އަމޯރިމްގެ އަމާޒަކީ ހިތްވަރު އެލުވާނުލައި ޔުނައިޓެޑާ އެކު މަސައްކަތް ކުރުން

އޭނާގެ އެންމެ ބޮޑު އަމާޒަކީ ހިތްވަރު އެލުވާނުލައި، މެންޗެސްޓަރ ޔުނައިޓެޑާ އެކު ކުރިއަށް ގޮސް ކާމިޔާބު ތަކެއް ހޯދުން ކަމަށް، އެ ޓީމަށް އިރުޝާދު ދެމުން އަންނަ ޕޯޗުގަލްގެ ރުބެން އަމޯރިމް ބުނެފި އެވެ.

ޔުނައިޓެޑުގެ ކޯޗުކަމާ އަމޯރިމް ހަވާލުވީ 2024 ވަނަ އަހަރުގެ ނޮވެމްބަރު މަހު އެވެ. އެ ކުލަބާ އެކު އަމޯރިމް ތިން އަހަރު ދުވަހުގެ އެއްބަސްވުމެއްގައި ސޮއި ކޮށްފައިވާއިރު، އެ އެއްބަސްވުމުގެ މުއްދަތު ހަމަވާނީ 2027 ވަނަ އަހަރު އެވެ،

އަމޯރިމްގެ އިރުޝާދުގެ ދަށުން މިދިޔަ ސީޒަންގެ ބާކީ އޮތް ތަނުގައި ވެސް ޔުނައިޓެޑުގެ ނަތީޖާތައް ދަށްވުމުގެ ސަބަބުން، އަމޯރިމް އަށް ގިނަ ފާޑު ކިޔުންތަކެއް އަމާޒުވި އެވެ. މިދިޔަ ސީޒަންގެ އިނގިރޭސި ޕްރިމިއާ ލީގު ޔުނައިޓެޑުން ނިންމާލީ ލީގު ތާވަލްގެ 15 ވަނައިގަ އެވެ.

އަމޯރިމްގެ އިރުޝާދުގެ ދަށުން މިދިޔަ ސީޒަންގެ ޔުއެފާ ޔޫރޮޕާ ލީގުގެ ފައިނަލްގައި ވެސް ޔުނައިޓެޑުން ވަނީ ކުޅެފަ އެވެ. ނަމަވެސް ފައިނަލްގައި ޔުނައިޓެޑު ވަނީ ޓޮޓެންހަމް އަތުން ބަލިވެފަ އެވެ.

ޔުނައިޓެޑާ އެކު ކުރިއަށް އޮތް ސީޒަނަށް އަމޯރިމް ތައްޔާރު ވަމުން އަންނައިރު، އޭނާ ބުނީ މިދިޔަ ސީޒަންގައި ކުރެވުނީ އެންމެ ފުރިހަމަ މަސައްކަތް ނޫން ކަމަށާއި، އެއީ އެންމެ ފުރިހަމަ ނަތީޖާއެއް ވެސް ނޫން ކަމަށެވެ. އެހެން ނަމަވެސް، ކުރަމުން އަންނަ މަސައްކަތާ މެދު ފުރިހަމަ އިތުބާރާއި ޔަގީންކަން އޮންނަން ޖެހޭ ކަމަށް އަމޯރިމްް ބުންޏެވެ.

މުސްތަޤުބަލާ ގުޅޭ ގޮތުން ވާހަކަ ދައްކަމުން އަމޯރިމް ބުނީ، އޭނާ ބޭނުން ވަނީ ގިނަ މަސައްކަތް ތަކެއް ކުރަން ކަމަށާއި، ޔުނައިޓެޑަށް ކާމިޔާބު ތަކެއް ހޯދަން އޭނާ ބޭނުންވާ ކަމަށެވެ. އަމޯރިމް ބުނީ އޭނާ ބޭނުން ވަނީ، ޔުނައިޓެޑުގައި 20 އަހަރު ވަންދެން މަސައްކަތް ކުރަން ކަމަށެވެ.

އިތުރަށް ވާހަކަ ދައްކަމުން އަމޯރިމް ބުނީ އޭނާގެ އަމިއްލަ ނަފުސަށް ވެސް އިތުބާރު އޮންނަ ކަމަށާއި، އޭނާ އަށް މިވަގުތު އޮތީ ވަރަށް ބޮޑު ޒިންމާއެއް، އަދި މަސްއޫލިއްޔަތެއް ކަމަށް އަމޯރިމް ބުނެފައިވެ އެވެ. އަމޯރިމް ބުނީ އަބަދު ވެސް ވިސްނަން ޖެހޭނީ ކުރިއަށް ދާން ކަމަށާއި، މިހާރު ކުރާ މަސައްކަތުން ރަނގަޅު މިސްރާބެއްގައި ކުރިއަށް ދެވޭނެ ކަމަށް އަމޯރިމް ބުންޏެވެ.

މިދިޔަ ސީޒަންގައި ގާތް ގާތުގައި ގިނަ ބަލިތަކަކާ ކުރިމަތިލާން ޖެހުމުގެ ސަބަބުން އަމާޒުވަމުން އައި ފާޑު ކިޔުންތަކާ ގުޅޭ ގޮތުން ސުވާލު ކުރުމުން އަމޯރިމް ބުނީ، އަބަދު ވެސް އެކަމުގެ ހިތްދަތިކަން ތަހަންމަލު ކުރަން ޖެހޭ ކަމަށެވެ. ޚާއްސަކޮށް ކޮންމެ މެޗެއް ވެސް ނިންމުމަށް ފަހު، ބައްޔާ އެކު ގެޔަށް ދަނީ ވެސް ބޮޑު ހިތްދަތި ކަމެއްގައި ހުރެ ކަމަށް އަމޯރިމް ބުންޏެވެ.

މީގެ އިތުރުން އަމޯރިމް ބުނީ މެޗުތަކަށް ނިކުންނައިރު ވެސް، ޓީމު އޮންނަ ޙާލަތާ މެދު ކަންބޮޑުވެ، ހިތްދަތިކަން ވެސް އޮންނަ ކަމަށެވެ. ޚާއްސަކޮށް ގާތް ގާތުގައި ގިނަ ބަލި ތަކަކާ ކުރިމަތިލާން ޖެހުމުން، ޓީމަށް މެޗުތަކުގައި ވާދަވެރި ކުޅުމެއް ނުދެއްކި ދާނެ ކަމުގެ ކަންބޮޑުވުމާއި ބިރު އޮންނަ ކަމަށް ވެސް އަމޯރިމް ބުނެފައިވެ އެވެ.

އަމޯރިންގެ އިރުޝާދުގެ ދަށުން މިހާތަނަށް ޔުނައިޓެޑުން ވަނީ 42 މެޗު ކުޅެފަ އެވެ. އޭގެ ތެރެއިން އެ ޓީމު ވަނީ 16 މެޗުން މޮޅުވެފަ އެވެ. 10 މެޗު އެއްވަރުވެފައި ވާއިރު، 16 މެޗަކުން ވަނީ ބަލިވެފަ އެވެ.