ރަށްރަށުގައި ކަރަންޓާއި ފެނުގެ ހިދުމަތްތަކަށް ކުރާ ހޭދަ ބޮޑު ކަމަށް ބުނެ މަޖިލީހަށް ގަރާރެއް
23 ޖުލައި 2025 | ބުދަ 05:27ރަށްރަށުގައި ކަރަންޓާއި ފެނުގެ ޚިދުމަތްތަކުގެ ކޮމާޝަލް ރޭޓްތަކުގެ ސަބަބުން ކުދި އަދި މެދު ފަންތީގެ ވިޔަފާރިތަކަށް ބޮޑު ބުރައެއް އުފުލަން ޖެހިފައިވޭ
ހުޅުމާލެ ދެކުނު ދާއިރާގެ އެމްޑީޕީގެ މެންބަރު ޑރ. އަހުމަދު ޝަމްހީދު
ރަށްރަށުގައި ކަރަންޓާއި ފެނުގެ ހިދުމަތްތަކަށް ކަނޑައަޅާފައިވާ ކޮމާޝަލް ރޭޓުތަކުގެ ސަބަބުން ކުދި އަދި މެދު ފަންތީގެ ވިޔަފާރިތަކުން ކަަރަންޓާއި ފެނުގެ ހިދުމަތަށް ކުރަންޖެހޭ ހޭދަ ބޮޑުވާ މައްސަލައިގައި ރައްޔިތުންގެ މަޖިލީހުގެ މެންބަރުން ދެކޭ ގޮތް ސާފުކުރަން ގަރާރެއް ހުށަހަޅައިފި އެވެ.
ރައްޔިތުން މަޖިލީހުގައި މި ގަރާރު ހުށަހެޅުއްވީ ހުޅުމާލޭ ދެކުނު ދާއިރާގެ މެންބަރު ޑރ. އަހުމަދު ޝަމްހީދު އެވެ. ޔުޓިލިޓީ ކުންފުނިތަކުން މީހުން ދިރިއުޅޭ ރަށްތަކަށް ކަނޑައަޅާފައި ހުރި އަގުތަކުގައި ބޮޑެތި ފަރަގުތަކެއް ހުރިކަން ހާމަވާ ކަމަށް އެ ގަރާރުގައިވެ އެވެ. މީގެ ސަބަބުން އެ ރަށްރަށުގައި ހަރަކާތްތެރިވާ ކުދި އަދި މެދު ފަންތީގެ ވިޔަފާރިތަކުން ފެނާއި ކަރަންޓަށް ކުރާ ހޭދަ އިންތިހާއަށް ބޮޑުވެފައިވާ ކަމަށް މެންބަރު ވިދާޅުވި އެވެ.
ޔޫޓިލިޓީ ހިދުމަތް ފޯރުކޮށްދިނުމުގައި މާލެ އާއި އަތޮޅު ތެރޭގައި ހުރި ފަރުގުތައް އެ ގަރާރުގައި ފާހަގަކޮށްފައިވެއެވެ. އެގޮތުން:
- ފެން މީޓަރެއް މާލޭގައި ރީލޮކޭޓު ކޮށްދެނީ 850ރ. އަށް، އަތޮޅުތެރޭގައި 2،200ރ. އަށް - 159 ޕަސެންޓު ބޮޑު
- ފެނުގެ ހިދުމަތް މާލޭގައި ގުޅައިދެނީ 3187.84ރ. އަށް އަތޮޅުތެރޭގައި 5000ރ. އަށް - 57 ޕަސެންޓު ބޮޑު
- ކަރަންޓޫ ބޭނުންކުރޭ މިންވަރު 301-500 އާއި ހަމައަށް މާލޭގައި ނަގަނީ ޔުނިޓަކަަށް 3.65ރ.، އަތޮޅުތެރޭގައި 6ރ. - 64 ޕަސެންޓު ބޮޑު
- ދުވާލެއްގެ މައްޗަށް 201 ލީޓަރަށް ވުރެން މަތިން ފެން ބޭނުންކޮށްފި ނަމަ މާލޭގައި ނަގަނީ 101.26ރ.، އަތޮޅުތެރޭގައި 135ރ. - 34 ޕަސެންޓު ބޮޑު
ކަރަންޓާއި ފެނުގެ ޚިދުމަތް ފަދަ އަސާސީ ޚިދުމަތްތަކުގެ އަގު ކަނޑައެޅުމުގައި މި މިންވަރުގެ ތަފާތުކުރުންތައް ގެންގުޅުމުގެ ނަތީޖާއަކީ، އާންމު ވިޔަފާރިތަކަށާއި ކުދި ވިޔަފާރިތަކަށް، ޚާއްސަކޮށް ގެސްޓްހައުސް ފަދަ ވިޔަފާރިތަކަށް ކަރަންޓަށް ކުރަން ޖެހޭ ހޭދަ 40 ޕަސެންޓާއި 70 ޕަސެންޓާ ދެމެދުގެ އަދަދަކުން އިތުރުވުމާއި، ފެނުގެ ޚިދުމަތަށް މާލެ އާ ބަލާއިރު އަތޮޅުތަކުގައި 35 ޕަސެންޓު އިތުރުވުން ކަމަށް ގަރާރުގައި ވެއެވެ.
މި ތަފާތުކުރުމުގެ ސަބަބުން ރަށްރަށުގައި ހިންގަމުންދާ ވިޔަފާރިތަކަށް އެކަށީގެންނުވާ މިންވަރެއްގެ މާލީ ބުރަ އުފުލަން ޖެހިފައިވާ ކަމަށާއި މިކަން މިގޮތަށް ކުރިއަށްދާ ނަމަ ކުދި ފަންތީގެ ވިޔަފާރިތަކާ މެދު ފަންތީގެ ވިޔަފާރިތައް ދެމެހެއްޓުމަށާއި މިހާރު ވެސް އިންތިހާއަށް ބަލިކަށިވެފައިވާ ރަށްފުށުގެ އިގުތިސާދުގެ ދިރިއުޅުމަށް ގިނަ ދަތިތަކެއް ކުރިމަތިވާނެ ކަމަށް ޝަމްހީދުގެ ގަރާރުގައި ބުނެފައިވެއެވެ.
