ރަށު ފެންވަރުގައި ހުރިހާ ލެބޯޓަރީ ޓެސްޓެއް ހެދޭނެ ކަމަށް ރައީސް ވިދާޅުވެފައިވާތީ ގިނަ ބަޔަކު ފާޑު ކިޔަނީ
އެތައް ބަޔަކު ބުނެފައިވަނީ މިއީ ތަފާތު ކުރުން އިންތިހާ އަށް ބޮޑު ސަރުކާރެއް ކަމަށް
ރައީސް ޑރ.މުހައްމަދު މުއިއްޒު ށ.ފުނަދޫ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަނީ
ރާއްޖޭގެ ހުރިހާ ރަށެއްގެ ސިއްހީ މަރުކަޒުގެ ލެބޯޓްރީގައި، އެ ރަށެއްގެ ފެންވަރުގައި ހުރިހާ ޓެސްޓުތަކެއް ހެދޭނެ ކަމަށް ރައީސް ޑރ.މުހައްމަދު މުއިއްޒު ވިދާޅުވެފައިވާތީ ގިނަ ބައެއްގެ ފާޑުކިޔުން އެމަނިކުފާނަށް އަމާޒުވެއްޖެއެވެ.
އެމަނިކުފާނު މިހެން ވިދާޅުވީ ށ. ނޫމަރާ އަށް ވަޑައިގެން އެ ރަށުގެ ރައްޔިތުންނާއި ބައްދަލުކުރައްވައި ވާހަކަފުޅު ދައްކަވަމުންނެވެ.
ރައީސް މުއިއްޒު ވިދާޅުވީ ކުރިިޔަށް އޮތް އަހަރުގެ ތެރޭގައި ރާއްޖޭގެ ހުރިހާ ރަށެއްގައި ލެބޯޓްރީ ހަދައި ނިންމާނެ ކަމަށެވެ.
އެގޮތުން ނޫމަރާގެ ލެބޯޓަރީ އަށް ބޭނުންވާ ހުރިހާ ވަސީލަތެއް ވެސް ފުރިހަމަ ކޮށްދެއްވާނެ ކަމަށާއި، ލެބޯޓަރީތަކުން އެ ރަށެއްގެ ފެންވަރުގައި ހެދޭ ހުރިހާ ޓެސްޓެއް މި އަންނަ އަހަރު ނިމުމުގެ ކުރިން ހެދޭނެ ކަމުގެ ޔަގީންކަން ދެއްވާ ކަމަށް ރައީސް މުއިއްޒު ވަނީ ވިދާޅުވެފައެވެ.
ރައީސް މުއިއްޒު މިމޭރުމުން ވާހަކަފުޅު ދައްކަވާފައިވާތީ، ގިނަ ބަޔަކު ވަނީ ރަށު ފެންވަރާއި، މާލެ ފެންވަރު އޮޅުން ފިލުވައިދިނުމަށް އެދިފައެވެ.
އަދި ބައެއް މީހުން ވަނީ ރަށު ފެންވަރުގެ ޓެސްޓްތައް ހުންނަންޏާ ރަށުފެންވަރުގެ ބަލިތައް ވެސް ހުންނާނެ ކަމަށް ބުނެ ފާޑު ކިޔާފައެވެ.
ރަށު ފެންވަރުގައި ސިއްހީ ޚިދުމަތް ނުލިބޭ ކަމަށާއި، މިސަރުކާރުގައި މީގެ ކުރިން އާސަންދައިން ފަސޭހައިން ލިބުނު ބޭސް ވެސް ނުލިބޭ ކަމުގެ ޝަކުވާ އާއްމު ރައްޔިތުން ކޮށްފައިވެއެވެ.
މީގެ އިތުރުން މިސަރުކާރަކީ ރައްޔިތުންގެ މެދުގައި ތަފާތުކުރުން އިންތިހާއަށް ގެންގުޅޭ ސަރުކާރެއް ކަމަށާއި، ރަށްރަށުގެ ކައުންސިލްތައް ނިކަމެތިކޮށް ރަށްރަށުގެ ތަރައްގީ އަށް ހުރަސްއަޅަމުންދާ ކަމަށް ވެސް ފާޑުކިޔާ މީހުން ބުނެފައިވެއެވެ.
ގިނަ ބައެއްގެ ފާޑުކިޔުން ރައީސް މުއިއްޒަށް އަމާޒުވެފައިވާއިރު، ށ. ފުނަދޫ ރައްޔިތުންނާ ބައްދަލުކުރައްވައި ރައީސް މުއިއްޒު ވިދާޅުވީ 2026 ވަނަ އަހަރުގެ ދައުލަތުގެ ބަޖެޓުން 500 މިލިޔަން ރުފިޔާ ސިއްހީ ދާއިރާއަށް، އަދި 500 މިލިޔަން ރުފިޔާ ތައުލީމީ ދާއިރާ އަށް އެކަށައަޅުއްވާނެ ކަމަށެވެ.
މި ބައްދަލުކުރެއްވުމުގައި ރައީސް ވަނީ، ސަރުކާރުން ތަރައްގީގެ މަސައްކަތްތައް ކުރައްވަމުންގެންދަވާ ތަރުތީބަށް އިޝާރާތްކުރައްވައި، އަންނަ އަހަރުގެ ދައުލަތުގެ ބަޖެޓު ވެގެންދާނީ، ތައުލީމީ ދާއިރާ އާއި ސިއްހީ ދާއިރާއަށް މީގެ ކުރިން ނުދޭވަރަށް އިސްކަންދީފައިވާ ބަޖެޓަކަށްކަމުގައި ވިދާޅުވެފައެވެ. އަދި މި ދެ ދާއިރާގެ ތަރައްގީ ކަށަވަރު ކުރެއްވުމަށް، ފުޅާ ދާއިރާއެއްގައި ކުރިއަށް ގެންދަވާނޭ އައު މަޝްރޫއުތަކެއް ބަޖެޓުގައި ހިމަނުއްވާނޭ ކަމަށް އެމަނިކުފާނު ވިދާޅުވިއެވެ.
ސިއްހީ ދާއިރާއާށް އަލިއަޅުއްވާލައްވަމުން، ރާއްޖެއިން ބޭރަށް ގޮސް ހަދަންޖެހޭ ޓެސްޓުތަކާއި ސަރޖަރީތައް، ރާއްޖޭގައި ހެދޭނޭ މަގުފަހިކުރުމަށްޓަކައި، 2026 ވަނަ އަހަރު ގިނަ މަސައްކަތްތަކެއް ކުރައްވާނޭ ކަމަށް ވިދާޅުވިއެވެ. އެގޮތުން މާލެ އާއި، ސަރަހައްދީ ހޮސްޕިޓަލުތަކާއި، ވަކި ވަކި ރަށްތަކެއްގައި ސިއްހީ ޚިދުމަތް ފުޅާ ކުރެއްވުމަށް މަސައްކަތްތައް ކުރިއަށް ގެންދަވާނޭ ކަމަށް ވެސް ވިދާޅުވިއެވެ. އަދި މި މަސައްކަތްތައް ކުރައްވާނީ ޕްރިވެންޓެޓިވް އަދި ކިއުރެޓިވް ހެލްތުކެއަރ އަށް ސަމާލުކަން ދެއްވައިގެންކަން އެމަނިކުފާނު ފާހަގަކުރެއްވިއެވެ.
މިސަރުކާރުގައި ތައުލީމީ ދާއިރާއާއި، ސިއްހީ ދާއިރާ އަށް އިސްކަން ދެއްވާ ކަމަށް ރައީސް މުއިއްޒު ވިދާޅުވި ނަމަވެސް މިސަރުކާރުގައި މިހާތަނަށް މިދެ ދާއިރާގެ ކުރިއެރުމަށް ބަދަލެއް ގެނެސްދެވިފައިނުވެއެވެ. ސިއްހީ ދާއިރާ އިންނާއި ތައުލީމީ ދާއިރާ އިން ކުރީ ސަރުކާރުން ފަށާފައި ގިނަ މަޝްރޫއުތައް ވެސް ހުރީ ހުއްޓިފައެވެ. ކުރިއަށް ދާ މަޝްރޫއުތައް ވެސް ދަނީ ވަރަށް މަޑުމަޑުންކަން ފާހަގަ ކުރެވެއެވެ.
