އިނގިރޭސި ޕްރިމިއާ ލީގުގައި ބްރެންޓްފޯޑާ ދެކޮޅަށް ކުޅުނު މެޗުން ބަލިވެ، މެންޗެސްޓަރ ޔުނައިޓެޑަށް ޕްރެޝަރު ބޮޑުވެއްޖެ އެވެ.

ބްރެންޓްފޯޑުގެ އަމިއްލަ ދަނޑުގައި ކުޅުނު މެޗުގައި އެ ޓީމުން ވަނީ 3-1 އިން ޔުނައިޓެޑުގެ މައްޗަށް ކުރި ހޯދައިފަ އެވެ. މެޗުގެ ފުރަތަމަ ހާފުގައި ބްރެންޓްފޯޑް އިން ދެ ލަނޑު ޖެހިއިރު، ޔުނައިޓެޑުން އެއް ލަނޑު ޖެހި އެވެ. ބްރެންޓްފޯޑުގެ ތިން ވަނަ ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗު ފަށައިގެން ނުވަ ވަނަ މިނެޓުގައި ބްރެންޓްފޯޑަށް ލަނޑު ޖަހައި ލީޑު ނަަގައިދިނީ އިގޯ ތިއާގޯ އެވެ. އެއީ ޖޯޑަން ހެންޑަަސަން ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ފަހުން މެޗުގެ 20 ވަނަ މިނެޓުގައި ތިއާގޯ ވަނީ ދެ ވަނަ ލަނޑެއް ޖަހައި ބްރެންޓްފޯޑަށް ލީޑު ފުޅާ ކޮށްދީފަ އެވެ.

ބްރެންޓްފޯޑް އިން ދެ ވަނަ ލަނޑު ޖެހިތާ ހަ މިނެޓު ފަހުން ޔުނައިޓެޑުން ވަނީ ފުރަތަމަ ލަނޑު ޖަހައި ފަރަގު ކުޑަ ކޮށްފަ އެވެ. އެ ލަނޑު ޔުނައިޓެޑަށް ޖަހައިދިނީ ބެންޖަމިން ސެސްކޯ އެވެ. މެޗުގެ ދެ ވަނަ ހާފުގައި ޔުނައިޓެޑަށް ނަތީޖާ ހަމަހަމަ ކޮށްދޭން ލިބުނު ފުރުސަތުގައި ބްރޫނޯ ފެނާންޑޭސް ޖެހި ޕެނަލްޓީ ކާމިޔާބެއް ނުވި އެވެ.

މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ބްރެންޓްފޯޑުގެ ތިން ވަނަ ލަނޑު ޖެހީ މަތިއަސް ޖެންސެން އެވެ. މެޗުގައި އޭނާ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގަ އެވެ.

މި ސީޒަންގެ ޕްރިމިއާ ލީގުގައި ޔުނައިޓެޑުން މިހާތަނަށް ހަ މެޗު ކުޅެފައިވާއިރު، މޮޅުވެފައި ވަނީ ދެ މެޗުންނެވެ. ތިން މެޗުން ބަލިވެފައިވާއިރު، އެއް މެޗުން ވަނީ އެއްވަރުވެފަ އެވެ. ހަ މެޗުން ހަތް ޕޮއިންޓާ އެކު ޔުނައިޓެޑު އޮތީ 14 ވަނައިގަ އެވެ. ޔުނައިޓެޑުގެ ނަތީޖާތައް ދަށްވަމުން އަންނާތީ އެ ޓީމުގެ ކޯޗު ރުބެން އަމޯރިމް އަށް އަންނަނީ ޕްރެޝަރު ބޮޑު ވަމުންނެވެ.