އެމެރިކާގައި އީރާާން އަށް ތާއީދުކޮށް ބޭއްވި އެއްވުމެއްގެ ތެރެއަށް ވެހިކަލެއް ވަނުމުން، ޑްރައިވަރަށް ހަމަލާ ދޭން މަސައްކަތް ކޮށްފި
އޭބީސީ7 ނޫހުން ނަގާފައިވާ ހެލިކޮޕްޓަރުގެ މަންޒަރު ތަކުން ފެންނަ ގޮތުގައި، އެއްވުމުގެ ބައިވެރިން އެ ވެހިކަލްއާ ދިމާލަށް ދުވެފައިދޭ. އެއަށް ފަހު ވެހިކަލް ދުއްވަން އިން މީހާ އަށް ހަމަލާ ދިނުމަށް މަސައްކަތް ކޮށްފައިވޭ. އެގޮތުން ވެހިކަލް ދުއްވަން އޭނާ އިން ދިމާލުން ދިދަތައް ވައްދަން މަސައްކަތްކޮށް، ހަމަލާ ދޭން އުޅެފައިވޭ.
އެއްވުމުގެ ތެރެއަށް ވަދެ ގަތް ވެހިކަލް ފުލުހުން ހުއްޓުވާފައި | ރޮއިޓަސް
އީރާންގެ ރައްޔިތުންނަށް ތާއީދުކޮށް އެމެރިކާގެ ލޮސް އެންޖަލިސްގައި ކުރިއަށް ގެންދިޔަ އެއްވުމެއްގެ ތެރެއަށް ވެހިކަލެއް ވަދެ ގަތުމުން، ވެހިކަލް ދުއްވަން އިން މީހާ އަށް ހަމަލާ ދިނުމަށް އެއްވުމުގެ ބައިވެރިން މަސައްކަތް ކޮށްފި އެވެ.
ލޮސް އެންޖަލިސްގެ ފުލުހުން ބުނީ އެ ހާދިސާ ހިނގާފައި ވަނީ އާދީއްތަ ދުވަހު ކަމަށެވެ. ފުލުހުން ބުނީ އެއްވުމާ ތަން ކޮޅެއް ދުރުން އެ ވެހިކަލް ހިފެހެއްޓީ ކުޑަ ދޮރު އަދި އަރި މަތީގައި ހުރި ލޯގަނޑުތައް ތަޅާލައިގެން ކަމަށެވެ. ފުލުހުންގެ ކާރު ތަކުން ވަނީ އެ ވެހިކަލް ވަށާލައި، ހުއްޓުވައިފަ އެވެ.
އޭބީސީ7 ނޫހުން ނަގާފައިވާ ހެލިކޮޕްޓަރުގެ މަންޒަރު ތަކުން ފެންނަ ގޮތުގައި، އެއްވުމުގެ ބައިވެރިން އެ ވެހިކަލްއާ ދިމާލަށް ދުވެފައިދެ އެވެ. އެއަށް ފަހު ވެހިކަލް ދުއްވަން އިން މީހާ އަށް ހަމަލާ ދިނުމަށް މަސައްކަތް ކޮށްފައިވެ އެވެ. އެގޮތުން ވެހިކަލް ދުއްވަން އޭނާ އިން ދިމާލުން ދިދަތައް ވައްދަން މަސައްކަތްކޮށް، ހަމަލާ ދޭން އުޅެފައިވެ އެވެ. ނަމަވެސް ފުލުހުން ވަނީ އެއްވުމުގެ އެ ބައިވެރިން ހުއްޓުވައިފަ އެވެ.
ފުލުހުން ބުނެފައި ވަނީ އެ ވެހިކަލް ދުއްވަން އިން މީހާ ހައްޔަރު ކޮށްފައިވާ ކަމަށާއި، އެ މައްސަލައިގެ އިތުރު ތަހުގީގު ކުރިއަށް ގެންދަމުން އަންނަ ކަމަށެވެ. ނަމަވެސް، އެ މީހާގެ ނަމާއި، އިތުރު މައުލޫމާތެއް ފުލުހުން ހާމަ ކޮށްފައި ނުވެ އެވެ.
ފުލުހުންގެ ބަޔާނުގައި ބުނެފައި ވަނީ ވެހިކަލް ޖެހުމުގެ ސަބަބުން އެކަަކަށް އަނިޔާވެފައިވާ ކަމަށާއި، ނަމަވެސް އެއްވެސް މީހަކަށް ސީރިއަސް އަނިޔާއެއް ލިބިފައި ނުވާ ކަމަށެވެ. ދެ މީހަކަށް އަވަސް ފަރުވާ ދޭ ފަރާތްތަކުން އެހީތެރިކަންފ ފޯރުކޮށްދީފައިވާއިރު، ފަރުވާ ހޯދުމަށް އެ ދެ މީހުން ވެސް ދެކޮޅު ހެދި ކަމަށް ލޮސް އެންޖަލިސްގެ ފަޔާ ޑިޕާޓްމަންޓް އިން ބުނެފައިވެ އެވެ.
އާދީއްތަ ދުވަހުގެ މެންދުރު ގިނަ އަދަދެއްގެ ބަޔަކު ވަނީ ދިދަ ހިފައިގެން ލޮސް އެންޖަލިސްގެ ވެސްޓްވުޑް ސަރަހައްދުގެ ވެޓެރަން އެވެނިއު ކައިރީގައި އަޑު އުފުލައިފަ އެވެ. އެއްވުމާ ދެކޮޅަށް ފުލުހުން ވަނީ އެ ސަރަހައްދު ހުސް ކުރުމުގެ އަމުރެއް ވެސް ނެރެފަ އެވެ. އޭގެ ފަހުން އެ ދުވަހުގެ ހަވީރު ފަހެއް ޖެހިއިރު، އެ ސަރަހައްދުގައި ތިބީ ވަރަށް މަދު ބަޔަކު ކަމަށް މީޑިއާ ތަކުގައި ބުނެފައިވެ އެވެ.
އީރާން އިން ބޭރުގައި އެންމެ ގިނައިން އެ ޤައުމުގެ ރައްޔިތުން ދިރިއުޅެމުން އަންނަ ސިޓީ އަކީ ލޮސް އެންޖަލިސް އެވެ.
