ދުނިޔޭގެ ސިއްޙަތުގެ ދުވަހުގެ މި އަހަރުގެ ޝިއާރު: "އަހަރެންގެ ޞިއްޙަތު-އަހަރެންގެ ޙައްޤު"
މި ޝިއާރާއިމެދު، ފުންކޮށް އަދި ފުޅާކޮށް ވިސްނާލަން އެބަޖެހޭ
ހެލްތު މިނިސްޓަރު ޑރ އަބްދުﷲ ޚަލީލް ދެއްވި ޚިތާބު
ދުނިޔޭގެ ސިއްޙަތުގެ ދުވަހުގެ މިއަހަރުގެ ޝިއާރަކީ "އަހަރެންގެ ޞިއްޙަތު-އަހަރެންގެ ޙައްޤު"އެވެ.
މި ދުވަހުގެ މުނާސަބަތުގައި ހެލްތު މިނިސްޓަރު ޑރ އަބްދުﷲ ޚަލީލް ދެއްވި ޚިތާބުގައި ވިދާޅުވީ، މި ޝިޢާރުގެ ދަށުން މިއަހަރުގެ ދުނިޔޭގެ ޞިއްހަތު ދުވަސް ފާހަގަ ކުރަމުންދާއިރު މި ޝިއާރާއިމެދު، ފުންކޮށް އަދި ފުޅާކޮށް ވިސްނާލަން އެބަޖެހޭކަމަށެވެ. އެގޮތުން ޞިއްޙަތު އެއީ އަސާސީ ޙައްޤެއްކަމަށް ރިޢާޔަތްކޮށްގެން ކަންކަން އިންތިޒާމުކޮށް ތަރުތީބުކުރުމަކީ ވަރަށް މުހިއްމު ކަމެއްކަމަށް މިނިސްޓަރު ވިދާޅުވިއެވެ.
އަދި ދިވެހި ކޮންމެ ފަރުދަކަށް އެއްވެސް ތަފާތު ކުރުމެއްނެތި ހަމަހަމަކަމާއެކު، އެކަށީގެންވާ އަދި ފެންވަރު ރަނގަޅު ޚިދުމަތްތަކާއި ޞިއްޙީ ރައްކާތެރިކަން މާލީ އަދި ޖިސްމާނީ ގޮންޖެހުންތަކަކާ ނުލައި ލިބޭކަން ކަށަވަރު ކުރުމަކީ ދައުލަތުގެ ޒިންމާއެއްކަމަށްވެސް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ، "އަހަރެންގެ ޞިއްޙަތު- އަހަރެންގެ ޙައްޤު" ފުރިހަމަ މާނާގައި އަދި ދެމެހެއްޓެނިވިގޮތެއްގައި ކަށަވަރު ކުރެވޭނޭހެން ޞިއްޙީ ދާއިރާގެ ޚިދުމަތްތައް މިހާރު ޤާއިމުކުރެވި، އިންޤިލާބީ ހެޔޮ ބަދަލުތަކާ ދިމާލަށް މިސްރާބު ޖަހާފައިވާ ކަމަށެވެ.
