ޑުރަގު ވިޔަފާރި ކުރާ މީހުންނަށް މަރުގެ އަދަބު ނުދޭން ނުވަ ޖަމިއްޔާއަކުން ގޮވާލައިފި އެވެ.

މަސްތުވާތަކެތި އެތެރެކޮށް ވިޔަފާރިކުރާ މީހުންނަށް މަރުގެ އަދަބު ދިނުމަށް މަޝްވަރާކުރަން ނިންމެވިކަން ރައީސް ޑރ. މުހައްމަދު މުއިއްޒު އިއުލާންކުރެއްވީ މިދިޔަ މަހުގެ 30 ވަނަ ދުވަހު އެވެ.

ޖަމިއްޔާތަކުން ނެރުނު ޖޮއިންޓް ސްޓޭޓުމެންޓުގައި އެއްވެސް މައްސަލައަކާ ގުޅިގެން މަރުގެ އަދަބު ނުދިނުމަށް ދިވެހި ސަރުކާރަށާއި ރައްޔިތުންގެ މަޖިލީހުގެ މެންބަރުންނަށް ގޮވާލައިފައިވެ އެވެ.

މަސްތުވާތަކެތި އެތެރެ ކުރާ މީހުންނަށް މަރުގެ އަދަބު ދޭން ފެށުމަކީ ރާއްޖެއިން ސޮއިކޮށްފައި އޮންނަ ބައިނަލްއަގުވާމީ އިންސާނީ ހައްގުތަކާ ބެހޭ ގާނޫނުތަކާ ހިލާފު ކަމެއް ކަމަށް ވެސް އެ ބަޔާނުގައި ބުނެފައިވެ އެވެ.

އެގޮތުން ރާއްޖޭގައި މަރުގެ އަދަބު ދޭން ފަށައިފި ނަމަ 2006 ގައި ދިވެހިރާއްޖެއިން ސޮއިކުރި އައިސީސީޕީއާރުގެ ހަވަނަ މާއްދާގައި ބަޔާންކުރާ މަރުގެ އަދަބު އެއްކޮށް އުވައިލުމާ ހިލާފުވާނެކަން އެ ބަޔާނުގައި ފާހަގަކޮށްފައިވެ އެވެ.

ރާއްޖެއިން ސޮއިކޮށްފައި އޮންނަ އެ މުއާހަދާގައި ބަޔާން ކޮށްފައި އޮންނަ ގޮތުން އެ މުއާހަދާގައި ސޮއިކުރާއިރު، އެ ގައުމެއްގައި މަރުގެ އަދަބު ދެމުން ނުދާ ކުށަކަށް އަލުންބަލުން މަރުގެ އަދަބު ދޭން ނުފެށޭނެ އެވެ.

އޭގެއިތުރުން މަސްތުވާތަކެއްޗާ ބެހޭ އަދި ގެ މުއާހަދާތަކުގައި ވެސް މަތުވާތަކެތީގެ މައްސައަކަށް މަރުގެ އަދަބު ދެވޭނެ ހަމައެއް ބަޔާން ކޮށްފައި ނޯންނަކަން އެ ބަޔާނުގައި ފާހަގަ ކޮށްފައިވެ އެވެ.

އެެހެންވެ އެ ނިންމުން ތަންފީޒުކުރަން ފަށަން ކުރަމުންދާ މަސައްކަތްތައް ދިވެހި ސަރުކާރުންނާއި ރައްޔިތުންގެ މަޖިލީހުން ވެސް ހުއްޓާލުމަށް އެ ޖަމިއްޔާތަކުން ގޮވާލި އެވެ.

އެ ބަޔާނުގައި ސޮއި ކޮށްފައި ވަނީ، މޯލްޑިވިއަން ޑިމޮކްރެސީ ނެޓްވޯކް، އެމްނެސްޓީ އިންޓަނޭޝަނަލް، ހިއުމަން ރައިޓްސް ވޮޗް، އިންޓަނޭޝަނަލް ފެޑެރޭޝަން ފޯ ހިއުމަން ރައިޓްސް (އެފްއައިޑީއެޗް)، ވޯލްޑް ކޯލިޝަން އަގެއިންސްޓް ދަ ޑެތު ޕެނެލްޓީ، ހާމް ރިޑަކްޝަން އިންޓަނޭޝަނަލް، ކެޕިޓަލް ޕަނިޝްމެންޓް ޖަސްޓިސް ޕްރޮޖެކްޓު، އެންޓި ޑެތު ޕެނެލްޓީ އޭޝިއާ ނެޓްވޯކް އަދި ދަ އެޑްވޮކޭޓްސް ފޯ ހިއުމަން ރައިޓްސް އެވެ.

ސަރުކާރުގެ ފަރާތުން މަސްތުވާތަކެތީގެ ބިލެއް މަޖިލީހަށް ހުށަހެޅީ މިދިޔަ ޑިސެމްބަރު މަހުގަ އެވެ. އެ ބިލުގައި މަސްތުވާތަކެތި ބޭނުންކުރުމާއި އެތެރެކުރުމާއި ވިޔަފާރިކުރުމަށް ބޮޑެތި އަދަބުތައް ހިމަނާފައިވެ އެވެ. އޭގެ ތެރޭގައި ޖޫރިމަނާ ފަދަ އަދަބުތައް ފާހަގަކޮށްލެވެ އެވެ. އެކަމަކު މަރުގެ އަދަބެއް ބިލު ހުށަހެޅިއިރަކު ނެތެވެ.

ނަމަވެސް ރައީސް މުއިއްޒު މިދިޔަ މަހުގެ 30 ވަނަ ދުވަހު އެކްސްގައި ވިދާޅުވީ މަރުގެ އަދަބު ހިމެނޭހެން ބޮޑެތި އަދަބުތައް ކަނޑައެޅުމަށް ޓަކައި، ރައްޔިތުންގެ މަޖިލީހަށް މިހާރު ހުށަހަޅާފައިވާ ބިލު އިތުރަށް ދިރާސާކުރުމަށް ކަމާ ގުޅޭ އިދާރާތަކުގައި ދަންނަވައިފައިވާ ކަމަށެވެ.