ގެދޮރުވެރިޔާ ސްކީމުގެ ދަށުން ދޫކުރާ ފްލެޓް ތަކަށް ރަށްވެހިންގެ ރަޖިސްޓަރީ ހަދާ ނުދޭނެ!
ގެދޮރުވެރިޔާ ސްކީމުގެ ދަށުން ފްލެޓް ދޫކުރަނީ ކުލީގެ އެއްބަސްވުމެއްގެ ދަށުން ކަމަށްވާތީ ރަށްވެހިންގެ ރަޖިސްޓަރީ ނުދޭނެކަމަށް ސިޓީ ކައުންސިލުން މަޢުލޫމާތު ދީފި
ގެދޮރުވެރިޔާގެ ސްކީމުގެ ދަށުން ރައީސް ސާލިހް ސަރުކާރުން އަޅާފައިވާ ފްލެޓުތައް
ގެދޮރުވެރިޔާ ސްކީމުގެ ދަށުން ރައީސް މުއިއްޒުގެ ސަރުކާރުން ފްލެޓް ދޫކުރަނީ ކުލީގެ އެއްބަސްވުމެއްގެ ދަށުން ކަމަށް ވާތީ ރަށްވެހިންގެ ރަޖިސްޓަރީ އެ ފްލެޓްތަކަށް ހަދައި ނުދޭނެ ކަމަށް ސިޓީ ކައުންސިލުން މައުލޫމާތު ދީފައިވާ ކަމަށް ފަަހި ޔޫނިއަން އަށް މައުލޫމާތު ދީފި އެވެ.
އެ ޔޫނިއަން އިން ބުނީ މިއީ މިހާތަނަށް ރާއްޖޭގެ ތާރީޚު ގައި ސޯޝަލް ހައުސިންގ ގެ ގޮތުގައި ދޫކުރި އެއްވެސް ބޯ ހިޔާވަހި ކަމަކަށް ދިމާވި ހާލަތެއް ނޫން ކަމުގައެވެ.
އެއީ މިހާތަނަށް ސޯޝަލް ހައުސިންގ ގެ ގޮތުގައި މުޅިން ވެސް ހަދާފައި ވަނީ ގަނެ ވިއްކުމުގެ އެއްބަސްވުން ތައް ކަމަށް ވާތީ ކަމަށް ވެސް ފަހި ޔޫނިއަން އިން ބުނެއެވެ.
މި ސަރުކާރުން ގެދޮރުވެރިޔާ ސްކީމު ގެ ދަށުން ފުލެޓް ދޫކުރާ ފަރާތާއި ފްލެޓް ލިބޭ ފަރާތާ ދެމެދުގައި ސޮއި ކުރަމުން ދަނީ "ޔުނިޓް ކުއްޔަށް ދިނުމާއި މިލްކު ކުރުމުގެ އެއްބަސްވުމެއް" ގައެވެ.
މިހާތަނަށް ރާއްޖޭގައި ދޫކުރެވިފައިވާ ހައުސިން ސްކީމްތަކަކީ ސޯޝަލް ހައުސިން ޔުނިޓްގެ ގޮތުގައި ދުކުރެވިފައިވާ ބޯހިޔާވަހިކަމުގެ މަޝްރޫޢުތަކެއްގެ ގޮތުގައިކަން ފާހަގަކުރެވޭއިރު، ރާއްޖޭގައި އެންމެފަހުން ދޫކުރެވުނު ސޯޝަލް ހައުސިންގ ސްކީމް ކަމުގައިވާ ހިޔާ މަޝްރޫޢުގެ ދަށުން ފުލެޓް ހަވާލު ކޮށްފައިވާ އުޞޫލަކީ ފުލެޓް އެއްބަސްވުމުގައި ސޮއި ކުރާ ހިސާބުން ފެށިގެން އެއީ އެފަރާތެއްގެ އަމިއްލަ މިލްކެއް ކަމުގައި ހަމަ ޖެހިގެން ދިޔުމެވެ. އަދި މި ފުލެޓްތަކަށް ޑައުންޕޭމަންޓް ދައްކަން ނުޖެހި އެގްރީމަންޓްގައި ސޮއި ކުރާ ހިސާބުން ސަރުކާރުން ވަނީ ފްލެޓް ލިބުނު މީހުންނަށް ތަޅުދަނޑި ހަވާލު ކޮށްފައެވެ.
ހުސްވި އަހަރު ޖެނުއަރީ މަހު އެކްސް ގައި ކުރެއްވި ޕޯސްޓެއް ގައި ގޯއްޗާއި ފްލެޓް ގެ ކަންކަން ވައުދުވީ ގޮތައް ކުރިއަށް ގެންދަވާނެ ކަމަށް ރައީސް މުއިއްޒު ވިދާޅުވިއެވެ.
މުއިއްޒު ވެރިކަމަށް ވަޑައިގަންނަވަން ވެވަޑައިގެންނެވި ވައުދު ގައި ވަނީ ކުރީ ސަރުކާރުން ދީފައިވާ ފްލެޓްތައް އަތުނުލާނެ ކާމަށާއި އަދި ފްލެޓްތައް ދޭން ނިންމާފައިވާ ގޮތަކަށް ބަދަލެއް ނުގެނެސް ދިންއެއްޗެއް، ދިންގޮތަކަށް، އަދި އެއަށް ވުރެ ފުރިހަމަ ކޮށް ދެއްވާނެ ކަމަށެވެ.
މިހާރު ހާމަވެފައިވާ ގޮތުގައި، މުއިއްޒު ގެ ވައުދާ ޚިލާފަށް، އަދި ކުރީގެ ސަރުކާރުން ފްލެޓް ދޫކުރަން ނިންމި ގޮތާ ވެސް ޚިލާފަށް، ގެދޮރުވެރިޔާ ސްކީމުގެ ދަށުން ދޫކުރާ ފްލެޓް ތަކަކީ އެހެނިހެން ރިއަލްއެސްޓޭޓް ކުންފުނިތަކުންވެސް ދިގު މުއްދަތަކަށް އަގުދައްކާ ޚަލާސް ކުރުމުން މިލްކު ކުރެވޭ އުސޫލުން، ފަހިދިރިއުޅުން ކޯޕަރޭޝަނަށް 25 އަހަރުގެ މުއްދަތަކުން އަގުދައްކާ ޚަލާސް ކުރުމުން މިލްކު ކުރެވޭގޮތަށް ދޫކުރެވޭ ފްލެޓް ތަކެއް ކަމެވެ.
ފަހި ޔޫނިއަން އިން އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ބުނީ ރައީސް މުއިއްޒުގެ ސަރުކާރުން ހަދާފައި އެއްބަސްވުމަކީ ނިމިދިޔަ ސަރުކާރުން ހަދާފައިވާ އެއްބަސްވުން ބަދަލު ކޮށް ރައްޔިތުންގެ އަތުން ފްލެޓް އަތުލުމުގެ ބޭނުމުގައި އިތުރު ނުރައްކާތެރި މާއްދާތަކެއް ހިމަނާފައިވާ އެއްބަސްވުމެއް ކަމަށެވެ.
