އެމެރިކާގެ މިނިވަންދުވަހުގެ މުނާސަބަތުގައި، ޓްރަންޕަށް ރައީސް މުއިއްޒު ތަހުނިޔާ ފޮނުއްވައިފި
އެމެރިކާގެ ރައްޔިތުންނަށް ވެސް ވަރަށް އިހްލާސްތެރިކަމާއެކު ތަހުނިޔާ ދަންނަވާފައިވޭ
ރައީސް ޑރ.މުހައްމަދު މުއިއްޒާއި، އެމެރިކާގެ ރައީސް ޑޮނަލްޑް ޓްރަމްޕް
އެމެރިކާގެ މިނިވަންދުވަހުގެ މުނާސަބަތުގައި، އެގައުމުގެ ރައީސް، ޑޮނަލްޑް ޓްރަމްޕަށް ރައީސުލްޖުމްހޫރިއްޔާ ޑރ. މުހައްމަދުު މުއިއްޒު ތަހުނިޔާ ވިދާޅުވެ މެސެޖެއް ފޮނުއްވައިފިއެވެ.
ހުކުރު ދުވަހު އެމަނިކުފާނުގެ އެކްސްގައި ކުރެއްވި ޕޯސްޓެއްގައި ވިދާޅުވީ، އެމެރިކާގެ މިނިވަން ދުވަހުގެ މުނާސަބަތުގައި އެމެރިކާގެ ރައީސް ޓްރަމްޕްއަށާއި ސަރުކާރަށާއި ރައްޔިތުންނަށް ވަރަށް އިހްލާސްތެރިކަމާއެކު ތަހުނިޔާ ދަންނަވާ ކަމަށެވެ. އަދި އެމެރިކާގެ ރައްޔިތުންނަށް ދެމެހެއްޓެނިވި މިނިވަންކަމާއި ކުރިއެރުމަށް އެދިވަޑައިގެންނެވިއެވެ
އެމެރިކާއިން ރާއްޖެއަށް ކަނޑައަޅުއްވާ ސަފީރު ހޫގޯ ޔޫ-ހޯ ޔޮން ވަނީ ދެގައުމުގެ ގުޅުމާ ގުޅޭގޮތުން މީގެ ކުރިން ވާހަކަ ދައްކަވާފައެވެ. ރާއްޖެއާއި އެމެރިކާއާއި ދެމެދު އޮތް މިގުޅުން ކުރިއަށް އޮތްތާގައި ބަދަހިވެ އެކުގައި ގުޅިގެން މަސައްކަތްތަކެއްކުރެވި ދެގައުމަށާއި ރައްޔިތުންނަށް ފައިދާކުރުވަނިވި ގޮތެއްގައި މަސައްކަތްތަކެއް ކުރުމަށް ބޭނުންފުޅުވާކަން ފާހަގަކުރައްވާފައިވެއެވެ.
އެމެރިކާގެ މިނިވަން ދުވަހުގެ ގޮތުގައި ފާހަގަކުރާ ދުވަހަކީ، 1776 ވަނަ އަހަރުގެ ޖުލައިމަހުގެ 4 ވަނަ ދުވަހު، އިނގިރޭސިންގެ އަޅުވެތިކަމުން އެގައުމަށް މިނިވަންކަން ލިބުނުކަން އިއުލާން ކުރި ދުވަހެވެ.
ރާއްޖެއާއި އެމެރިކާއިން ސިޔާސީ ގުޅުން ގާއިމްކޮށްފައިވަނީ 1966 ވަނަ އަހަރެވެ.
