށް އަދި އދގެ ތެރޭގައި ޒުވާނުން ބާރުވެރިކުރުމަށް ޝާހިދު ފެއްޓެވި މަސައްކަތްޕުޅު، ޝާހިދަށްފަހު އދ ގެ އާއްމު މަޖިލީހުގެ ރިޔާސަތާއި ހަވާލުވާ ބޭފުޅުންވެސް ކުރިއަށް ގެންދަވާކަން އެމަނިކުފާނު ފާހަގަކުރެއްވި އެވެ.
ފޮރ އަވަރ ފިއުޗަރ ރިޕޯޓަކީ މިދިޔަ އަހަރު އދއިން އެޑޮޕްޓްކުރި ޕެކްޓް ފޮރ ދަ ފިއުޗަރ އާއި ގުޅުވައިގެން، ބައިނަލްއަޤްވާމީ ސުލްހައަށް މަސައްކަތްކުރާ ޖަމްއިއްޔާއެއްކަމަށްވާ އިންޓަނޭޝަނަލް ކޮމިއުނިޓީސް އޯގަނައިޒޭޝަނުން ނެރުނު ރިޕޯޓެކެވެ.
