ޗައިނާ އާއި ރާއްޖެ އާ ދެމެދު ސޮއި ކުރި ފްރީ ޓްރޭޑް އެގްރިމެންޓުގެ ސަބަބުން ދެ ގައުމުގެ ދެމެދުގެ ވިޔަފާރި ކުރި އަރާ ރާއްޖެ އިން ޗައިނާ އަށް އެކްސްޕޯޓް ކުރާ މިންވަރު އިތުރުވާނެ ކަމަށް ސަރުކާރުން ބުނި ނަމަވެސް އަދިވެސް އެ ނަތީޖާ އެ ގޮތައް ފެންނަމުން ނުދާކަން ތަފާސް ހިސާބުން ފާހަގަ ވެއްޖެއެވެ.

މޯލްޑިވްސް ކަސްޓަމްސް ސާވިސް އިން އިން ޖުލައި މަހު ނެރުނު އެންމެ ފަހުގެ ތަފާސް ހިސާބުތަކުން ފާހަގަވާ ގޮތުގައި ރާއްޖެ އިން އެންމެ ގިނައިން މުދާ އެކްސްޕޯޓް ކުރާ ގައުމުތަކުގެ ތެރޭގައި ޗައިނާ އަދިވެސް ނުހިމެނެއެވެ.

ކަސްޓަމްސް އިން ހާމަ ކޮށްފައިވާ ގޮތުގައި މެއި މަހު ރާއްޖެ އިން އެކްސްޕޯޓު ކުރި މުދަލުގެ 50 އިން ސައްތަ ފޮނުވާފައިވަނީ ތައިލެންޑް އަށެވެ. ދެވަނަ އަށް އިނގިރޭސިވިލާތް އޮތް އިރު ތިން ވަނަ އަށް އެންމެ ގިނައިން މުދާ އެކްސްޕޯޓު ކޮށްފައި ވަނީ މޮރިޝަސް އަށެވެ. ވިއެޓްނާމް 4 ވަނައިގައި އޮތް އިރު 5 ވަނަ އަށް އެންމެ ގިނައިން މުދާ ބޭރު ކޮށްފައިވަނީ ޖަރުމަނު ވިލާތަށެވެ.

ތައިލެންޑް 50% (89 މިލިއަން ރުފިޔާގެ މުދާ)

އިނގިރޭސިވިލާތް 20% (36 މިލިއަން ރުފިޔާގެ މުދާ)

މޮރިޝަސް 7% (13 މިލިއަން ރުފިޔާގެ މުދާ)

ވިއެޓްނާމް 6% (11 މިލިއަން ރުފިޔާގެ މުދާ)

ޖަރުމަނު ވިލާތް 3% (4 މިލިއަން ރުފިޔާގެ މުދާ)

މެއި މަހު ވެސް މުޅިން ހެން ރާއްޖެ އިން ބޭރު ކޮށްފައިވަނީ މަހުގެ ބާވަތްތަކެވެ. މި ގޮތުން އެންމެ ބޮޑު އާމްދަނީ އެއް ލިބިފައިވަނީ ގަނޑުކުރި ކަޅުބިލަމަހަށެވެ. އެއީ 107 މިލިއަން ރުފިޔާ އެވެ.

މިއަހަރުގެ ޖަނަވަރީ މަހުން ފެށިގެން އަމަލު ކުރަން ފެށި ޗައިނާ މޯލްޑްވިސް ފްރީ ޓްރޭޑް އެގްރީމެންޓު (ސީއެމްއެފްޓީއޭ) އާ ބެހޭ ގޮތުން ސަރުކާރުން ނެރުނު ބަޔާނުގައި ބުނެފައި ވަނީ ސީއެމްއެފްޓީއޭ ގެ މަޤްޞަދަކީ ވިޔަފާރީގެ މިންވަރު އިތުރުކޮށް، އެކްސްޕޯޓް އިތުރުކޮށް، އުފެއްދުންތެރިކަން އިތުރުކޮށް، ވިޔަފާރީގެ ހުރަސްތައް ނައްތާލައި، އަދި ދިވެހިރާއްޖެ އާއި ޗައިނާގެ ވިޔަފާރިތަކަށް އައު ފުރުޞަތުތައް އުފެއްދުން ކަމަށެވެ. ސީއެމްއެފްޓީއޭގެ ދަށުން، ދެ ޤައުމަށްވެސް ޓެރިފް ކުޑަކުރުމާއި މާކެޓަށް ވަނުމުގެ ފުރުޞަތުތައް ރަނގަޅުކުރުމުގެ ފައިދާ ލިބޭނެ ކަމަށް ވެސް ބުނެފައިވެއެވެ.

މި އެއްބަސްވުމުގެ ދަށުން ދިވެހި އެކްސްޕޯޓަރުންނަށް، ޚާއްޞަކޮށް މަސްވެރިކަމުގެ ދާއިރާގައި، ސީއެމްއެފްޓީއޭ ތަންފީޒު ކުރަން ފަށާ ދުވަހުން ފެށިގެން ޗައިނާގެ ކަސްޓަމަރުންގެ ބޮޑު މާކެޓަކަށް މަހުގެ ހުރިހާ ބާވަތްތަކެއް ޑިއުޓީ ނުލައި އެކްސްޕޯޓު ކުރުމުގެ ފުރުސަތު ލިބޭނެ ކަމަށް ވެސް ވަނީ ބުނެފައެވެ. އެހެން ނަމަވެސް އަދި މި އެއްބަސްވުމުގެ ސަބަބުން އެއްވެސް އެދެވޭ ނަތީޖާ އެއް ރާއްޖޭގެ އެކްސްޕޯޓް ދާއިރާ އިން ފެނިފައި ނުވާކަން ކަސްޓަމްސްގެ ތަފާސް ހިސާބު ތަކުން ހާމަވެއެވެ.

މެއި މަހު ރާއްޖެ އަށް 906 މިލއަން ރުފިޔާގެ ކާބޯތަކެތި އެތެރެކޮށްފައިވާ އިރު، އެންމެ ބޮޑު ޚަރަދެއް ހިނގާފައިވަނީ ކާބޯތަކެތީގެ ބާވަތްތައް އެތެރެ ކުރުމަށް ކަން ފާހަގަ ކުރެވެއެވެ.

ދެން އެންމެ ބޮޑު ހޭދަ އެއް ކޮށްފައިވަނީ ތެލުގެ ބާވަތްތައް އެތެރެ ކުރުމަށެވެ. އެއީ 709 މިލިއަން ރުފިޔާއެވެ.