"މިސަރުކާރު އައި އިރު ދިއްދޫ އިންޖީނުގޭގައި ނުނިމި ހުރީ 3 މަސް ދުވަހުގެ މަސައްކަތް، ދެ އަހަރު ވި އިރުވެސް މަސައްކަތް ނުނިމޭ"
އޭނާ ވަނީ މި ވެރިކަމަށް ވަރަށް ބޮޑަށް ފާޑު ވިދާޅުވެފަ
ދިއްދޫ ދާއިރާގެ ކުރީގެ މެމްބަރު އަބްދުﷲ ވަހީދު ރާއްޖެޓީވީގެ ވައުދު ނާމާ ޕްރޮގްރާމްގައި ވާހަކަދައްކަވަނީ.
މި ސަރުކާރު ވެރިކަމަށް އައި އިރު ދިއްދޫ އިންޖީނުގޭގައި ނުނިމި ހުރީ 3 މަސް ދުވަހުގެ މަސައްކަތް ކަމަށާއި ދެ އަހަރު ދުވަސް ވާއިރު ދިއްދޫގެ ކަރަންޓުގެ މައްސަލަ ހައްލު ނުކުރެވެން ޖެހޭ ސަބަބެއް ނެތް ކަމަށް ދިއްދޫ ދާއިރާގެ ކުރީގެ މެމްބަރު އަބްދުﷲ ވަހީދު ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ވައުދު ނާމާ ޕްރޮގްރާމްގައި ވާހަކަދައްކަވަމުންނެވެ.
އޭނާ ވަނީ މި ވެރިކަމަށް ވަރަށް ބޮޑަށް ފާޑު ވިދާޅުވެފައެވެ. ދިއްދޫ އަށް 3 ފަހަރަށް ރައީސް ޑރ.މުހައްމަދު މުއިއްޒު ވަޑައިގެންނެވި އިރު އެ ރަށަށްޓަކާ ކުރެއްވި ކަމަކީ ވައުދުތައް ތަކުރާރު ކުރެއްވުން ކަމަށް އޭނާ ވަނީ ވިދާޅުވެފައެވެ. އޭނާ ވަނީ މިއަދު ދިއްދޫގެ ރައްޔިތުން ބައިތިއްބާފައި ތިބީ ކިރިޔަ ކިރިޔާ ކަރަންޓު ނުދެވޭ ހިސާބުގައި، ކަނު އަނދިރީގައި ކަމަށް ވެސް އޭނާ ވިދާޅުވިއެވެ.
އޭނާ ވިދާޅުވި މި ސަރުކާރު އައި އިރު ދިއްދޫގައި އެއްވެސް ޕްރޮޖެކްޓެއް ހުއްޓިފައި ނުވާނެ ކަމަށެވެ.
ވަހީދު ވިދާޅުވީ އިންތިޚާބަށް ރައީސް މުއިއްޒު ވަޑައިގަތީ ވަރަށް ގިނަ ވައުދުތައް ވެވަޑައިގަންނަވަމުން ކަމަށެވެ. އޭގެ ތެރޭގައި ހައުސިން މިނިސްޓަރަކަށް ކުރިން ރައީސް މުއިއްޒު ހުންނެވުމުން ކަންކަން ފަސޭހަވެގެން ދާނެ ކަމަށް ފާހަގަކުރައްވާފައިވާ ކަމަށް އޭނާ ވަނީ ވިދާޅުވެފައެވެ.
މީގެ އިތުރުން ދިއްދޫ އަށްޓަކާ ރައީސް މުއިއްޒު ވެވަޑައިގެންނެވި ބައެއް ވައުދުތަކަށް އޭނާ ވަނީ އަލިއަޅުވާލައްވާފައެވެ. އޭގެ ތެރޭގައި ދިއްދޫގެ މަގުތައް ރައްޔިތުން ބޭނުންވާ ގޮތަށް ތަރައްޤީކުރުމާއި، ފެންވަރު ރަނގަޅު އާ ހޮސްޕިޓަލެއް އެޅުމާއި، ބައިނަލްއަޤުވާމީ ފެންވަރުގެ މީހުން އައިސްގެން ކުޅެވޭނެ ރަނގަޅު ފެންވަރުގެ ދަނޑެއް ހެއްދެވުމާއި، ސަރުކާރުން ހިންގަމުން އައި މަޝްރޫޢުތައް ހުއްޓާލުން ކުރިއަށް ގެންދިއުން ހިމެނޭ ކަމަށް އޭނާ ވިދާޅުވިއެވެ.
ދިއްދޫގެ މަގުތައް ނުހެދި ވަނީ ތަކެތި ނެތުމުން ކަމަށް އޭނާ ވަނީ ފާހަގަކުރައްވާފައެވެ. އަދި އެތައް ވައުދެއް ނުފުދި ހުރުމުން އާއްމުން ތިބީ މާޔޫސްވެފައި ކަމަށް އޭނާ ވިދާޅުވިއެވެ. ދިއްދޫގެ އަތޮޅު ހޮސްޕިޓަލުން ވެސް ލިބެން ޖެހޭ ޚިދުމަތްތައް ނުލިބޭ ކަމަށް އޭނާ ވިދާޅުވިއެވެ.
