މެންޗެސްޓަރ ޔުނައިޓެޑަށް ކުޅެމުން އަންނަ އިންގްލެންޑުގެ ޑިފެންޑަރު ހެރީ މެގުއާގެ އެއްބަސްވުން އައު ކުރަން، އެ ކުލަބުން މަޝްވަރާ ކުރަމުން އަންނަ ކަމަށް މީޑިއާ ރިޕޯޓުތައް ބުނެފި އެވެ.

އުމުރުން 32 އަހަރުގެ މެގުއާ، ލެސްޓަރ ސިޓީ ދޫކޮށް ޔުނައިޓެޑަށް ބަދަލުވީ 2019 ވަނަ އަހަރު އެވެ. އެ ކުލަބާ އެކު އޭނާ އެންމެ ފުރަތަމަ ސޮއި ކުރީ ހަ އަހަރު ދުވަހުގެ އެއްބަސްވުމެއްގަ އެވެ. އެހެން ނަމަވެސް، 2025 ވަނަ އަހަރު އޭނާ ވަނީ އިތުރު އެއް އަހަރަށް އެއްބަސްވުން އައު ކޮށްފަ އެވެ. އެންމެ ފަހުން ޔުނައިޓެޑާ އެކު މެގުއާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2026 ވަަނަ އަހަރު އެވެ.

މެގުއާގެ އެއްބަސްވުމުގައި ބާކީ އެއް އަހަރު އޮތް އިރު، ބައެއް ކުލަބު ތަކުން އޭނާ ހޯދުމުގެ ޝައުޤުވެރިކަން ގެންގުޅުނު ކަމަށް ރިޕޯޓު ތަކުގައި ވަނީ ބުނެފަ އެވެ. އެގޮތުން މެގުއާ ހޯދުމަށް، ފަސް ކުލަބަކުން ޝައުޤުވެރިކަން ފާޅު ކޮށްފައިވާ ކަމަށް ބުނެފައިވެ އެވެ. ނަަމަވެސް ޔުނައިޓެޑުން އެ ހުށަހެޅުންތައް ޤަބޫލު ނުކުރަން ނިންމާފައިވާ ކަމަށާއި، އެ ކުލަބުން ބޭނުން ވަނީ މެގުއާ ބަހައްޓަން ކަމަށް ވެސް ބުނެފައިވެ އެވެ.

މެގުއާ ހޯދުމަށް ޝައުޤުވެރިކަން ފާޅު ކުރި ކުލަބު ތަކުގެ ތެރޭގައި އިޓަލީގެ ބައެއް ކުލަބުތައް ހިމެނޭ ކަމަށް ބުނެފައިވެ އެވެ. އެގޮތުން ނަޕޯލީގެ އިތުރުން، ފެނާބާޗޭ އަދި ބެސިކްޓާސް، މޮނާކޯ އަދި މާސޭ އިން މެގުއާ ހޯދުމަށް މަސައްކަތް ކޮށްފައިވާ ކަމަށް ބުނެފައިވެ އެވެ. ނަމަވެސް އެ ހުރިހާ ހުށަހެޅުމެއް ވެސް ޤަބޫލު ނުކުރަން ޔުނައިޓެޑުން ނިންމާފައިވާ ކަމަށް ރިޕޯޓު ތަކުގައި ބުނެފައިވެ އެވެ.

ދުނިޔޭގެ އެންމެ އަގު ބޮޑު ޑިފެންޑަރުގެ ގޮތުގައި މެގުއާ ޔުނައިޓެޑަށް ބަދަލުވެފައިވާއިރު، 2020 ވަނަ އަހަރު މެގުއާ އަށް ވަނީ ޔުނައިޓެޑުގެ ކެޕްޓަންކަން ދީފަ އެވެ. މެގުއާ އަށް ޔުނައިޓެޑުގެ ކެޕްޓަން ބޭންޑު ދީފައި ވަނީ އޭރު ޔުނައިޓެޑުގެ ކޯޗަކަށް ހުރި އޮލެ ގުނަ ސޯލްޝެއާ އެވެ.

ނަމަވެސް ޔުނައިޓެޑުގައި މެގުއާގެ ކުޅުން ދަށްވެ، އޭނާ އަށް ގިނަ ފާޑު ކިޔުންތަކެއް ވެސް އަމާޒުވަމުން އައި ދަނޑިވަޅެއްގައި އޭނާ އަތުން ވަނީ ޔުނައިޓެޑުގެ ކެޕްޓަން ބޭންޑު ނަގައިފަ އެވެ. 2023 ވަނަ އަހަރު ޔުނައިޓެޑުގެ ކެޕްޓަން ބޭންޑު މެގުއާ އަތުން ނެގީ އޭރު އެ ޓީމުގެ ކޯޗަކަށް ހުރި އެރިކް ޓެން ހާގް އެވެ. މެގުއާ އަތުން ކެޕްޓަން ބޭންޑު އަތުލުމަށް ފަހު، ޔުނައިޓެޑުގެ ކެޕްޓަނަކަށް ހަމަޖެއްސީ ބްރޫނޯ ފެނާންޑޭސް އެވެ.

އޭގެ ފަހުން މެގުއާ ޔުނައިޓެޑު ދޫކޮށްލާނެ ކަމުގެ ވާހަކަ ތަކެއް ވެސް ވަނީ ފެތުރިފަ އެވެ. ނަަމަވެސް ފަހުން އޭނާ ވަނީ ކުލަބުގައި މަޑު ކުރަން ނިންމައިފަ އެވެ. ނަމަވެސް އޭގެ ފަހުން ޔުނައިޓެޑުގެ ކޯޗު ކަމާ ހަވާލުވި ރުބެން އަމޯރިމްގެ އިރުޝާދުގެ ދަށުން މެގުއާ އަށް ފުރުސަތު ދެމުން އައިއިރު، އޭނާ ވަނީ ބައެއް މެޗުތަކުން ޔުނައިޓެޑު މޮޅު ކޮށްދިނުމުގައި އިސް ދައުރެއް އަދާ ކޮށްފަ އެވެ.

މެގުއާ ވަނީ މިހާތަނަށް ޔުނައިޓެޑަށް ކުޅެދިން 246 މެޗުގައި 15 ލަނޑު ޖަހައިފަ އެވެ. އެ ކުލަބާ އެކު އޭނާ ވަނީ ކަރަބޯ ކަޕެއް ކާމިޔާބު ކޮށްފަ އެވެ. އޭގެ އިތުރުން، އެފްއޭ ކަޕްގެ ފައިނަލް އަދި ޔުއެފާ ޔޫރޮޕާ ލީގުގެ ފައިނަލް ގައި ދެ ފަހަރު ވަނީ ކުޅެފަ އެވެ.