މަގޫދޫ އިން ރައީސް ޞާލިޙަށް ރަތް ދޫލައިގެ މަރުޙަބާއެއް
ގިނަ އަދަދެއްގެ ރައްޔިތުން ވަނީ ރައީސް ޞާލިޙް އަށް މަރުޙަބާ ދެންނެވުމަށް ބަނދަަރަށް ނިކުމެފައި
ފ.މަގޫދޫ އަަށް ރައީސް ޞާލިޙް ވަޑައިގެންނެވުމުން މަރުޙަބާ ދަންނަވަނީ
ފ.މަގޫދޫ ކައުންސިލްގެ ދައުވަތަކަށް، ކުރީގެ ރައީސް އިބްރާހީމް މުޙައްމަދު ޞާލިޙު އެ ރަށަށް ވަޑައިގެންފި އެވެ.
އާދީއްތަ ދުވަހުގެ ހަވީރު ރައީސް ޞާލިޙު މަގޫދޫ އަށް ވަޑައިގެންނެވީ މަގޫދޫގެ ބަނދަރު މަތީގައި ހަދާފައިވާ ދަތުރުވެރިންގެ ހިޔާ އާއި، ރަސްމީ ފާލަން އަދި ޓްރެކު ރަސްމީކޮށް ހުޅުވުމުގެ ރަސްމިއްޔާތު ޝަރަފުވެރި ކޮށްދެއްވުމަށެވެ.
މަގޫދޫ އަށް ރައީސް ޞާލިޙް ވަޑައިގެންނެވުމުން އެމަނިކުފާނަށް ރަތްދޫލައިގެ މަރުހަބާ އެއް ކިޔާފައިވެއެވެ. ގިނަ އަދަދެއްގެ ރައްޔިތުން ވަނީ ރައީސް ޞާލިޙް އަށް މަރުޙަބާ ދެންނެވުމަށް ބަނދަަރަށް ނިކުމެފަ އެވެ.
އެގޮތުން ބިލެތްދޫ ދާއިރާގެ ކުރީގެ މެމްބަރު އަޙުމަދު ޙަލީމް (ދޮންބިލެތް) ގެ އިތުރުން، މަގޫދޫ ކައުންސިލްގެ ރައީސް ޢަބްދުﷲ ވަޙީދު އަދި، ފީއަލީ ކައުންސިލްގެ ރައީސް މޫސާ އަޙުމަދު، ބިލެތްދޫ ކައުންސިލްގެ ރައީސް އަރީހް އިސްމާއީލް ވެސް ވަނީ ރައީސް ޞާލިޙަށް މަރުޙަބާ ދެންނެވުމަށް ބަނދަރަށް ވަޑައިގެންފަ އެވެ.
މަގޫދޫ އަށް ރައީސް ޞާލިޙު ކުރައްވާ މި ދަތުރުފުގައި އެމަނިކުފާނުގެ އަރިހުގައި ކުރީގެ އެންވަޔަރަމަންޓް މިނިސްޓަރު އާމިނަތު ޝައުނާގެ އިތުރުން، އަލިފުށީ ދާއިރާގެ ކުރީގެ މެމްބަރު މުޙައްމަދު ރަޝީދު ޙުސެއިން (ބިގޭ) ވެސް ބައިވެރިވެ ވަޑައިގަންނަވަ އެވެ.
ރައީސް ޞާލިޙުގެ ސަރުކާރުގައި ވަނީ މަގޫދޫގައި ތަރައްޤީގެ ގިނަ މަޝްރޫއުތަކެއް ކުރިއަށް ގެންގޮސްފަ އެވެ. އެގޮތުން އެ ރަށުގައި ވަނީ ފެނާއި ނަރުދަމާ ޤާއިމު ކުރުމުގެ މަޝްރޫއު ކުރިއަށް ގެންގޮސްފަ އެވެ. މީގެ އިތުރުން އައުޓް ޑޯ ވޮލީ ކޯޓެއް ޤާއިމު ކުރުމުގެ އިތުރުން، ކުޑަ ކުދިންގެ ޕާކެއް ވެސް ވަނީ ޤާއިމު ކޮށްފަ އެވެ.
މީގެ އިތުރުން މަގޫދޫގައި އެއާޕޯޓެއް ޤާއިމު ކުރުމުގެ މަސައްކަތް ވެސް ވަނީ ފަށައިފަ އެވެ. ރައީސް ޞާލިޙުގެ ވެރިކަން ނިމުނުއިރު، އެ މަޝްރޫއުގެ ބޮޑު އިންސައްތައެއްގެ މަސައްކަތް ނިމިފައިވާއިރު، މި ސަރުކާރާ އެކު އެ މަޝްރޫއު ވަނީ ވަރަށް ބޮޑަށް މަޑު ޖެހިފަ އެވެ.
