ރައީސް ޔާމީން އަށް ގާނޫނީ ފިޔަވަޅު އެޅިދާނެ ކަމަށް ބުނެ ކްރިމިނަލް ކޯޓުން އިންޒާރެއް ދީފި

ކްރިމިނަލް ކޯޓުގެ ޝަރީއަތެއް ތާވަލުކޮށްފައި ވަނިކޮށް، ކޯޓުގެ ހުއްދައަކާ ނުލައި ހއ. ދިއްދޫއަށް ވަޑައިގެންނެވުމާއި ގުޅިގެން ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ މައްޗަށް ގާނޫނީ ފިޔަވަޅު އެޅިދާނެ ކަމަށް ބުނެ ކްރިމިނަލް ކޯޓުން އިންޒާރު ދީފިއެވެ.

ފުއްގިރި ކުއްޔަށް ދޫކުރި މައްސަލައިގައި ޔާމީންގެ މައްޗަށް ދައުލަތުން ކުރާ ރިޝްވަތު ގަބޫލުކުރުމާއި މަނީ ލޯންޑަރިންގެ ދައުވާތަކުގެ އަޑުއެހުން ހޯމަ ދުވަހުގެ މެންދުރުފަހު 2:30 އަށް އޮތީ ތާވަލުކޮށްފަ އެވެ. ނަމަވެސް އެ އަޑުއެހުން އޮތް ދުވަހު ޔާމީން ވަނީ ހއ. އަތޮޅު ކައުންސިލްގެ ދައުވަތަކަށް އެ އަތޮޅު ދިއްދޫއަށް ވަޑައިގެންފައެވެ.

ދިއްދޫއަށް ފުރާވަޑައިގަތުމުގެ ކުރިން ޔާމީން ވަނީ އަޑުއެހުން އޮންލައިންކޮށް ކުރިއަށް ގެންގޮސްދިނުމަށް އެދި ކްރިމިނަލް ކޯޓަށް ސިޓީއެއް ފޮނުއްވާފައެވެ. ނަމަވެސް ކްރިމިނަލް ކޯޓުން އެ ސިޓީއަށް ޖަވާބު ދީފައެއް ނުވެ އެވެ. އަދި ޔާމީން ޝަރީއަތަށް ހާޒިރުނުވުމާ ގުޅިގެން އެ އަޑުއެހުން ވަނީ ކެންސަލްކޮށްފައެވެ.

ކްރިމިނަލް ކޯޓުން ބުނީ ދައުވާ ލިބޭ ފަރާތުން މަގުބޫލު ސަބަބެއް ނެތި ކޯޓަށް ހާޒިރުނުވުމާއި، މައްސަލަ ތާވަލުކޮށްފައި ވަނިކޮށް ކޯޓުގެ ހުއްދަނެތި ކޯޓު ހުރި ރަށުން ފުރައިގެން ދިއުމަކީ ގާނޫނީ ފިޔަވަޅު އެޅިދާނެ އަމަލެއް ކަމަށެވެ.

ޔާމީން ދިއްދޫއަށް ވަޑައިގެންފައިވަނީ ހއ. އަތޮޅު ކައުންސިލުން އިންތިޒާމުކޮށްގެން ބާއްވާ "ތިލައުތުރު އެވޯޑް 2025" ހަފުލާ ޝަރަފުވެރި ކޮށްދެއްވުމަށެވެ. މި އެވޯޑަކީ ހއ. އަތޮޅަށް އެކި ދާއިރާތަކުން ހިދުމަތްތައް ކޮށްދެއްވާފައިވާ ފަރާތްތަކުގެ އަގުވަޒަން ކުރުމަށް ބާއްވާ އެވޯޑެކެވެ. މި އެވޯޑު ހަފުލާ ޝަރަފުވެރިކޮށްދެއްވުމަށް ރައީސް މުހައްމަދު މުއިއްޒުއަށް ވެސް ދައުވަތު ދެއްވި ނަމަވެސް އެ ދައުވަތު ގަބޫލުކުރައްވާފައެއް ނުވެއެވެ.