ސިއްހީ ދާއިރާ ކުރި އެރުވުމާއި ގިނަ ދިރާސާތަކެއް ހައްދަވާފައިވާ ޑރ. އިބްރާހިމް މުޞްޠަފާ އަވަހާރަވެއްޖެ
11 ޖުލައި 2025 | ހުކުރު 11:21ޑރ. މުސްތަފާ އަކީ ތައުލީމީ ގޮތުން މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ ހާއްސަ އިނާމު 2012 ވަނަ އަހަރު ހާސިލުކުރައްވައިފައިވާ ބޭފުޅެކެވެ.
ޑރ. އިބްރާހީމް މުސްތަފާ
ޞިއްޙީ ދާއިރާ ކުރިއެރުވުމަށާއި ދިރާސާތައް ކުރެއްވުމުގައި، ރާއްޖެއާއި ރާއްޖެއިންބޭރުގެ ބައެއް ޤައުމު ތަކުގައިވެސް މުހިންމު ޚިދުމަތްތަކެއް ކޮށްދެއްވައިފައިވާ ޑރ. އިބްރާހިމް މުޞްޠަފާ އަވަހާރަވެއްޖެއެވެ.
މައުލުމާތު ލިބިފައިވާ ގޮތުގައި އައްޑޫސިޓީ، ހުޅުދޫއަށް އުފަން ޑރ. އިބްރާހިމް މުސްތަފާ އަވަހާރަވެފައިވަނީ ރޭގެ ވަގުތެއްގައި އިންޑިއާގެ ކޮޗިން ގައެވެ. އޭނާ އަވަހާރަވިއިރު، އުމުރަކީ 57 އަހަރެވެ.
ޑރ. މުސްތަފާ އަކީ ތައުލީމީ ގޮތުން މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ ހާއްސަ އިނާމު 2012 ވަނަ އަހަރު ހާސިލުކުރައްވައިފައިވާ ބޭފުޅެކެވެ.
އާލާސްކަންފުޅާ އުޅުއްވާތާ ގިނަ ދުވަސްތަކެއްވެފައިވާ ޑރ. އިބްރާހިމް މުސްތަފާ ކޮޗިންއަށް ގެންދެވުނީ އިތުރު ފަރުވާއަށެވެ. ނަމަވެސް އޭނާ ފަރުވާ ހޯއްދަވަމުން ގެންދެވީ ކޮން ބައްޔަކަށް ކަމެއް އެނގިފައެއް ނުވެއެވެ.
ޑރ. އިބްރާހިމް މުސްތަފާގެ ޖަނާޒާ ބޭއްވުމަށް ހަމަޖެހިފައިވަނީ މިއަދުގެ އަސުރު ނަމާދަށްފަހު، ކޮޗިންގައެވެ.
