ޕާކިސްތާނުގައި ހިނގި ފެންބޮޑުވުމުގެ ހާދިސާގައި ގިނަބަޔަކު މަރުވުމާ ގުޅިގެން ރައީސުލްޖުމްހޫރިއްޔާ ތަޢުޒިޔާ ވިދާޅުވެއްޖެ
ޕާކިސްތާނުގައި ހިނގި ފެންބޮޑުވުމުގެ ހާދިސާއާ ގުޅިގެން ރައީސުލްޖުމްހޫރިއްޔާ މުޢިއްޒު ތަޢުޒިޔާ ވިދާޅުވެއްޖެ
ޕާކިސްތާނުގެ ބުނަރުގައި ފެންބޮޑުވެ ބިންގަނޑު ކަޑައިގެން ދިޔަ ސަރަހައްދެއްގައި އާންމުން މަޑުކޮށްލައިގެން
ޕާކިސްތާނަށް ބޯކޮށް ވާރެވެހި ހިނގި ފެންބޮޑުވުމުގެ ހާދިސާގައި ގިނަ ޢަދަދެއްގެ މީހުން މަރުވެ، ބޮޑެތި ގެއްލުންތަކެއް ލިބުމާ ގުޅިގެން އެކަމާ ހިތާމަފާޅުކުރައްވައި، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ތަޢުޒިޔާ ވިދާޅުވެއްޖެއެވެ.
އެމަނިކުފާނު ތަޢުޒިޔާ ވިދާޅުވެފައިވަނީ އެކްސްގައި ކުރެއްވިޕޯސްޓެއްގައެވެ.
ފެންބޮޑުވުމުގެ ސަބަބުން ގެއްލުން ލިބުނު މީހުންނަށް ޙަމްދަރުދީ ފާޅުކުރައްވައި، އެ ހާދިސާގައި މަރުވި މީހުންގެ ޢާއިލާތަކަށް، ދިވެހިސަރުކާރާއި ދިވެހި ރައްޔިތުންގެ ނަމުގައި އެމަނިކުފާނު ތަޢުޒިޔާ ވިދާޅުވި އެވެ.
ޕާކިސްތާނަށް ކުރިމަތިވެފައިވާ މި ހިތާމަވެރި ދަނޑިވަޅުގައި، ދިވެހިރާއްޖެ ވަނީ އެ ޤައުމުގެ ސަރުކާރާއި، އުޚުވަތްތެރި ރައްޔިތުންނާ އެކުގައިކަމަށް އެމަނިކުފާނު ވިދާޅުވި އެވެ.
ފެންބޮޑުވުމުގެ ސަބަބުން ޕާކިސްތާނުގެ ހުޅަނގު އުތުރުގައި 337 މީހުން މަރުވެފައިވާ ކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީން ބުނާއިރު، ފާއިތުވި ދުވަސްތަކުގައި އެ ސަރަހައްދުގައި ފްލެޝް ފްލަޑްތަކެއް އައުމާ ގުޅިގެން ގިނަ އަދަދެއްގެ މީހުން ގެއްލިފައިވެ އެވެ.
ކިޝްތުވާރު ޑިސްޓްރިކްޓްގައި ކުއްލި ހާލަތުގެ ޓީމުތަކުން ވަނީ އާދީއްތަ ދުވަހު ވެސް ދުރު އަވަށެއް ކަމަށްވާ ޗޮސިޓީގައި ސަލާމަތް ކުރުމުގެ މަސައްކަތް ކުރިއަށް ގެންގޮސްފައެވެ. މަދުވެގެން 60 މީހުން މަރުވެ 150 އެއްހާ މީހުން ޒަޚަމްވެފައިވާއިރު އޭގެ ތެރެއިން ގާތްގަނޑަކަށް 50 މީހުންގެ ހާލު ސީރިއަސް އެވެ.
މިހާރާއި އަންގާރަ ދުވަހާ ދެމެދު އިތުރު ފެންބޮޑުވުމާއި ބިންހެލުން އަތުވެދާނެ ކަމުގެ އިންޒާރު ކަމާބެހޭ ފަރާތްތަކުން ދީފައިވާއިރު، ލޯކަލް އެޑްމިނިސްޓްރޭޝަންތައް އެލާޓްގައި ތިބުމަށް އިލްތިމާސްކޮށްފައިވެއެވެ. ޖޫން މަހުގެ 26 ވަނަ ދުވަހުން ފެށިގެން އާންމު ހާލަތަށް ވުރެ ގިނައިން މޫސުމީ ވާރޭ ވެހި 600 އަށް ވުރެ ގިނަ މީހުން މިހާތަނަށް މަރުވެފައިވެ އެވެ.
