މަޝްރޫއުތަކަށް ހުރަސް އަޅާ ކަމަށް ރައީސް ވިދާޅުވުމުން އެ ތުހުމަތުތަކަށް އައްބާސްގެ ރައްދެއް
ފޮއްދޫގައި ސަރުކާރުން ހިންގަން ރާވާފައިވާ ކަންކަން ނުކުރެވި ލަސްވަނީ އައްބާސްގެ އެއްބާރުލުން ނުލިބޭތީ
ވެލިދޫ ދާއިރާގެ މެންބަރު މުހައްމަދު އައްބާސް
ނ. ފޮއްދޫގައި ސަރުކާރުން ހިންގަން ރާވާފައިވާ ކަންކަން ނުކުރެވި ލަސްވަނީ ވެލިދޫ ދާއިރާގެ މެންބަރު މުހައްމަދު އައްބާސްގެ އެއްބާރުލުން ނުލިބޭތީ ކަމަށް ރައީސް ޑރ. މުހައްމަދު މުއިއްޒު ކުރެއްވި ތުހުމަތުތަކަށް އައްބާސް ރައްދު ދެއްވައިފި އެވެ.
ނ. އަތޮޅުގެ ރަށްތަކަށް ރައީސް މުއިއްޒު މިހާރު ކުރައްވަމުން ގެންދަވާ ދަތުރުގެ ތެރެއިން އެ އަތޮޅު ފޮއްދުއަށް ވަޑައިގެން ރައީސް ވިދާޅުވީ އެ ދާއިރާގެ މެންބަރު އައްބާސްގެ އެއްބާރުލުމެއް ނުލިބޭ ތަނުގައި، ކަންކަން ކުރުމަށް ހުރަސް އަޅަމުންދާ ކަމަށެވެ.
މީގެ އިތުރުން ދާއިރާއަށް އިންތިހާބުކޮށްފައި ހުންނަ މެންބަރު ސިޔާސީ ހިޔާލު ތަފާތުވި ނަމަވެސް، ވާން ޖެހޭނީ ޒިންމާދާރުކަމާއެކީ ޕްރޮފެޝަނަލްކޮށް މަސައްކަތް ކުރަން ޖެހޭ ބޭފުޅަކަށް ކަމަށް ވެސް ރައީސް ވިދާޅުވި އެވެ.
މިކަމަށް ރައްދުދެއްވައި އައްބާސް އެކްސައި ކުރެއްވި ޕޯސްޓުގައި ވިދާޅުވީ ސިޔާސީ މައިދާނުގައި މިހާތަނަށް ހޭދަކުރި 18 އަހަރު އޭނާގެ ހަށިގަނޑުގައި ނާޅާ ވޭން މިއަދު އަޅަމުން ދާ ކަމަށެވެ. އަދި މިހާތަނަށް ބުނި ކޮންމެ ބަހެއް އަދި ކުރި ކޮންމެ ކަމެއް ކުރީ ދާއިރާގެ ރައްޔިތުންގެ ހައްގުގައި ކަމަށް އޭނާ ވިދާޅުވި އެވެ.
އައްބާސް ވިދާޅުވީ މި ސަރުކާރުން ހުށައެޅި މޮޅު ބަޖެޓަށް ވޯޓު ދީ، ސަރުކާރުން ހުށަހެޅި ކޮންމެ ބިލަކަށް ވެސް ވޯޓު ދީފައިވާނޭ ކަމަށާއި އޭގެ އިތުރުން ދާއިރާގެ ތިން ރަށުގެ ރައްޔިތުން ބޭނުންވާ ތަރައްގީ ގެ ވާހަކަ ހިފައިގެން ދައުލަތުގެ ހުރިހާ މުއައްސަސާ އަކަށް ގޮސްފައިވާނޭ ކަމަށެވެ.
އަދި ސަރުކާރާ ދެކޮޅަށް އެއްވެސް ބާވަތެއްގެ މުޒާހާރާއެއް ވެސް ނުކުރާ ކަމަށާއި ސަރުކާރުގެ ވެރިންނަށް ހުތުރު ބަހުން އެއްޗެތި ކިޔާފައި މެސެޖެއް ވެސް ކޮށްފައި ނުވާނޭ ކަމަށް އައްބާސް ވިދާޅުވިއެވެ. އަދި އަމިއްލަ މަސްލަހަތު ހިމެނޭ އެއްވެސް ކަމަކު ސަރުކާރުގެ އެއްވެސް ވެރިއެއްގެ ކިބައިން ނޭދޭ ކަމަށާއި އެހެން ކަމުން ހުރަސް އެޅުމަކީ ކޮބައިތޯ އައްބާސް ވަނީ ސުވާލު އުފައްދަވާފައެވެ.
ސިޔާސީ ގޮތުން މިހޭދަ ކުރި 18 އަހަރު މިހަށިގަޑުގައި ނާޅާ ވޭން މިއަދު އަޅަމުން ދަނީ.. އަޅުގަނޑު ކުރި ކޮންމެ ކަމެއް ބުނި ކޮންމެ ބަހެއް ބުނީ އަދި އެޅި ކޮންމެ ފިޔަވަޅެއް އެޅީ ދާއިރާގެ ރައްޔިތުންގެ ހައްޤުގައި.. ސަރުކާރުން ހުށައެޅި މުޅޮބަޖެޓަށް އަޅުގަނޑު ވޯޓު ދިނިން.. ސަރުކާރުން ހުށައެޅި ކޮންމެ ބިލަކަށް އަޅުގަނޑު ވޯޓު ދިނިން.. ދާއިރާގެ 3 ރަށުގެ ރައްޔިތުން ބޭނުންވާ ތަރައްޤީ ގެ ވާހަކަ ހިފައިގެން ދައުލަތުގެ ހުރިހާ މުއައްސަސާ އަކަށް އަޅުގަނޑު ދިޔައިން..ވެލިދޫ ދާއިރާގެ މެންބަރު މުހައްމަދު އައްބާސް
ސަރުކާރުގެ ސިޔާސަތުތަކާއި ސަރުކާރުގެ އަމަލުތައް ހުރި ގޮތަށް އައްބާސް ފަހަކަށް އައިސް ވަރަށް ބޮޑަށް ފާޑުވިދާޅުވަމުންގެންދަވާއިރު، އެންމެ ބޮޑަށް ފާޑުވިދާޅުވަމުންގެންދަވަނީ ދާއިރާގެ ރަށްރަށުގައި ޕްރޮޖެކްޓުތައް ނުހިނގާ ކަމަށް ވިދާޅުވެއެވެ.
އެގޮތުން ރައީސް މުއިއްޒު ނ. އަތޮޅަށް ވަޑައިގަންނަވާތީ އެ ދަތުރުގެ ބޭނުމަކީ އިތުރު ދޮގުތައް ހަދައިގެން ކުރިއަށް އޮތް ލޯކަލް ކައުންސިލްގެ އިންތިހާބު ވެރިކަން ކުރާ ޕީއެންސީއަށް ހޯދުން ކަމަށް އައްބާސް ކުރިން ވިދާޅުވި އެވެ.
ބުދަ ދުވަހު ފޮއްދޫއަށް ވަޑައިގެން ހުންނަވައި ރައީސް މުއިއްޒު ވިދާޅުވީ އައްބާސްއަށް ވުރެ އިދިކޮޅު އެމްޑީޕީގެ މަޖިލިސް މެންބަރުން ވެސް މާ ރަނގަޅު ކަމަށާއި އެމްޑީޕީގެ މެންބަރުން ސަރުކާރު ކުރާ ކަންކަމާ ނުބެހޭ ކަމަށެވެ.
އެގޮތުން ދާއިރާގެ ކަމެއްގައި މިހާތަނަށް އެމްޑީޕީގެ މެންބަރުކު އެމަނިކުފާނުގެ އަރިހަށް ނާންނަކަން ފާހަގަކުރައްވާ ރައީސް މުއިއްޒު ވިދާޅުވީ އެގޮތަށް އަމަލުކުރުމުން މަސައްކަތް ކުރަން ފަސޭހަ ކަމަށެވެ.
