އިނގިރޭސި ޕްރިމިއާ ލީގުގައި ބާންލީއާ ދެކޮޅަށް ކުޅުނު މެޗުން މޮޅުވެ، މެންޗެސްޓަރ ޔުނައިޓެޑުން ހަމަ ޖެހުމެއް ހޯދައިފި އެވެ.

ޔުނައިޓެޑުގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 3-2 އިންނެވެ. މެޗުގައި ދެ ފަހަރެއްގެ މަތިން ޔުނައިޓެޑުން ލީޑު ނެގިއިރު ވެސް، ބާންލީ އިން ނަތީޖާ ހަމަހަމަ ކުރި އެވެ. ނަމަވެސް މެޗުގެ ފަހު ވަގުތު ލަނޑު ޖަހައިގެން ޔުނައިޓެޑު ވަނީ މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ 27 ވަނަ މިނެޓުގައި ޔުނައިޓެޑަށް ލީޑު ލިބުނީ ބާންލީގެ ޖޯޝް ކުލެން އަތުން ބައި ކޮޅަށް ވަތް ލަނޑުންނެވެ. ނަމަވެސް ދެ ވަނަ ހާފުގައި ބާންލީ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. ދެ ވަނަ ހާފު ފަށައިގެން ދިހަ ވަނަ މިނެޓުގައި ބާންލީ އަށް ނަތީޖާ ހަމަހަމަ ކޮށްދިނީ ލައިލް ފޮސްޓާ އެވެ.

އޭގެ ދެ މިނެޓު ފަހުން ޔުނައިޓެޑުން ވަނީ ލަނޑެއް ޖަހައި މެޗުގައި ދެ ވަނަ ފަހަރަށް ލީޑު ހޯދައިފަ އެވެ. ޑިއޭގޯ ޑަލޮޓް ތަނަވަސްކޮށްދިން ފުރުސަތެއްގައި ޔުނައިޓެޑަށް އެ ލަނޑު ޖަހައިދިނީ ބްރަޔާން އެމްބުއޭމޯ އެވެ. ނަމަވެސް، މެޗުގެ 66 ވަނަ މިނެޓުގައި ބާންލީ އިން ދެ ވަނަ ލަނޑެއް ޖަހައި އަނެއްކާ ވެސް ނަތީޖާ ހަމަހަމަ ކުރި އެވެ. އެ ލަނޑު އެ ޓީމަށް ޖަހައިދިނީ ޖޭޑަން އެންތަނީ އެވެ.

އޭގެ ފަހުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ޔުނައިޓެޑުން ތިން ވަނަ ލަނޑެއް ޖަހައިގެން މެޗުން މޮޅުވީ، އެ ޓީމަށް ލިބުނު ޕެނަލްޓީ ކާމިޔާބު ކޮށްގެންނެވެ. ބާންލީގެ އޭރިޔާ ތެރެއިން ޔުނައިޓެޑުގެ ކުޅުންތެރިޔަކަށް ކުރި ފައުލަކާ ގުޅިގެން ލިބުނު އެ ޕެނަލްޓީ ކާމިޔާބު ކުރީ ބްރޫނޯ ފެނާންޑޭސް އެވެ.

މިއީ އައު ސީޒަންގެ ޕްރިމިއާ ލީގުގައި ޔުނައިޓެޑަށް ލިބުނު ފުރަތަމަ މޮޅެވެ. ފުރަތަމަ މެޗުގައި އާސެނަލް އަތުން ޔުނައިޓެޑު ބަލިވެފައިވާއިރު، ދެ ވަނަ މެޗުގައި ވަނީ ފުލަމް އަތުން އެއްވަރުވެފަ އެވެ.

މެޗަށް ފަހު ވާހަކަ ދައްކަމުން ޔުނައިޓެޑުގެ ކޯޗު ރުބެން އަމޯރިމް ބުނެފައި ވަނީ، މެޗުގައި ޔުނައިޓެޑުގެ ކުޅުންތެރިން ކުރި ހިތްވަރާއި މަސައްކަތާ މެދު ހިތްހަމަ ޖެހޭ ކަމަށެވެ. އަަދި ކުޅުންތެރިންގެ ފަރާތުން އެ ފަދަ ހިތްވަރެއް ފެންނަ ކޮންމެ ފަހަރަކު، އެކަމާ އޭނާ ވަރަށް ގަޔާވާ ކަމަށް އަމޯރިމް ބުންޏެވެ.

އިތުރަށް އޭނާ ބުނީ ޔުނައިޓެޑުން ކުޅޭ ކޮންމެ މެޗެއްގައި ވެސް އެވަރަށް ހިތްވަރު ކުރަން ޖެހޭކަން ޤަބޫލު ކުރާ ކަމަށާއި، ރަނގަޅަށް މަސައްކަތް ކޮށްފި ނަަމަ މޮޅުވާނެކަން ޓީމުން ސާބިތު ކޮށްދީފައިވާ ކަމަށެވެ. މެޗު ފަށައިގެން ވެސް ރަނގަޅަށް ކުޅުނު ކަމަަށާއި، ބައެއް ވަގުތު ތަކުގައި އުނދަގޫ ތަކެއް ތަހަންމަލު ކުރަން ޖެހުނު ކަމަށް އަމޯރިމް ފާހަގަ ކުރި އެވެ.

ލީގުގައި ޔުނައިޓެޑަށް ދެން އޮންނާނީ ރަށުން ބޭރުގައި މެންޗެސްޓަރ ސިޓީއާ ދެކޮޅަށް ކުޅޭ މެޗެވެ.