ކަރަންޓު ބިލުން މުތުލަގަށް ވައްކަން ކުރަނީ މިސަރުކާރުން، މިއީ ގައުމަށް ޖެހިފައި އޮތް ބޮޑު މުސީބާތެއް: މެންބަރު ޣަފޫރު
23 ޖުލައި 2025 | ބުދަ 06:54ޣަފޫރު ވިދާޅުވީ، އަބަދުވެސް އޮންނަނީ ހޫނު މޫސުން އައިސް ކަމަށާއި މަހެއް ވަންދެން ވާރޭ ވެހުނަސް ފިނި މޫސުން މިސަރުކާރަށް ނާންނަ ކަމަށް
މަޖިލީހުގެ ހަނިމާދޫ ދާއިރާގެ މެމްބަރު އަބްދުލް ޢަފޫރު މޫސާ
ކަރަންޓު ބިލުން މުތުލަގަށް ވައްކަން ކުރަނީ މިސަރުކާރުން ކަމަށާއި މިއީ ގައުމަށް ޖެހިފައިވާ ބޮޑު މުސީބާތެއް ކަމަށް ރައްޔިތުން މަޖިލީހުގެ ހަނިމާދޫ ދާއިރާގެ މެންބަރު އަބްދުލް ޣަފޫރު މޫސާ (ގަޕޯ) ވިދާޅުވެއްޖެއެވެ.
މާލެ ފިޔަވައި އަތޮޅުތަކުގައި ހަރަކާތްތެރިވާ ކުދި ފަންތީގެ ވިޔަފާރިތަކާއި މެދުފަންތީގެ ވިޔަފާރިތަކުން ބޭނުންކުރާ ކަރަންޓާއި ފެނުގެ ޚިދުމަތަށް ބޮޑު އަގެއް ހޭދަކުރަން ޖެހިފައިވާ ކަމަށް ބުނެ، މެންބަރުން ދެކެވަޑައިގަންނަވާ ގޮތެއް ހޯދަން ހުށަހެޅި ގަރާރަށް ބަހުސްކުރައްވާ ޣަފޫރު ވިދާޅުވީ، ރައްޔިތުންނަށް ވެރިކަންކުރަން ސަރުކާރެއް އަންނަނީ އިގްތިސޯދު ދަމަހެއްޓުމަށް ޓަކައި ކަމަށާއި ބޭނުންވާ ކަންތައްތައް ކޮށްދޭން ޖެހޭކަމަށެވެ. އައްޑޫ ރައްޔިތުން ކަނު އަނދިރީގައި އުޅޭތާ ދޮޅު އަހަރު ވީއުރު ހައްލެއް ނުލިބޭ ކަމަށާއި އިންޖީނެއް ގެނދިޔައިރުވެސް އެތަނަށް ފޮނުވީ ބައު އިންޖީނެއް ކަމަށް ޣަފޫރު ވިދާޅުވިއެވެ.
މުޅި މާލޭން ކަރަންޓު ދިޔަ ވަގުތު ބުނީ ތަހުގީގު މިކުރަނީއޭ، އަދި އަދަށްވެސް މާލޭން ކަރަންޓު ދާންޖެހުނު ސަބަބެއް ސާފެއް ކޮށެއް ނުދެވުނު ރައްޔިތުންނަކަށެއް، ރޭގަވެސް ކަރަންޓު ދިޔައީ، މާލެގެ ރައްޔިތުން ތިބީ އަނދިރީގައި، މިތާ ލަދެއް ހަޔާތެއް ނެތިގެން އައިސް ވާހަކަ ދައްކަނީ ރައްޔިތުންގެ ފައިސާ ވަގަށް ކައި މިއެއްޗެހި މި ހުސްކުރަނީ، މާލެ އަށް ކަރަންޓު ނުދެވިގެން މިއުޅެނީ މިސަރުކާރަށް، ރައްޔިތުން ތިބެންޖެހެނީ ގަލޯހާޖާ ނުކޮށް މިގައުމުގަ، މިއީ ކިހާ ދެރަކެއް، ރައްޔިތުންނަށް ޖެހިފަ އޮތް ބޮޑު މުސީބާތެއް މިސަރުކާރަކީ މިއަދުހަނިމާދޫ ދާއިރާގެ މެންބަރު އަބްދުލް ޣަފޫރު މޫސާ (ގަޕޯ)
ޣަފޫރު ވިދާޅުވީ، އަބަދުވެސް އޮންނަނީ ހޫނު މޫސުން އައިސް ކަމަށާއި މަހެއް ވަންދެން ވާރޭ ވެހުނަސް ފިނި މޫސުން މިސަރުކާރަށް ނާންނަކަމަށެވެ. ކަރަންޓު ބިލަށް 2000ރ. ދެއްކި ގޭގެއިން މިއަދު 4000ރ. ދައްކަން ޖެހޭކަމަށް ޣަފޫރު ވިދާޅުވިއެވެ.
އެއާޕޯޓް ކޮމްޕެނީއިން 250 މިލިއަން ރުފިޔާ ހަރަދުކުރަނީ 2 ގަޑިއިރުތެރޭގައި މަޖާކޮށް ނަށައި ކައިބޮއެ ހަދަން ކަން ފާހަގަކުރައްވާ ޣަފޫރު ވިދާޅުވީ، ފެނަކަ ދަރާފައިއޮތް އިރުގައި 800 މުވައްޒަފުން މިސަރުކާރުން ފެނަކައަށް އިތުރަށް ވައްދައިފި ކަމަށެވެ. ޣަފޫރު ވިދާޅުވީ މިއީ ކުކުޅު ބިހެއްގެ އަގު ހެޔޮ ނުކޮށްލެވުނު ސަރުކާރެއް ކަމަށެވެ.
