އިނގިރޭސި ޕްރިމިއާ ލީގުގައި އެންމެ ފަހުގެ ޗެމްޕިއަން ލިވަޕޫލްއާ ދެކޮޅަށް ކުޅުނު މެޗުން މެންޗެސްޓަރ ޔުނައިޓެޑު މޮޅުވެއްޖެ އެވެ.

އާދީއްތަ ދުވަހުގެ ރޭ ލިވަޕޫލްގެ އަމިއްލަ ދަނޑު، އެންފީލްޑުގައި ކުޅުނު މެޗުން ޔުނައިޓެޑު މޮޅުވެފައި ވަނީ 2-1 އިންނެވެ. މެޗުގައި ޔުނައިޓެޑުން ލަނޑު ޖަަަހައި ލީޑު ނަގާފައި ވަނިކޮށް، ލިވަޕޫލް އިން ނަތީޖާ ހަމަހަމަ ވެސް ކުރި އެވެ. ނަމަވެސް، ފަހު ވަގުތު ލަނޑު ޖަހައިގެން ޔުނައިޓެޑު ވަނީ ލިވަޕޫލްގެ މައްޗަށް ކުރި ހޯދައިފަ އެވެ.

މެޗު ފަށައިގެން ދެ ވަނަ މިނެޓުގައި ޔުނައިޓެޑުން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ބްރަޔަން އެމްބުއޭމޯ އެވެ. އެއީ އަމަދް ޑިއާލޯ ތަނަވަސްކޮށްދިން ފުރުސަތެއްގައި އެމްބުއޭމޯ ޖެހި ލަނޑެކެވެ.

އޭގެ ފަހުން މެޗުގެ ނަތީޖާ ހަމަހަމަ ކުރުމަށް ލިވަޕޫލް އިން ކުރި މަސައްކަތް ކާމިޔާބު ކުރެވުނީ މެޗުގެ ދެ ވަނަ ހާފުގަ އެވެ. މެޗުގެ 78 ވަނަ މިނެޓުގައި ލިވަޕޫލް އަށް ނަތީޖާ ހަމަހަމަ ކޮށްދިނީ ކޯޑީ ގަކްޕޯ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ފެޑެރިކޯ ޗިއެސާ އެވެ.

މެޗުން ޔުނައިޓެޑު މޮޅުވެފައި ވަނީ، މެޗުގެ ފުރިހަމަ ވަގުތު ހަމަވާން ހަ މިނެޓަށް ވެފައި ވަނިކޮށް، އިނގިރޭސި ޑިފެންޑަރު ހެރީ މެގުއާ ޖެހި ލަނޑުންނެވެ. އެއީ ޔުނައިޓެޑުގެ ކެޕްޓަން ބްރޫނޯ ފެނާންޑޭސް ތަނަވަސްކޮށްދިން ފުރުސަތެއްގައި މެގުއާ ޖެހި ލަނޑެކެވެ.

ޔުނައިޓެޑު އަތުން ލިވަޕޫލް ބަލިވެފައިވާއިރު، އެންމެ ފަހުން އެ ޓީމު ކުޅުނު ހަތަރު މެޗުން ވެސް މި ވަނީ ބަލިވެފަ އެވެ. އަނެއްކޮޅުން މިއީ، 2016 ވަނަ އަހަރުގެ ފަހުން އެންފީލްޑުގައި ޔުނައިޓެޑު އަތުން ލިވަޕޫލް ބަލިވީ ފުރަތަމަ ފަހަރެވެ. މިއީ ޔުނައިޓެޑުގެ ކޯޗު ކަމާ ރުބެމް އަމޯރިމް ހަވާލުވީ ފަހުން، ޖެހި ޖެހިގެން ދެ މެޗުން މޮޅުވީ ފުރަތަމަ ފަހަރެވެ.

މޮޅާއެކު ޔުނައިޓެޑު އޮތީ ލީގު ތާވަލްގެ ނުވަ ވަނައިގަ އެވެ. މިހާތަނަށް ކުޅެފައިވާ އަށް މެޗުން އެ ޓީމަށް ލިބެނީ 13 ޕޮއިންޓެވެ. ހަތަރު މެޗުން ޔުނައިޓެޑު މޮޅުވެފައިވާއިރު، ތިން މެޗުން ވަނީ ބަލިވެފަ އެވެ. އަނެއް މެޗުން ވަނީ އެއްވަރުވެފަ އެވެ.

ޔުނައިޓެޑު އަތުން ބަލިވެ ލިވަޕޫލް އޮތީ ލީގު ތާވަލްގެ ހަތަރު ވަނައިގަ އެވެ. އެއީ އެ ޓީމު ކުޅެފައިވާ އަށް މެޗުން 15 ޕޮއިންޓާ އެކު އެވެ. ފަސް މެޗުން ލިވަޕޫލް މޮޅުވެފައިވާއިރު، ޔުނައިޓެޑު އަތުން ވީ ބައްޔަކީ މި ސީޒަންގެ ލީގުގައި ލިވަޕޫލްގެ ތިން ވަނަ ބައްޔެވެ.