އަންނަ 2026 ވަނަ އަހަރަށް ލަފާކުރާ ދައުލަތުގެ ބަޖެޓުގައި ސިއްހީ ދައިރާއަށް 8.8 ބިލިޔަން ރުފިޔާ ކަނޑައަޅާފައި ވީ ނަމަވެސް ހުޅުމާލޭގައި އިތުރު ހޮސްޕިޓަލެއް އަޅަން ފަންޑު ހޯދަމުންދާ ކަމަށް ހެލްތު މިނިސްޓަރު އަބްދުﷲ ނާޒިމް ވިދާޅުވެއްޖެ އެވެ.

ބުދަ ދުވަހުގެ ރައްޔިތުންގެ މަޖިލީހުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރު ވިދާޅުވީ މި ސަރުކާރުގެ ސިޔާސަތަކީ ހުޅުމާލޭގައި އިތުރު ހޮސްޕިޓަލެއް އެޅުމުގެ މަސައްކަތް ކުރިއަށް ގެންދިއުން ކަމަށެވެ.

އަދި އެކަން ކުރުމަށްޓަކައި ފައިނޭންސް އުސޫލުން މަޝްރޫއު ކުރިއަށް ގެންދާނެ ބަޔަކު ހޯދަމުން ދާ ކަމަށް މިނިސްޓަރު ވިދާޅުވި އެވެ.

ކޮންޓްރެކްޓަރ ފައިނޭންސް އުސޫލުން ހުޅުމާލޭގައި އިތުރު ހޮސްޕިޓަލެއް އެޅުމުގެ މަސައްކަތް ކުރަމުން ދާ ކަމަށް މިނިސްޓަރު ވިދާޅުވި އިރު މިއީ މީގެ ކުރިން ސަރުކާރުން އިއުލާންކުރި މަޝްރޫއުއެއް ނޫނެވެ.

މި ސަރުކާރުން ފާސް ކުރި ދެ ބަޖެޓުގައި ވެސް އެއްވެސް މަޝްރޫއެއް ގެ ތަފްސީލު ހިމަނާފަ އެއް ނުވެ އެވެ. މިކަމާ ގުޅިގެން ގިނަ ބަޔަކު ކަންބޮޑުވުން ފާޅު ކުރަމުންދާއިރު އެންމެ ބޮޑު އަދަދެއް ބަޖެޓުން ކަނޑައަޅާފައިވާ ސިއްހީ ދާއިރާ އަށް ކުރަން ނިންމާފައިވާ ކަންކަމަކީ ކޮބައިތޯ ވެސް ގިނަ ބަޔަކު ދަނީ ސުވާލު އުފައްދަމުންނެވެ.

މަޝްރޫއު ތަކުގެ ތަފްސީލު ހިއްސާ ކުރުމަށް ގިނަ ބަޔަކު ގޮވާލަމުން ދަނިކޮށް މިނިސްޓަރު މި ވަނީ އެންމެ ބޮޑު އިންސައްތައެއް އެ ދާއިރާ އަކަށް ކަނޑައަޅާފައިވާ ސިއްހީ ދާއިރާގެ މަޝްރޫއެއް ކުރިއަށް ގެންދިއުމަށް ފަންޑު ހޯދުމަށް މަޝްވަރާ ކުރަމުންދާ ކަން ހާމަ ކުރައްވާފަ އެވެ.

މިއާއެކު ސިއްހީ ދާއިރާ އަށް ބަޖެޓުން ކަނޑައަޅާފައިވާ 8.8 ބިލިއަން ރުފިޔާ އިން ސަރުކާރުން ކުރަން ނިންމާފައި ވަނީ ކޮން ކަމެއްތޯ ގިނަ ބަޔަކު ދަނީ ސުވާލު އުފައްދަމުންނެވެ. 2026 ވަނަ އަހަރަށް ލަފާކުރާ ދައުލަތުގެ ބަޖެޓުގައި ބޭސްފަރުވާގެ އެހީއާއި، ސިއްހީ އާލާތްތައް ހޯދުމަށްޓަކައި 1.15 ބިލިޔަން ރުފިޔާވަނީ ހިމަނާފަ އެވެ. އަދި ސިއްހީ ދާއިރާއިން އެކި ދިރާސާތައް ކުރުމަށްވަނީ 15 މިލިޔަން ރުފިޔާ ކަނޑައަޅާފަ އެވެ.

ޕީއެސްއައިޕީގެ ތެރެއިން ސިއްހީ ދާއިރާގެ ތަރައްގީ އަށް ވެސް ބޮޑު ބަޖެޓެއްވަނީ ކަނޑައަޅާފަ އެވެ. އެގޮތުން ސިއްހީ ދާއިރާގެ ޕީއެސްއައިޕީ މަޝްރޫއުތަކަށް 917 މިލިޔަނަށް ވުރެ ގިނަ ރުފިޔާ ވަނީ ކަނޑައަޅާފަ އެވެ. މީގެތެރެ އިން ވެސް ހޮސްޕިޓަލް ތައް ތަރައްގީ ކުރުމަށް 430 މިލިއަނަށް ވުރެ ގިނަ ރުފިޔާވަނީ ކަނޑައަޅާފަ އެވެ.