އިސްލާމިކް ސްޓޭޓް (އައިއެސް)އާ ދެކޮޅަށް ތަލްއަފަރގައި ކުރަމުންދާ ހަނގުރާމަ ކާމިޔާބު ލިބިއްޖެ ކަމަށް އީރާގްގެ ބޮޑުވަޒީރު ހައިދަރު އަލް އަބާދި ވިދާޅުވެއްޖެ އެވެ.

ބުރާސްފަތި ދުވަހު އަބާދި ނެރުއްވާދައިވާ ސްޓޭޓްމަންޓެއްގައި ވިދާޅުވެފައިވަނީ އައިއެސްގެ އަތްދަށުން ތަލްއަފަރ ސަލާމަތް ކުރެވިފައިވާ ކަމަށެވެ.

"އިސްލާމިކް ސްޓޭޓްގެ ހަނގުރާމަވެރިންނަށް އަހަރެމެން ބުނަން އޮތީ ކަލޭމެން ކޮންމެތާކު ވިޔަސް އަހަރެމެން ކަލޭމެންނާ ހަނގުރާމަ ކުރާނަން. އަދި ކަލޭމެންނަށް އަމާންދިނުން ނޫން ގޮތެއްނެތް. އެހެންނޫނީ އޮތީ މަރު،" އަބާދި ސްޓޭޓްމަންޓްގައި ވިދާޅުވެފައިވެއެވެ.

އައިއެސްގެ އަތްދަށުން އިރާގްގެ މޫސަލް ސަލާމަތް ކުރިނަމަވެސް އިރާގާއި ސީރިއާ ބޯޑަރ ސަރަހައްދުގެ ކޮންޓްރޯލް އަދިވެސް އޮތީ އައިއެސްގެ ހަނގުރާމަވެރިންގެ އަތްދަށުގަ އެވެ.

އިރާގުގެ މޫސަލްގެ އަލް ނޫރީ މިސްކިތް އެގައުމުގެ އަސްކަރިއްޔާއިން ހިފައި، އިސްލާމިކް ސްޓޭޓް ޖަމާއަތް ބަލި ކުރެވިފައިވާ ކަަމަށް މިދިއަ ޖޫން މަހު ވަނީ އިއުލާން ކޮށްފަ އެވެ.

އަލް ނޫރީ މިސްކިތަކީ މީގެ ތިން އަހަރު ކުރިން. 29 ޖޫން 2014 ގައި، އިރާގާއި ސީރިޔާގައި ޚިލާފަތެެއް އިއުލާންކޮށް، އިސްލާމިކް ސްޓޭޓް ދައުލަތެެއްގެ ގޮތުގައި އަބޫ ބަކުރު އަލް ބަޣްދާދީ އިއުލާންކުރި ތަނެވެ. މި މިސްކިތުގައި ޚިލާފަތު އިއުލާންކުރި އިރު، ޚިލާފަތުގެ ވެރިއެއްގެ ގޮތުގައި ބަޣްދާދީ ވަނީ އަމިއްލައަށް އައްޔަންވެފައެވެެ.

އިރާގުގެ އަސްކަރިއްޔާ އިން މޫސަލް ހިފުމުގެ އޮޕަރޭޝަން ފެށުމާ ގުޅިގެން، ބަޣްދާދީ މޫސަލް ދޫކޮށްފައިވާ ކަމަށާއި އޭނާ ވަނީ އިރާގާއި ސީރިޔާގެ ބޯޑަރު ސަރަހައްދުގައި ފިލާ ކަމަށްވެސް އިރާގާއި އެމެރިކާގެ ސިފައިން ވަނީ ބުނެފައެވެ. ނަމަވެސް ފަހުން އިރާގުގެ އަސްކަރިއްޔާއިން ވަނީ ބަޣްދާދީ އަވަހާރަކޮށްލެވިފައިވާ ކަމަށް އިއުލާން ކޮށްފަ އެވެ.

އައިއެސް ޖަމާއަތުން 2014 ވަނަ އަހަރު އިރާގާއި ސީރިޔާގައި ޚިލާފަތެއް އިއުލާންކުރި އިރު، ޚިލާފަތާ ގުޅުމަށް މުސްލިމުންނަށް ގޮވާލާފައިވެއެވެ. އެ ޖަމާއަތުގެ ގޮވާލުމަށް ގިނަ ބަޔަކު ވަނީ އިޖާބަދީ، އިރާގާއި ސީރިޔާއަށް ހިޖުރަކޮށްފައިވެއެވެ. މީގެ ތެރޭގައި ބައެއް ދިވެހިންވެސް ހިމެނެއެވެ.