އީޔޫ އާއެކު ވާހަކަ ދެއްކުމަށް ތައްޔާރު ކަމަށް ޓްރަމްޕް ވިދާޅުވެއްޖެ

ޔޫރަޕިއަން ޔޫނިއަން (އީޔޫ) އާއެކު ވާހަކަ ދެއްކުމަށް ތައްޔާރަށް ހުންނެވި ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޓްރަމްޕް މިހެން ވިދާޅުވީ އަންނަ އޯގަސްޓު މަހުގެ އެއް ވަނަ ދުވަހު ތަންފީޒު ކުރުމަށް ހަމަޖެހިފައިވާ އިތުރު ޓެރިފްތަކުގެ ކުރިންނެވެ. ޓްރަމްޕް ވިދާޅުވީ އެކަން ތަންފީޒު ކުރުމުގެ ކުރިން ޔޫރަޕިއަން ޔޫނިއަން އަދި އެހެން ވިޔަފާރީގެ ބައިވެރިންނާ އެކު މަޝްވަރާ ކުރުމަށް ތައްޔާރަށް ހުންނެވި ކަމަށެވެ. 

އެކަން ފާހަގަ ކުރައްވައި ޓްރަމްޕް ވިދާޅުވީ، އީޔޫގެ އިސްވެރިން އެމެރިކާ އަށް ވަޑައިގެންނެވުމަށް ހަމަޖެހިފައިވާ ކަމަށެވެ. އެގޮތުން އީޔޫ އިން ބޭނުން ވަނީ ތަފާތު ބާވަތުގެ އެއްބަސްވުމެއްކަން ފާހަގަ ކުރައްވައި ޓްރަމްޕް ވިދާޅުވީ، އެމެރިކާ އިން އަބަދު ވެސް ޔޫރަޕާ އެކު މަޝްވަރާކޮށް އަދި ވާހަކަ ދައްކަން ތައްޔާރަށް ތިބޭނެ ކަމަށެވެ. އަދި އެކަމަށްޓަކައި އީޔޫގެ ވެރިން އެމެރިކާ އަށް އަންނާނެކަން ވެސް ފާހަގަ ކުރެއްވި އެވެ. 

މިދިޔަ ހޮނިހިރު ދުވަހު ޓްރަމްޕް ވަނީ ވިޔަފާރީގެ ފިޔަވަޅުތައް އިތުރަށް ހަރުކަށި ކުރައްވަން ނިންމަވައިފަ އެވެ. އެގޮތުން އޯގަސްޓު މަހުން ފެށިގެން އީޔޫ އަދި މެކްސިކޯ އިން އެތެރެ ކުރެވޭ މުދަލަށް 30 އިންސައްތަ ޓެރިފް ނެގުމަށް ވަނީ ނިންމަވައިފަ އެވެ. 

މީގެ އިތުރުން ޖަޕާން އާއި ދެކުނު ކޮރެއާ ފަދަ އޭޝިއާގެ އިޤްތިޞާދީ ބާރުވެރި ޤައުމު ތަކަށް ވެސް މި ފަދަ އިންޒާރު ޓްރަމްޕް ވަނީ ދެއްވައިފަ އެވެ. އެމެރިކާގެ ވިޔަފާރި ބައިވެރިންނާ އެކު މަޝްވަރާތައް ކުރިއަށް ދާނެ ކަމަށް ބެލެވޭއިރު، މި މަޝްވަރާތަކުން އައު އެއްބަސްވުންތަކެއް ވާސިލު ވެވޭނެ ކަމުގެ އުންމީދު އޮތް ކަމަށް މާހިރުން ވަނީ ފާހަގަ ކޮށްފަ އެވެ.