ރައީސް ޑރ. މުހައްމަދު މުއިއްޒުގެ ސަރުކާރުން ވެލާނާ އިންޓަރނޭޝަނަލް އެއަރޕޯޓުގެ ސީއައިޕީ ޓާމިނަލްގެ ދެ ފަންގިފިލާ ޖެޓެކްސްއަށް ދޭން ނިންމާފައިވާ އިރު، އެއާޕޯޓްގެ ބައެއް ދިގު މުއްދަތަކަށް ބަޔަކަށް ދެނީ، މިހާރުގެ ވެރިންގެ ޖީބަށް ބައެއް ލުމަށް ކަމަށް ރައްޔިތުންގެ މަޖިލީހުގެ ފުވައްމުލަކު މެދު ދާއިރާގެ ކުރީގެ މެމްބަރު ހުސެއިން މުހައްމަދު ވިދާޅުވެއްޖެއެވެ.

އޭނާ އެފަދައިން ވިދާޅުވީ ބުރާސްފަތި ދުވަހުގެ ރޭ އެމްޑީޕިގެ ހަރުގެ ޖަލްސާގައި ވާހަކަދައްކަވަމުންނެވެ.

އެ ޖަލްސާގައި ވާހަކަދައްކަވަމުން، ވީއައިއޭ ކުޑަ އަގެއްގައި ވިއްކާލަން އުޅޭކަމުގެ އަޑުތައް މިހާރު ގަދަ ވެފައިވާ ކަަމަަށާއި ސަރުކާރުން މަސައްކަތް ކުރަނީ ބޭރު ބަޔަކަށް މިތަން ވިއްކާލަން ކަމަށް އޭނާ ވިދާޅުވިއެވެ. މިހާރުގެ ރައީސް ޑރ.މުހައްމަދު މުއިއްޒުގެ ލަފަޔާއި ނުލާ އެކަން ކުރާނެ ކަމަށް ޤަބޫލު ނުކުރެވޭ ކަމަށް އޭނާ ވިދާޅުވިއެވެ.

" މި ވިއްކާލަނީ ވެސް 25 އަހަރަށް އެއީ ދިގު މުއްދަތެއް. އެއީ އަންނަން ޖީލަށް ލިބެން ހުރި ޑިވިޑެންޓުގެ ބޮޑު ބައެއް މި މީހުންގެ ޖީބަށް ކުޑަ އަގެއްގައި ދިނުން. މިހާރުގެ ވެރިންނަށް ބޮޑު އަދަދެއް ނެގުމަށް ފަހު އެކަން ކުރުމަށް މަސައްކަތް ކުރަނީ." އޭނާ ވިދާޅުވިއެވެ.

ރައްޔިތުންގެ ހައްގުތައް ދުވަހެއް ދުވަހަކަށް ދަނީ ހަނިކުރަމުން ކަމަށް އޭނާ ވަނީ ވިދާޅުވެފައެވެ. ކުންފުނިތައް މެދުވެރިކޮަށް ކަންކަން ކުރާ އިރު ވެސް ޚިޔާނާތްތެރިވަމުންދާ ކަަމަށް އޭނާ ވިދާޅުވިއެވެ. އަދި މި ސަރުކާރުން ދަނީ ޤައުމު ލޫޓުވާލަމުން ކަަމަށް އޭނާ ވަނީ ސިފަކުރައްވާފައެވެ. އެހެންކަމުން ހަނު ތިބެގެން، މަޑުން ތިބެގެން ފަރު ޖެހެން ނެތް ކަމަށް އޭނާ ވިދާޅުވިއެވެ.

ރާއްޖެއެމްވީއަށް އިތުބާރު ހުރި މަސްދަރަކުން މައުލޫމާތު ލިބިފައިވާ ގޮތުގައި ވެލާނާ އިންޓަރނޭޝަނަލް އެއަރޕޯޓުގެ ސީއައިޕީ ޓާމިނަލްގެ ދެ ފަންގިފިލާ ޖެޓެކްސްއަށް ދިނުމަށް ނިންމާފައިވަނީ ދާދިފަހުން ވެލާނާ އެއަރޕޯޓު ހިންގާ މޯލްޑިވްސް އެެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ބޯޑަށް ގެނެވުނު ބަދަލަކާއި، ރައީސްގެ އަރިސް އަދި ރައީސް އޮފީހުގެ ބާރުގަދަ ސިޔާސީ މަގާމެއްގައި ހުރި ފަރާތެއްގެ ނުފޫޒާއެކުއެވެ.

ޖެޓެކްސް އަކީ ޔުނައިޓެޑް އަރަބް އެމިރޭޓްސްގެ ދުބާއީގައި ހުންނަ ޕްރައިވެޓް އޭވިއޭޝަން އެންޑް ފްލައިޓް ސަޕޯޓް ކުންފުންޏެކެވެ. މެދުއިރުމައްޗާއި ޔޫރަޕާއި އޭޝިއާ ޕެސިފިކް އާއި އެފްރިކާ އަދި އެމެރިކާ ހިމެނޭ ގޮތަށް ދުނިޔޭގެ 50 އަށް ވުރެ ގިނަ ތަންތަނުގައި 38 ފިކްސްޑް ބޭސް އޮޕަރޭޓަރުންނާއި ގްރައުންޑް ހޭންޑްލިން ސްޓޭޝަން އެ ކުންފުނިން ހިންގަ އެވެ.