ސުލްހައިގެ މަޝްވަރާތައް ކުރިއަށް ގެންދަން ޕުޓިން ބޭނުންފުޅުވޭ

ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ހުއްޓާލުމަށް، ސުލްހައިގެ މަޝްވަރާތައް ކުރިއަށް ގެންދިޔުމަށް ރަޝިޔާގެ ރައީސް ވްލަޑިމިއާ ޕުޓިން ތައްޔާރަށް ހުންނެވި ކަމަށް ހާމަ ކުރައްވައިފި އެވެ.

ހުކުރު ދުވަހު ޕުޓިން ވިދާޅުވެފައި ވަނީ ރަޝިޔާ އާއި ޔުކްރެއިންއާ ދެމެދު ސުލްހައިގެ މަޝްވަރާތައް ކުރިއަށް ގެންދެވޭނެ ކަމުގެ އުންމީދުގައި ހުންނެވި ކަމަށެވެ. އެހެން ނަމަވެސް، ރަޝިޔާގެ އެއްވެސް ލަނޑުދަނޑި އަކަށް ނުވަތަ، ޝަރުތަކަށް ބަދަލު ނާންނާނެ ކަމަށް ވެސް ޕުޓިން ވަނީ ވިދާޅުވެފަ އެވެ.

ބެލަރޫސްގެ ރައީސް އަލެކްސެންޑާ ލުކަޝެންކޯއާ އެކު ބޭއްވި ބައްދަލުވުމުގައި ވާހަކަ ދައްކަވަމުން ޕުޓިން ވިދާޅުވެފައި ވަނީ، މަޝްވަރާތައް ކުރިއަށް ގެންދަން ވާނީ އާންމުކޮށް ހުޅުވާލައިގެން ނޫން ކަަމަށެވެ. އަދި މަޝްވަރާތައް ކުރިއަށް ގެންދަން ޖެހޭނީ އަމާން މާހައުލެއްގައި ކަމަށް ވެސް ޕުޓިން ވިދާޅުވެފައިވެ އެވެ.

މީގެ އިތުރުން އެ ބައްދަލުވުމުގައި ވާހަކަ ދައްކަވަމުން ޕުޓިން ވިދާޅުވެފައި ވަނީ، އޯރެޝްނިކް ބެލިސްޓިމް މިސައިލް ސިސްޓަމްގެ ފުރަތަމަ ބެޗު ރަޝިޔާގެ އަސްކަރިއްޔާއާ ހަވާލު ކުރެވިފައިވާ ކަމަށެވެ. އަދި ރަޝިޔާގެ ސިފައިން ޔުކްރެއިންގެ ޑޮންޓްސްކް ސަރަހައްދުގެ ޗަސިޗް ޔާރު ރަށް ކޮންޓްރޯލް ކޮށްފައިވާ ކަމަށް ޕުޓިން ވިދާޅުވި ނަމަވެސް، ޔުކްރެއިން އިން ދަނީ އެކަން ދޮގު ކުރަމުންނެވެ. 

އެކަމާ ގުޅޭ ގޮތުން ޔުކްރެއިންގެ ރައީސް ވުލެޑިމިއަރ ޒެލެންސްކީ ވިދާޅުވީ ޕުޓިންއާ ބައްދަލު ކުރެއްވުމަށް އެމަނިކުފާނު ހުންނެވީ ތައްޔާރަށް ކަމަށެވެ. އަދި މިއީ ހަނގުރާމަ ސުލްހަވެރިކަމާ އެކު ނިންމާލުމަށް އެދި ދެމެހެެއްޓެނިވި އިޚުލާސްތެރި މަސައްކަތެއް ނަމަ، ޔުކްރެއިން އިން އަނެއްކާ ވެސް ޔަގީން ކޮށްދެނީ ކޮންމެ ވަގުތެއްގައި ވެސް އިސްވެރިންގެ ފެންވަރުގައި ބައްދަލު ކުރުމަށް ތައްޔާރަށް ތިބިކަން ކަމަށް ޒެލެންސްކީ ވިދާޅުވި އެވެ. 

ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ހުއްޓާލުމަށް ރަޝިޔާ އިން ވަނީ ވަކި ޝަރުތުތަކެއް ކަނޑައަޅައިފަ އެވެ. އެގޮތުން ޔުކްރެއިން އިން އެ ޤައުމުގެ ބައެއް ދޫކޮށްލުމާއި، ޤައުމުތަކުން ޔުކްރެއިން އަށް ދެމުން އަންނަ އަސްކަރީ އެހީތެރިކަން ހުއްޓާލުމަށް ވެސް ޝަރުތު ކޮށްފައިވެ އެވެ. ނަމަވެސް ޔުކްރެއިން އިން އަންނަނީ އެކަމާ ދެކޮޅު ހަދަމުންނެވެ.

ޔުކްރެއިން އިން ބުނަމުން އަންނަނީ ހަނގުރާމަ ހުއްޓާލަން ވާނީ އެއްވެސް ޝަރުތެއް ނެތި ކަމަށެވެ.