ޔުކްރެއިންގެ ވައިގެ ދިފާއީ ނިޒާމު ވަރުގަދަ ކުރުމަށް ޓްރަމްޕް އާއި ޒެލެންސްކީ މަޝްވަރާ ކުރައްވައިފި

ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމައިގައި، ޔުކްރެއިންގެ ވައިގެ ދިފާއީ ނިޒާމު ވަރުގަދަ ކުރުމަށް، އެމެރިކާގެ ރައީސް ޑޮނަލްޑް ޓްރަމްޕް އަދި ޔުކްރެއިންގެ ރައީސް ވުލެޑިމިއަރ ޒެލެންސްކީ މަޝްވަރާ ކުރައްވައިފި އެވެ.

ހުކުރު ދުވަހު ޓްރަމްޕް ވަނީ ފޯނުން ޒެލެންސްކީއާ ގުޅުއްވައި، ޔުކްރެއިންގެ ވައިގެ ދިފާއީ ޤާބިލިއްޔަތު އިތުރު ކުރުމާ ގުޅޭ ގޮތުން މަޝްވަރާ ކުރައްވައި، އެކަމުގައި އެއްބަސްވުމަކަށް އައިސްފަ އެވެ. 

އެކަމާ ގުޅިގެން ޔުކްރެއިންގެ ރައީސް ޒެލެންސްކީ ވިދާޅުވީ ދިފާއީ އުފެއްދުންތެރިކަމާ ގުޅޭ ގޮތުން އެމެރިކާއާ އެކު މަޝްވަރާކޮށް، އެކުގައި އެކަމަށް އިންވެސްޓު ކުރުމާ ބެހޭ ގޮތުން ވެސް މަޝްވަރާ ކުރައްވާފައިވާ ކަމަށެވެ. 

ރަޝިޔާ އިން ޔުކްރެއިން އަށް ދެމުން އަންނަ ވައިގެ ހަމަލާތައް އިތުރު ކޮށްފައިވާތީ، ޕެޓްރިއްޓް މިސައިލްތަކާއި، ސިސްޓަމްތައް ހޯދުމަށް ޔުކްރެއިން އިން ވަނީ އެމެރިކާގެ ކިބައިން އެދިފަ އެވެ. އަދި ޔުކްރެއިން އިން ބުނެފައި ވަނީ، އެމެރިކާ އިން އެ ޤައުމަށް ދެމުން އަންނަ ހަތިޔާރު ފޮނުބުން މެދު ކަނޑާލުމާ ގުޅިގެން، ރަޝިޔާގެ ހަމަލާތަަކުން ދިފާއުވުމުގެ ޤާބިލިއްޔަތު ކަމަށް ނޭދެވޭ އަސަރު ކޮށްފައިވާ ކަމަށެވެ. 

އެކަމާ ގުޅިގެން މަސްރަހު ދިރާސާ ކުރާ ފަރާތްތަކުން ބުނެފައި ވަނީ، ޓްރަމްޕް އާއި ޒެލެންސްކީއާ ދެެމެދު ކުރިއަށް ދިޔަ މަޝްވަރާތަކުގެ ނަތީޖާ ރަނގަޅު ވާނެ ކަމަށް ބެލެވޭ ކަމަށެވެ. އަދި ޕެޓްރިއަޓް މިސައިލްތައް އަލުން ޔުކްރެއިން އަށް ފޯރުކޮށްދިނުމަށް އެމެރިކާ އިން ނިންމާނެ ކަމުގެ އުންމީދު އޮތް ކަމަށް ވެސް ވަނީ އަންދާޒާ ކޮށްފަ އެވެ. 

ޓްރަމްޕް ވެސް ވަނީ ޒެލެންސްކީއާ އެކު ފޯނުން ގުޅުއްވައި މަޝްވަރާ ކުރައްވާފައިވާ ކަމަށް ވިދާޅުވެފަ އެވެ. އަދި ޓްރަމްޕް ވެސް އެ މަޝްވަރާތައް ސިފަ ކުރައްވާފައި ވަނީ ވަރަށް ކާމިޔާބު އަދި ދެމެހެއްޓެނިވި މަޝްވަރާތަކެއްގެ ގޮތުގަ އެވެ. މި މަޝްވަރާތައް ކޮށްފައި ވަނީ، ޓްރަމްޕް އާއި ރަޝިޔާގެ ރައީސް ވްލަޑިމިއާ ޕުޓިންއާ ދެމެދު ވެސް ހިތްހަމަ ނުޖެހުންތައް ހިނގާފައިވާ ދަނޑިވަޅެއްގަ އެވެ. 

އެމެރިކާގެ ކުރީގެ ރައީސް ޖޯ ބައިޑެންގެ ވެރިކަމުގައި ވަނީ ޔުކްރެއިން އަށް އެހީތެރިކަން ފޯރުކޮށްދީފަ އެވެ. އޭރު އެމެރިކާ އިން ވަނީ، ޔުކްރެއިން އަށް ޕެޓްރިއަޓް މިސައިލް ވެސް ފޯރުކޮށްދީފަ އެވެ. ނަމަވެސް، އެމެރިކާގެ ރައީސް ކަމުގެ ދެ ވަނަ ދައުރަކަށް ޓްރަމްޕް ވަޑައިގެންނެވި ފަހުން ވަނީ، އެކަން ހުއްޓުވައިފަ އެވެ. އަދި ބައިޑެންގެ ވެރިކަމުގައި އެމެރިކާ އިން އެކަން ކޮށްފައިވާތީ، އެކަމަށް ވެސް ވަނީ ފާޑު ވިދާޅުވެފަ އެވެ.