ޓޮޓެންހަމް ދޫކޮށްލަން ނިންމާފައިވާކަން ދާދި ފަހުން އިއުލާން ކުރި ސައުތު ކޮރެއާގެ ސޮން ހެއުން މިން، އެމެރިކާ ލީގުގެ ލޮސް އެންޖަލަސް އަށް ބަދަލުވާން އެއްބަސްވެފައިވާ ކަމަށް މީޑިއާ ރިޕޯޓުތައް ބުނެފި އެވެ.

އުމުރުން 33 އަހަރުގެ ކުޅުންތެރިޔާ، ބަޔާ ލެވަކޫސަން ދޫކޮށްލުމަށް ފަހު ސޮން ޓޮޓެންހަމް އަށް ބަދަލުވީ 2015 ވަނަ އަހަރު އެވެ. އެ ކުލަބާ އެކު އެންމެ ފަހުން ސޮން ސޮއި ކޮށްފައިވާ އެއްބަސްވުމުގެ މުއްދަތު ހަމަވާން އޮތީ 2026 ވަނަ އަހަރު އެވެ.

ނަމަވެސް، އެއްބަސްވުމުގައި ބާކީ އެއް އަހަރު އޮއްވައި ސޮން ވަނީ ޓޮޓެންހަމް ދޫކޮށްލަން ނިންމައިފަ އެވެ. 10 އަހަރަށް ފަހު ޓޮޓެންހަމް ދޫކޮށްލަން ސޮން ނިންމާފައި ވަނީ، ކެރިއަރުގައި އައު ޗެލެންޖެއް ބޭނުންވާ ކަމަށް ބުނެ އެވެ.

ޓޮޓެންހަމްގައި ސޮންގެ އެންމެ ފަހު މެޗަކީ އާދިއްތަ ދުވަހު ނިއުކާސަލް ޔުނައިޓެޑާ ދެކޮޅަށް އެ ޓީމުން ކުޅުނު ރަޙުމަތްތެރި ކަމުގެ މެޗެވެ. އެ މެޗުގައި ސޮން ކުޅެފައިވާއިރު، އެ މެޗަށް ފަހު ޓޮޓެންހަމްގެ ކުޅުންތެރިން ވަނީ ސޮން އަށް އަލް ވަދާއު ކިޔުން ކުރިއަށް ގެންގޮސްފަ އެވެ.

މީޑިއާ ތަކުގައި ބުނެފައިވާ ގޮތުން ލޮސް އެންޖަލަސް އިން ވަނީ ސޮން ހޯދުމަށް އޭނާ އާއެކު މަޝްވަރާތައް ކުރިއަށް ގެންގޮސްފަ އެވެ. އަދި އެ ކުލަބުން ވަނީ ސޮން އަށް ހުށަހެޅުމެއް ހުށަހަޅާފައި ކަމަށާއި، އެ ކުލަބަށް ބަދަލުވާން ސޮން އަނގަ ބަހުން އެއްބަސްވެފައިވާ ކަމަށް ވެސް މީޑިއާ ތަކުގައި ވަނީ ބުނެފަ އެވެ.

ޓޮޓެންހަމްގެ އެއްބަސްވުމުގައި ބާކީ އެއް އަހަރު އޮއްވައި ސޮން އެ ކުލަބު ދޫކޮށްލަން ނިންމާފައިވާއިރު، އޭނާ ހޯދުމަށް ލޮސް އެންޖަލަސް އިން ޓޮޓެންހަމް އަށް 15 މިލިއަން ޔޫރޯގެ އަދަދެއް ދައްކާނެ ކަމަށް ވެސް މީޑިއާ ތަކުގައި ވަނީ ބުނެފަ އެވެ.

މީގެ އިތުރުން، މިވަގުތު ކުރިއަށް ދަނީ ސޮން ލޮސް އެންޖަލަސް އަށް ބަދަލުވުމަށް ފުރިހަމަ ކުރަން ޖެހޭ ކަންކަން ފުރިހަމަ ކުރުމުގެ މަސައްކަތް ކަމަށް ވެސް ބުނެފައިވެ އެވެ. އަދި ސޮން ހުރީ ހުރިހާ ކަމެއް ފުރިހަމަ ވުމާ އެކު، ލޮސް އެންޖަލަސްގެ އެއްބަސްވުމުގައި ސޮއި ކުރަން ތައްޔާރަށް ކަމަށް ވެސް ބުނެފައިވެ އެވެ.

ޓޮޓެންހަމްގައި ސޮން ހޭދަ ކުރި 10 ސީޒަންގެ ތެރޭގައި އޭނާ ވަނީ އެ ކުލަބަށް 454 މެޗު ކުޅެދީ 173 ލަނޑު ޖަހައިފަ އެވެ. މީގެ އިތުރުން ޓޮޓެންހަމާ އެކު އޭނާ ވަނީ ޔުއެފާ ޔޫރޮޕާ ލީގު ކާމިޔާބު ކޮށްފަ އެވެ. އޭގެ އިތުރުން ޔުއެފާ ޗެމްޕިއަންސް ލީގުގެ ފައިނަލް އަދި ކަރަބޯ ކަޕްގެ ފައިނަލްގައި ވެސް ކުޅެފައިވެ އެވެ.

ލޮސް އެންޖަލަސް އަށް ބަދަލުވާން ސޮން އެއްބަސްވެފައިވާއިރު، އޭނާ ހޯދުމަށް ސައުދީ ޕްރޯ ލީގުގެ ބައެއް ކުލަބުތަކުން ވެސް ޝައުޤުވެރިކަން ގެންގުޅު ކަމަށް ވަނީ ބުނެފަ އެވެ.