ހޮނިހިރު ދުވަހު ފަތިހުން ފެށިގެން އިސްރާއީލުން ދިން ހަމަލާ ތަކުގައި 17 މީހުން ޣައްޒާ ގައި ޝަހީދު ވެއްޖެ

ހޮނިހިރު ދުވަހުގެ ފަތިހުއްސުރެ އިސްރާއީލުގެ ހަމަލާތަކުގައި މަދުވެގެން 17 ފަލަސްތީނު މީހުން ޣައްޒާ ސްޓްރިޕްގައި ޝަހީދު ވެއްޖެ ކަމަށް، ޣައްޒާ ގެ ޞިއްޙީ މަސްދަރުތަކުން ހާމަކުރި މަޢުލޫމާތައް ޙަވާލާދީ މީޑިއާ ރިޕޯޓުތަކުން ބުނެއެވެ.

ޝަހީދުވި މީހުންގެ ތެރޭގައި ޣައްޒާގެ މެދުތެރޭގައި އޮންނަ ދީރު އަލް-ބަލާޙް ސިޓީގައި ޓެންޓެއްގައި ދިރިއުޅެމުންދިޔަ އެއް ޢާއިލާއަކަށް ނިސްބަތްވާ ތިން މީހުން ހިމެނޭކަމަށް އަލް-އަޤްޞާ ޝަހީދުންގެ ހޮސްޕިޓަލުން ބުނެފައިވެއެވެ.

އަލް-ޝިފާ ހޮސްޕިޓަލުން ބުނާ ގޮތުގައި ޣައްޒާ ސިޓީގެ ރަމާލް އަދި ޝައިޚް ރަޟްވާން ސަރަޙައްދުތަކުގައި ވަކިވަކިން ދެވުނު ހަމަލާތަކުގައި އިތުރު ހަތަރު މީހުން ޝަހީދު ވެފައި ވެއެވެ.

އަލް-އަހްލީ ހޮސްޕިޓަލުން ހާމަކުރި ރިޕޯޓުތަކުގައިވާ ގޮތުން، ޣައްޒާ ސިޓީގެ އިރުމަތީގައިވާ ތުއްފާޙް ސަރަޙައްދުގެ ޖާފާ މަގުގައި ހުރި ގެއަކަށް އިސްރާއީލުން ދިން ބޮމުގެ ހަމަލާއެއްގައި އިތުރު ހަތަރު މީހުން ޝަހީދުވެ، 10 މީހުން ޒަޚަމްވެފައިވެއެވެ.

މީގެ އިތުރުން، ހުކުރު ދުވަހު ޣައްޒާ އަށް އިސްރާއީލުން ދިން ހުއްޓުމެއް ނެތް ހަމަލާތަކުގައި މަދުވެގެން 45 ފަލަސްތީނުން ޝަހީދު ވެފައިވާ ކަމަށާއި، އޭގެ ތެރޭގައި، އެހީ ހޯދަން އުޅުނު މީހުންގެ ތެރެއިން މަދުވެގެން 10 މީހުން ހިމެނޭ ކަމަށް މީޑިއާ ރިޕޯޓުތަކުން ދައްކައެވެ.

އދ. އިން ބުނާ ގޮތުގައި މޭ މަހުގެ ފަހުކޮޅުން ފެށިގެން، އެމެރިކާ އަދި އިސްރާއީލުގެ އެހީތެރިކަން ލިބޭ ޣައްޒާ ހިއުމެނިޓޭރިއަން ފައުންޑޭޝަން (ޖީއެޗްއެފް) އިން އެހީ ހޯދަން އުޅުނު 800 އެއްހާ ފަލަސްތީނު މީހުންގެ ފުރާނަ ގެއްލިފައި ވެއެވެ.

ބުރާސްފަތި ދުވަހު، ޣައްޒާގެ ދީރު އަލް-ބަލަޙް ސިޓީގައި ނިއުޓްރިޝަނަލް ސަޕްލިމެންޓް ހޯދުމަށް ކިއު ގައި ތިބި މީހުންގެ ތެރެއިން 15 މީހުން އިސްރާއީލުގެ ސިފައިން ޝަހީދު ކޮށްލާފައިވެއެވެ. މީގެ ތެރޭގައި 9 ކުޑަކުދިންނާއި 4 އަންހެނުން ހިމެނެއެވެ.

7 އޮކްޓޯބަރު 2023 ގައި ފެށުނު ނަސްލު ފޮހެލުމުގެ ހަނގުރާމައިގައި، ޣައްޒާގެ ޞިއްޙަތާ ބެހޭ މިނިސްޓްރީން ބުނާ ގޮތުގައި އިސްރާއީލުގެ ހަމަލާތަކުގައި މަދުވެގެން 57,762 މީހުން މަރުވެ، 137,656 މީހުން ޒަޚަމް ވެފައިވެއެވެ.