ޓްރަމްޕް އަށް ހަމަލާ ދިންއިރު، ސީކްރެޓް ސާވިސްގެ ގިނަ އިހުމާލުތަކެއް އޮތް ކަމަށް ފާހަގަ ކޮށްފި

މިދިޔަ އަހަރު އޮތް އެމެރިކާގެ ރިޔާސީ އިންތިޚާބުގެ ކެމްޕެއިންގެ ތެރޭގައި، އެމެރިކާގެ ރައީސް ޑޮނަލްޑް ޓްރަމްޕް އަށް އަމާޒުކޮށް ހަަމަލާ ދިންއިރު، ސީކްރެޓް ސާވިސްގެ ގިނަ އިހުމާލުތަކެއް އޮތް ކަމަށް ބުނެފި އެވެ.

ޓްރަމްޕް އަށް ހަމަލާދިންތާ އެއް އަހަރުވީ އާދީއްތަ ދުވަހަށެވެ. އާދީއްތަ ދުވަހު އެމެރިކާގެ ސެނެޓުން ވަނީ އެކަމާ ގުޅުން ހުރި ރިޕޯޓެއް ނެރެފަ އެވެ. 

ޕެންސިލްވޭނިއާގައި އޮތް ޓްރަމްޕްގެ ކެމްޕެއިން ރެލީއެއްގައި ވާހަކަ ދައްކަވަން ޕޯޑިއަމްގައި ޓްރަމްޕް ހުންނަވަނިކޮށް، އޭނާ އަށް ވަނީ ހަމަލާ ދީފަ އެވެ. ޓްރަމްޕްގެ ބޮލަށް އަމާޒުކޮށް ހަމަލާ ދޭން މަސައްކަތް ކުރި ނަމަވެސް، އެ ހަމަލާ އަމާޒުވެފައި ވަނީ ޓްރަމްޕްގެ ކަންފަތަށެވެ. 

އެ ހަމަލާއާ ގުޅޭ ގޮތުން ނެރުނު ރިޕޯޓުގައި ވަނީ ސީކްރެޓް ސާވިސްގެ ގިނަ އިހުމާލުތަކެއް ހުރި ކަމަށް ބުނެފަ އެވެ. އެމެރިކާގެ ސެނެޓުގެ ހޯމްލޭންޑް ސެކިއުރިޓީ އެންޑް ގަވަމަންޓް އެފެއާޒް ކޮމެޓީ އިން ނެރުނު ރިޕޯޓުގައި ބުނެފައި ވަނީ، 2024 ވަނަ އަހަރުގެ ޖުލައި މަހުގެ 13 ވަނަ ދުވަހު ހިނގި އެ ހާދިސާ އަކީ އެންމެ އިހުމާލެއްގެ ސަބަބުން ހިނގި ހާދިސާއެއް ނޫން ކަމަށެވެ. އަދި ޓްރަމްޕްގެ ފުރާނަ އަށް ނުރައްކާވާ ގޮތަށް ހަމަލާ ދިން އެ ހާދިސާާކީ ކުރިން ހުއްޓުވިދާނެ ހާދިސާއެއް ކަމަށް ބުނެފައިވެ އެވެ.

މީގެ އިތުރުން އެ ހަމަލާ ދީފައިވާއިރު، ސެކިއުރިޓީގެ ޕްރޮޓޮކޯލް ފޮލޯ ކޮށްފައި ނުވާ ކަމަށާއި، އެއީ ސެކިއުރީޓީ ގޯސްވުމުގެ ސަބަބުން ހިނގާފައިވާ ކަމެއް ކަމަށް ވެސް އެ ރިޕޯޓުގައި ވަނީ ބުނެފަ އެވެ. 

ދެ ވަނަ ދައުރަކަށް އެމެރިކާގެ ރައީސް ކަމަށް ވަޑައިގެންނެވި ޓްރަމްޕް އަށް ހަމަލާ ދީފައި ވަނީ އުމުރުން 20 އަހަރުގެ ތޯމަސް މެތިއު ކްރުކްސް ނަމަކަށް ކިޔާ މީހެކެވެ. އޭނާ ދިން ހަމަލާ ޓްރަމްޕްގެ ކަންފަތަށް އަމާޒުވީއިރު، ހަމަލާ ދިން މީހާ ވަނީ ވަގުތުން މަރާލައިފަ އެވެ. އަދި އެ ހާދިސާގައި އިތުރު ބަޔަކަށް ޒަޚަމުވެފައިވެ އެވެ. 

ޓްރަމްޕް އަށް ހަމަލާ ދިން ހާދިސާއާ ގުޅޭ ގޮތުން ސީކްރެޓް ސާވިސްގެ ކުރީގެ ޑިރެކްޓަރު ކިމްބަލީ ޗީޓްލް ވަނީ މަގާމުން އިސްތިއުފާ ދެއްވައިފަ އެވެ. އަދި އެ ދުވަހު ޑިއުޓީގައި ތިބި ހަ އެޖެންޓަކު ވަނީ 10 ދުވަހުން ފެށިގެން، 42 ދުވަހުގެ މުއްދަތަކަށް ސަސްޕެންޑު ވެސް ކޮށްފަ އެވެ.

އެހެން ނަމަވެސް، ސެނެޓުގެ ކޮމެޓީ އިން ބުނެފައި ވަނީ އިތުރު މުވައްޒަފުން ނުވަތަ އެޖެންޓުންނަށް އަދަބު ލިބެން ޖެހޭ ކަމަށާއި، އެއްވެސް މީހަކު ވަޒީފާ އިން ވަކި ނުކޮށް ހުރުމަކީ ވެސް ކަންބޮޑުވާ ކަމެއް ކަމަށެވެ. ސީކްރެޓް ސާވިސްގެ މިހާރުގެ ޑިރެކްޓަރު ޝޯން ކަރަން ވިދާޅުވެފައި ވަނީ އެ އިދާރާ އިން ވަނީ އެ ހާދިސާއާ ގުޅިގެން އޮޕަރޭޝަންތައް މުރާޖައާކޮށް، އިޞްލާޙީ ފިޔަވަޅު ތަކެއް އަޅާފައި ކަމަށެވެ.

އެމެރިކާގެ ރިޔާސީ ދެ ވަނަ ދައުރަކަށް ވަޑައިގަންނަވަން ޓްރަމްޕް މަސައްކަތް ކުރަމުން ދިޔައިރު، އެކި ފަހަރު މަތިން ވަނީ އޭނާ އަށް އަމާޒުކޮށް ހަމަލާ ދޭން މަސައްކަތް ކޮށްފަ އެވެ. ޓްރަމްޕް އަށް ދިން ބަޑީގެ ހަމަލާގެ ސަބަބުން، އޭނާގެ ސެކިއުރިޓީގެ ކަންކަން އޭރު ވަނީ އިތުރަށް ވަރުގަދަ ވެސް ކޮށްފަ އެވެ.