ސަލާން ޖެހުމުގެ އާދަ ނައްތާލީ އެމްޑީޕީން، ނަމަވެސް މި ސަރުކާރުން ގައުމު ގެންދަނީ އެ މިސްރާބަށް: ފައިސަލް
26 ޖޫން 2025 | ބުރާސްފަތި 07:15އެމްޑީޕީ ވުޖޫދުވެގެންއައީ އިސްލާހީ ހަރަކާތްތަކުގެ މަސައްކަތާއެކު
އެމްޑީޕީގެ އަހަރީ ދުވަސް ފާހަގަކޮށް، ދިދަ ނަގުމަށް ކުރިއަށް ގެންދިޔަ ޚާއްސަ ހަރަކާތުގައި ރާއްޖެއެމްވީއަށް ކުރީގެ ނައިބު ރައީސް ފައިސަލް ނަސީމް އިންޓަވިއު ދެއްވަނީ
ދިވެހިރާއްޖެއިން ސަލާން ޖެހުމުގެ އާދަ ނައްތާލީ އެމްޑީޕީން ކަމަށާއި، ނަމަވެސް މިސަރުކާރުން ގައުމު އެ މިސްރާބަށް ގެންދިއުމަށް މަސައްކަތް ކުރާ ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެއެވެ.
ބުރާސްފަތި ދުވަހުގެ ހެނދުނު އެމްޑީޕީގެ އަހަރީ ދުވަސް ފާހަގަކޮށް، ދިދަ ނަގުމަށް ކުރިއަށް ގެންދިޔަ ޚާއްސަ ހަރަކާތުގައި ރާއްޖެއެމްވީއަށް ފައިސަލް ވިދާޅުވީ އެމްޑީޕީ ވުޖޫދުވެގެންއައީ އިސްލާހީ ހަރަކާތްތަކުގެ މަސައްކަތާއެކު ކަމަށާއި، ދިވެހި ރައްޔިތުންގެ ހައްގުތައް ހޯދައިދިނީ އެމްޑީޕީން ކަމަށެވެ. އެދުވަސްވަރު އެމްޑީޕީގެ މެންބަރުން ބުރަ މަސައްކަތްތަކެއް ކުރި ކަމަށާއި، ޖަލުގެ ތެރެއިންނާއި، އެކި ގޮތްގޮތުން ގިނަ އަނިޔާތަކެއް ވެސް ލިބިގެންދިޔަ ކަމަށެވެ. އަދި މިއަދު މިދެކޭ ދުލުގެ މިނިވަންކަމާ، ހަގީގީ މިނިވަންކަމުގެ އުފާ ދިވެހި ރައްޔިތުންނަށް ލިބިފައިވަނީ އެމަސައްކަތުގެ ތެރެއިން ކަމަށް ފައިސަލް ވިދާޅުވިއެވެ.
ލާމަރުކަޒީ ނިޒާމަށް އިޝާރާތް ކުރައްވައި ފައިސަލް ވިދާޅުވީ ރަށްރަށުގެ ރައްޔިތުންގެ ހައްގުތައް ކަށަވަރުކޮށްދީ، ރައްޔިތުން ބާރުވެރިކުރީ އެމްޑީޕީން ކަމަށާއި، ރަށްރަށުގެ ކަންކަން ނިންމުމުގެ ބާރު ރައްޔިތުންނަށް ލިބެންޖެހޭ ކަމަށެވެ.
ނަމަވެސް ރައީސް ޑރ.މުހައްމަދު މުއިއްޒުގެ ސަރުކާރާއެކު ހުރިހާ ކަމެއް ވެސްދަނީ ފަހަތަށް ސޮއްސާލައިގެން ކަމަށާއި، ހައްގުތައް ހަނިވެ، ބާރުތައް ނެނގޭ މަންޒަރު ފެންނަމުންދާ ކަމަށެވެ. އަދި ކުރިއަށް އެޅޭ ފިޔަވަޅު ފަހަތަށް އަޅާ ކަމަށްވާނަމަ ދުވަހަކު ވެސް މި ގައުމު ކުރިއަށް ނުދާނެ ކަމަށް ފައިސަލް ވިދާޅުވިއެވެ.
ކައުންސިލަރުން މަދުކުރުމަށް ސަރުކާރުން މަސައްކަތް ކުރަމުންދާތީ އެކަމަށް ފައިސަލް ވަނީ ފާޑު ވިދާޅުވެފައިވެއެވެ. އަދި ވިދާޅުވީ އެ ބަދަލު ގެނައުމަށް މަސައްކަތް ކުރަނީ ނިޒާމު ކޮންޓްރޯލް ކުރަން ކަމަށާއި، އެއީ ހަރަދު ކުޑަ ކުރުމުގެ އިހުލާސްތެރިކަމެއް އޮވެގެން ގެންނަ ބަދަލެއް ނޫން ކަމަށެވެ.
މީގެ އަހަރުތަކެއް ކުރިއަށް އަޅާބަލާއިރު، މިދެންނެވި ގޮތަށް ލާމަރުކަޒީ ނިޒާމެއް ގާއިމްކުރެވިގެން ފައްކާ ކުރެވިގެން ބާރުވެރިކުރެވިގެން ދިޔާމަ އޭގެ ފައިދާތަކެއް އެބަ ފެނޭ ރަށްރަށުގެ ތަރައްގީއާއި، އަދި ރަށްރަށުގެ ރައްޔިތުން އިސްނަގައިގެން ކަންކަން ކުރޭ. މިއަދު މީގެ ހުރިހާ ވެސް ބޭނުމަކީ ކޮންޓްރޯލް ކުރުން ކަންތައްތައް. މިހާރު އަޅުގަނޑުމެން ރައްޔިތުން ބޭނުންނުވި ހުރިހާ ކަމެއް ބަޔެއްގެ ކޮންޓްރޯލް ދަށުގައި އޮންނާކަށް. ފިޔަވަޅު އަޅަންވީ ހުރިހާ ކަމެއް ފިޔަވަޅު އަޅަންވީ. ހަރަދު ކުޑަކުރަން އަޅާ ފިޔަވަޅެއް ކަމަށް ބުނެ އެކަމާ ސުވާލު އުފެދޭ. އަމިއްލައަށް އައްޔަން ކުރާ އެތައް ބަޔަކު އެބަ ތިބި. ގިނަ ފަރާތްތަކަކީ ކުރާނެ ކަމެއް ނެތް ބައެއް. މިއީ އިހްލާސްތެރިކަމާއެކު ކުރެވޭނެ ކަމެއް ނޫން. ރައްޔިތުންގެ މަޖިލީހަށް ވެސް މީގެ ބަދަލުތަކެއް އަންނަންޖެހޭ. މަޖިލިސް މެންބަރުން ވެސް އެބަޖެހޭ ކޮންޓްރޯލް ކުރެވެން. މިއީ އިހުލާސްތެރިކަމާއެކު ކުރެވޭ ކަމެއް ނޫން. މީގެ ބޭނުމަކީ ކޮންޓްރޯލްކޮށް އިންތިޚާބުތަކަށް ނުފޫޒު ފޯރުވުން. ކޮންމެ ކަމަކަށް ވިސްނުމުގައި އިންތިޚާބުތަކަށް ނުފޫޒު އަދި ލޯކަލް ކައުންސިލް އިންތިޚާބު ކުރިއަށް މިއޮތީ. ހޭލަން އެބަ ތިބެންޖެހޭ.ކުރީގެ ނައިބު ރައީސް ފައިސަލް ނަސީމް
ފައިސަލް ވިދާޅުވީ އިސްލާހަށް ތާއީދުކުރާ ހުރިހާ ރައްޔިތުން ވެސް ގައުމުގެ މިސްރާބު ބަދަލު ކުރަން މަސައްކަތް ކުރަންޖެހޭ ކަމަށެވެ. ބުރަ މަސައްކަތުުން ހޯދިފައި އޮތް އެއްވެސް ހައްގަކަށް އުނިކަމެއް ނުވަތަ ގެއްލިގެންދާ މަންޒަރު ބަލަން ތިބެގެން ނުވާނެ ކަމަށް ފައިސަލް ވިދާޅުވިއެވެ. އަދި ވިދާޅުވީ ހައްގުތައް ހޯދާ ހައްގުތައް ހިފެހެއްޓޭނެ ގޮތްތައް ހޯދަންޖެހޭ ކަމަށާއި، ސަލާން ޖެހުމުގެ އާދަ ރާއްޖެއިން ނައްތާލުމަށް އެމްޑީޕީން ކުރި މަސައްކަތްތައް ކުރަންޖެހޭ ކަމަށެވެ.
ޕާޓީގެ ހަޔާތުގައި 20 އަހަރު ވެގެންދިޔައިރުގައި އަޅުގަނޑުމެންނަށް ވަރަށް ގިނަ ކަންތައްތައް ސަލާން ޖެހުމުގެ އާދަ ދިވެހިރާއްޖެއިން ނައްތާލުމަށްޓަކައި އެމްޑީޕީން ނުކުތީ. ދަތުރުފަތުރުގެ ނިޒާމެއް ގާއިމްކުރުމަށްޓަކައި އެމްޑީޕީން ނުކުތީ. އާސަންދަ ނިޒާމު އެންމެނަށް ހަމަހަމަކަމާއެކު ލިބޭނެ ނިޒާމެއް، އުމުރުން ދުވަސްވީ ފަރާތްތަކަށް، އެކަނިވެރި އާއިލާތަކަށް މިހެން ގޮސް ލިސްޓު ކިޔަންޏާ މިހުރީ ބައިވަރު ކަންކަން. ރަށުގައި ތިބެގެން ކައިރިން ޚިދުމަތް ލިބޭނެ ގޮތްތައް އެމްޑީޕީން. މިއަދު މިފެންނަނީ ވަރަށް ބުރަކޮށް މަސައްކަތްކޮށް ހޯދުނު ކަންތައްތައް އަނެއްކާ ވެސް ފަހަތަށް މުޅިންއެހެން ގޮތަކަށް ބަދަލުކުރަން މަސައްކަތް ކުރާތަން މިފެންނަނީ. އެހެންވީމަ އަޅުގަނޑު ހަމަ އެމްޑީޕީގެ އެންމެހާ ތޮބުވެތި މެންބަރުންނަށް އަދި އިސްލާހަށް ތާއިދުކުރާ އެންމެހާ ރައްޔިތުންނަށް މިމަސައްކަތަށް ވަޑައިގަންނަވާށޭ. މިއަދު މިފެންނަނީ ވަރަށް ބަނަކޮށް މިގައުމުގެ މުސްތަގުބަލް. އެކަމުގައި މަސައްކަތް ކުރިއަށް އޮތް ލޯކަލް ކައުންސިލް އިންތިޚާބު ކާމިޔާބު ކުރުމަށް މަސައްކަތްތަކެއް ކުރަންޖެހޭ. އެމްޑީޕީއަކީ ވަކި މީހަކަށް ނިސްބަވްވާ ޕާޓީއެއް ނޫން.ކުރީގެ ނައިބު ރައީސް ފައިސަލް ނަސީމް
ފައިސަލް ވިދާޅުވީ އެމްޑީޕީން ރައްޔިތުންނަށް ޚިދުމަތް ކުރާނެ ކަމަށާއި، ދުނިޔޭގައި ނެތް ތަރައްގީގެ ވާހަކަ ދައްކައި، ރައްޔިތުންނަށް އޮޅުވާލުމަށް މަސައްކަތް ނުކުރާނެ ކަމަށެވެ.
އެމްޑީޕީއަކީ ހުރިހާ މެންބަރުންގެ މައްޗަށް އެކުލެވޭ ޕާޓީއެއް ކަމަށްވާއިރު، މި ޕާޓީއާއެކު އެންމެން އެކުގައި މަސައްކަތް ކުރަންޖެހޭ ކަމަށް ފައިސަލް ވިދާޅުވިއެވެ. އަދި ވިދާޅުވީ ކުރިއަށް އޮތް ލޯކަލް ކައުންސިލް އިންތިޚާބު ކާމިޔާބުކޮށް، 2028 ވަނަ އަހަރުގެ ރިޔާސީ އިންތިޚާބު ވެސް އެމްޑީޕީން ކާމިޔާބު ކުރަންޖެހޭ ކަމަށެވެ.
