މި ސަރުކާރުގެ ސިޔާސީ މަޤާމެއްގައި ދާދި ފަހަކާއި ޖެހެންދެން ހުންނެވި މުހައްމަދު ޝަހީދު ހައި ކޯޓުގެ ފަނޑިޔާރު ކަމަށް އައްޔަންކުރަން ނިންމާފައިވާތީ އެކަން ހުއްޓުވަން ސިވިލް ކޯޓަށް މައްސަލަ އެއް ހުށަހަޅައިފިއެވެ.

އެ މައްސަލަ ހުށަހަޅާފައި ވަނީ ބުރާސްފަތި ދުވަހުއެވެ. އޭނާ ހުންނެވީ ހޯމް މިނިސްޓްރީގެ ޑެޕިއުޓީ މިނިސްޓަރުގެ މަޤާމުގައެވެ.

ޝަހީދު، ހައި ކޯޓަށް އައްޔަންކުރުން ހުއްޓުވުމަށް މައްސަލަ ހުށަހަޅުއްވާފައި ވަނީ އެ ކޯޓުގެ ފަނޑިޔާރު ކަމަށް ވެސް ކުރިމަތިލެއްވި ބޭފުޅެއްކަމަށްވާ ވަކީލް އަހުމަދު ނައުޝާދެވެ. ނައުޝާދު ވަނީ މި މައްސަލަ ނިމެންދެން އެކަން ހުއްޓުވުމުގެ ވަގުތީ އަމުރަކަށް އެދިވަޑައިގަންނަވާފައެވެ.

ހައި ކޯޓުގައި ހުސްވެފައިވާ ދެ ފަނޑިޔާރުގެ މަގާމަށް ޕީއެންސީގެ އެކްޓިވިސްޓެއްގެ ގޮތުގައި ހަރަކާތްތެރިވި މީހަކާއި ކުރީގެ ފަނޑިޔާރަކު އައްޔަން ކުރަން ޖުޑީޝަލް ސާވިސް ކޮމިޝަނުން ވަނީ ނިންމާފައެވެ.

ޖޭއެސްސީ އިން ބުނިގޮތުގައި ހައި ކޯޓަށް އައްޔަން ކުރަން ނިންމާފައި ވަނީ، ޏ. ފުވައްމުލައް ދޫޑިގަން، ގޯލްޑަންގޭޓް، މުހައްމަދު ޝަހީދު އާއި ލ. މާވަށް ނަލަމަލަ، އަބްދުﷲ ޖަމީލް މޫސާއެވެ. ޝަހީދު އަދި ޖަމީލް ހައި ކޯޓަށް އައްޔަން ކުރަން ފާސް ކުރީ ޖޭއެސްސީ އިން ބުދަ ދުވަހުގެ ރޭ ބޭއްވި ބައްދަލުވުމެއްގައި ކަމަށް އެ ކޮމިޝަނުން ބުނެ އެވެ. ނަމަވެސް ބައްދަލުވުމާއި ވޯޓުގެ ތަފުސީލް ހާމަކޮށްފަ އެއް ނުވެއެވެ.

އޭގެ ތެރެއިން ޝަހީދަކީ މިދިޔަ ރިޔާސީ އިންތިހާބު އަދި އޭގެ ފަހުން އޮތް މަޖިލިސް އިންތިހާބުގައިވެސް ރައީސް ޑރ.މުހައްމަދު މުއިއްޒަު އާއި ޕީއެންސީ ދިފާއުކުރަން ފާޅުގައި މަސައްކަތް ކުރައްވާފައިވާ ބޭފުޅެކެވެ. މީގެ އިތުރުންވެރިކަން ކުރާ ޕީއެންސީގެ އެކި ޕޯޑިއަމް ތަކުގައި އަދި ޕީއެންސީގެ އެހެން ޕްލެޓްފޯމްތަކުގައި ވެސް އޭނާ ވަނީ ވާހަކަދައްކަވާފައެވެ.