ސިއްހީ ދާއިރާއަށް ޚިދުމަތް ކުރުމުގެ އެންމެ މަތީ ޝަރަފު، އެ ދާއިރާއަށް 40 އަހަރަށް ވުރެ ގިނަ ދުވަހު ޚިދުމަތް ކުރެއްވި އަންވަރަށް
މޫސާ އަންވަރު ސިއްހީ ދާއިރާއާ ގުޅިވަޑައިގެންނެވީ އައްޑުއަތޮޅު ގަމުގައި ހުރި ރީޖަނަލް މެޑިކަލް ސެންޓަރުގެ ތަރުޖަމާނެއްގެ ހައިސިއްޔަތުން
ރާއްޖޭގެ ސިއްހީ ދާއިރާއަށް ޚިދުމަތް ކުރުމުގެ އެންމެ މަތިވެރި ޝަރަފު އެރުވި މޫސާ އަންވަރު
ރާއްޖޭގެ ސިއްހީ ދާއިރާއަށް ޚިދުމަތްކުރުމުގެ އެންމެ މަތިވެރި ޝަރަފު، ގ. ބަރޯސާ، މޫސާ އަންވަރަށް އަރުވައިފި އެވެ.
ޖުމްހޫރީ ދުވަހުގެ ރަސްމީ ޖަލްސާގައި މޫސާ އަންވަރަށް މި އިއްޒަތް އަރުވާފައި ވަނީ ރައީސް ޑރ. މުހައްމަދު މުއިއްޒު އެވެ.
މޫސާ އަންވަރު ސިއްހީ ދާއިރާއާ ގުޅިވަޑައިގެންނެވީ އައްޑުއަތޮޅު ގަމުގައި އިނގިރޭސީން ތިބި ދުވަސްވަރު، ގަމުގައި ހުރި ރީޖަނަލް މެޑިކަލް ސެންޓަރުގެ ތަރުޖަމާނެއްގެ ހައިސިއްޔަތުންނެވެ. އެ ވަޒީފާގައި ހުންނަވައިގެން ދާއިރާއިން ލިބެންހުރި ތަމްރީންތައް މޫސާ އަންވަރު ހޯއްދަވަން ފެއްޓެވި އެވެ.
ދަތުގެ ފަރުވާއިން ފެށިގެން އޮޕަރޭޝަން ތިއޭޓަރުގެ މަސައްކަތްތައް ވެސް މޫސާ އަންވަރު ކުރެއްވި އެވެ. ގަން ރީޖަނަލް މެޑިކަލް ސެންޓަރުގައި ކޮށްދެއްވި ޚިދުމަތްތަކުގެ އަގު ވަޒަންކުރުމުގެ ގޮތުން އޭއާރްއޭއެފް އިން ދެއްވި އޭއޯސީގެ ކޮމެންޑޭޝަން 1975 ވަނަ އަހަރު މޫސާ އަންވަރަށް ލިބިވަޑައިގެންފައިވެ އެވެ.
1977 ވަނަ އަހަރު، އޭރުގެ ރައީސް އިބްރާހީމް ނާސީރުގެ އެދިވަޑައިގަތުމަކަށް މާލެ ވަޑައިގަތުމަށްފަހު އަންވަރު ވަނީ ދައުލަތުގެ ޚިދުމަތާ ގުޅިވަޑައިގަނެފަ އެވެ.
އޭގެ އިތުރުން 1979 ވަނަ އަހަރު ދާއިރާއިން އިތުރު ތައުލީމު ހާސިލުކުރެއްވުމަށް އިނގިރޭސިވިލާތަށް ވަޑައިގަތުމަށް ފަހު އެނބުރި ވަޑައިގެން އެލައިޑް ހެލްތު ސަރވިސަސް ޓްރޭނިންގ ސެންޓަރުގެ ޓިއުޓަރެއްގެ ގޮތުގައި މަސައްކަތް ކުރެއްވި އެވެ. އެ ސެންޓަރުގެ އެސިސްޓެންޓް ޑިރެކްޓަރ އަދި ޑެޕިއުޓީ ޑިރެކްޓަރގެ މަގާމު ވެސް އަންވަރު ފުރުއްވި އެވެ.
އެއަށްފަހު ސަރުކާރުގެ ސިއްހީ ވުޒާރާއާ ގުޅިވަޑައިގެން އެ ވުޒާރާގެ އެކި މަގާމުތައް ފުރުއްވައި، ގިނަ ޚިދުމަތްތަކެއް ކުރެއްވި އެވެ. އަންވަރުގެ އެންމެ އަގުހުރި އެއް މަސައްކަތަކީ ތެލެސީމިއާ ފަރުވާގެ ޚިދުމަތް ރަނގަޅުކުރުމަށާއި ތެލެސީމިއާ އާ މެދު ހޭލުންތެރިކަން އިތުރު ކުރުމަށް ހިންގެވި މަސައްކަތްތަކުގައި އަދާކުރެއްވި ދައުރެވެ.
ކ. ގުރައިދޫގައި ހުންނަ ޚާއްސަ އެހީއަށް ބޭނުންވާ މީހުން ތިބޭ މަރުކަޒަށް ބޭނުންވާ ފަންނީ އެހީތެރިކަން ފޯރު ކޮށްދިނުމުގެ އިތުރުން ޑްރަގް ރިހެބިލިޓޭޝަން ސެންޓަރަށް ބޭނުންވާ ފަންނީ އެހީތެރިކަން ވެސް އަންވަރު ފޯރުކޮށްދެއްވި އެވެ.
މޫސާ އަންވަރު އެންމެފަހުން ޚިދުމަތް ކުރެއްވީ މޯލްޑިވްސް ފުޑް އެންޑް ޑްރަގް އޮތޯރިޓީގަ އެވެ.
މޫސާ އަންވަރު ރާއްޖޭގެ ސިއްހީ ދާއިރާއަށް 40 އަހަރަށް ވުރެ ގިނަ ދުވަހު ޚިދުމަތް ކުރައްވާފައިވެ އެވެ. އޭގެތެރެއިން 30 އަހަރަށްވުރެ ގިނަ ދުވަސް، ހޭދަކުރެއްވީ ދައުލަތުގެ ޚިދުމަތުގަ އެވެ. އަންވަރު ދައުލަތުގެ ވަޒީފާއިން ރިޓަޔަރ ކުރެއްވީ 23 ޖުލައި 2009 ގަ އެވެ.
