ދިވެހިން އެންމެ ގިނައިން އޮންލައިން ވިޔަފާރި ކުރަމުންދާ ޓެމޫފަދަ ސައިޓުތަކުން ވިޔަފާރިކުރާނަމަ އަންގާރަ ދުވަހުން ފެށިގެން 30 އިންސައްތަ ފީ އެއް ނެގުމަށް ބެންކް އޮފް މޯލްޑިވްސް (ބީއެމްއެލް)އިން ނިންމާފައިވަނީ ޕިއެންސީ ސަރުކާރުގެ އިގްތިސާދީ އަދި ފޮރިން އެކްސްޗޭންޖްގެ ސިޔާސަތުތައް ފެއިލްވުމުން ކަމަށް ކުރީގެ އިކޮނަމިކް މިނިސްޓަރ ފައްޔާޒް އިސްމާއިލް ވިދާޅުވެއްޖެއެވެ.

ކުއްލި ގޮތަކަށް ހޯމަ ދުވަހު ބީއެމްއެލުން ނެރުނު ބަޔާނެއްގައި ބުނީ، އެ ބޭންކުން ދޫކޮށްފައިވާ ޑެބިޓް ކާޑުތަކުން ރާއްޖޭން ބޭރުގެ މުދަލާއި ޚިދުމަތަށް ފައިސާ ދެއްކޭ ލިމިޓް 1 ޖުލައި 2025 އިން ފެށިގެން މަހަކަށް 500 ޑޮލަރަށް ބޮޑުކޮށްފައިވާ ކަމަށެވެ. މިކަމާއި ގުޅިގެން އެކްސްގައި ކުރެއްވި ޕޯސްޓެއްގައި ފައްޔާޒް ވިދާޅުވީ އީކޮމާސް ޕްލެޓްފޯމްތަކުން ކުރެވޭ ބޭރު ފައިސާގެ މުޢާމަލާތްތަކަށް ބީއެމްއެލްއިން ނަގާ 30 އިންސައްތަ ފީއަކީ ކުރިން ނުރަސްމީކޮށް އޮތް ޑޮލަރު-ރުފިޔާގެ ޕެރަލަލް މާކެޓަށް ރަސްމީ ހައިސިއްޔަތެއް ދިނުމާއެކު މަތީ އެކްސްޗޭންޖް ރޭޓެއް ސާބިތުކޮށްދޭ ކަމެކެވެ.

ގިނަ އެކްސްޗޭންޖް ރޭޓު ހިމެނޭ ނިޒާމެއް ރަސްމީކުރުމުގެ ހާލަތަށް އާދެވިފައި މިވަނީ މިހާރުގެ ޕީއެންސީ ސަރުކާރުގެ ސީދާ ފެއިލްވުމެއްގެ ގޮތުގައި ކަމަށް ފައްޔާޒް ވިދާޅުވިއެވެ. އަދި މިއީ އިޤްތިޞާދީ ހަމަޖެހުމެއްނެތި ނުބައިކޮށް މެނޭޖްކުރެވިފައިވާކަމުގެ ނިޝާނެއް ކަމަށާއި، މިއީ ނުބައިކޮށް ގެންގުޅެފައިވާ އިޤްތިޞާދީ އަދި ބޭރު ފައިސާގެ ސިޔާސަތުތަކުގެ ސިލްސިލާއެއްގެ ތެރެއިން އިތުރު ކަންބޮޑުވާންޖެހޭ ފިޔަވަޅެއް ކަމަށް ފައްޔާޒް ވިދާޅުވިއެވެ. ފައްޔާޒް ވިދާޅުވީ މިއީ ސިޔާސަތުތަކުގެ ފެއިލްވުމުގެ ބުރަ އާންމު ރައްޔިތުންގެ ބޮލުގައި އެޅުވުން ކަމަށެވެ.

ފައްޔާޒް ވަނީ އިއާދަނުކުރެވޭ ވަރުގެ ގެއްލުމެއް ވުމުގެ ކުރިން، ޤާބިލު ފަންނީ މާހިރުންނާއި ވިޔަފާރި ދާއިރާގެ ފަރާތްތަކާ މަޝްވަރާކޮށް އަވަސް އިޞްލާޙީ ފިޔަވަޅުތަކެއް އެޅުމަށް ސަރުކާރަށް ގޮވާލާފައެވެ.

ރައީސް ޑރ. މުހައްމަދު މުއިއްޒުގެ ފުލް ކޮންޓްރޯލް އޮންނަ ބީއެމްއެލްއިން ނިންމާފައިވާ ނިންމުމުގައި ވަނީ ޑެބިޓް ކާޑުތަކުން ރާއްޖޭން ޑޮލަރު އެންމެ ގިނައިން ބޭރުކުރެވޭ އެއްކަމަކީ އިންޓަނެޓް މެދުވެރިކޮށް ބައެއް ފަރާތްތަކުން މަދު ސައިޓްތަކުން ވިޔަފާރީގެ ބޭނުމަށް މުދާ ގެނައުމަށް ފައިސާ ދެއްކުން ކަމަށެވެ. އެހެންކަމުން މިގޮތަށް ފާހަގަކުރެވޭ ބައެއް މަދު ސައިޓްތަކުން (މިވަގުތު ޓީމޫ، ޝީއިން، އަލިބާބާ، އަލި އެކްސްޕްރެސް، ލަޒާޑާ އަދި އީބޭ އިން އެކަނި) ފައިސާދައްކާއިރު %30 އާ ހަމައަށް ފީއެއް ނެގޭނެ ކަމަށް އެބޭންކުން ބުނެއެވެ.

މީގެ އިތުރުން 500 ޑޮލަރަށް ޑެބިޓް ކާޑުގެ ލިމިޓް ބޮޑުކޮށްފައިވާ ކަމަށް ބޭންކުން ބުނި ނަމަވެސް، މިހާރު ލިބޭ 250 ޑޮލަރުގެ އިތުރުން 250 ޑޮލަރު އިތުރުކޮށްފައިވާއިރު، 500 ޑޮލަރު ބޭނުންކޮށްފިނަމަ 150 ޑޮލަރުގެ ފީއެއް ބީއެމްއެލްއިން ކަނޑާނެއެވެ. މިއީ ދިވެހި ރުފިޔާއިން ބަލާނަމަަ 2343.84 ރުފިޔާއެވެ.