ކެޓަރފިލަރ، މައިކްރޯސޮފްޓް، އެމެޒަން ހިމެނޭ ގޮތުން ޣައްޒާ ގައި އިސްރާއީލުން ހިންގާ އަނިޔާވެރި ކަމަށް ވާގިވެރިވާ ކުންފުނިތައް އދ އިން އާންމު ކޮށްފި

ޣައްޒާ ގައި އިސްރާއީލުން ހިންގަމުންދާ އަނިޔާވެރި އަމަލުތަކަށް ވާގިވެރިވާ ކުންފުނިތަކުގެ ލިސްޓެއް އދ. އިން ހާމަ ކޮށްފިއެވެ.

އދ. ގެ މާހިރަކު އެކުލަވާލި މި ރިޕޯޓުގައި 60 އަށް ވުރެ ގިނަ ކުންފުނި ހިމެނޭ އިރު އޭގެ ތެރޭގައި ބޮޑެތި ހަތިޔާރު އުފައްދާ ކުންފުނިތަކާއި ޓެކްނޮލޮޖީ ކުންފުނިތައް ހިމެނެއެވެ.

އިސްރާއީލުން ޣައްޒާ ގައި ހިންގާ އަނިޔާވެރި ކަމަކީ "ނަސްލު ފޮހެލުމުގެ ކެމްޕޭނެއް" ކަމަށް ރިޕޯޓުގައި ވަނީ ބުނެފައެވެ.

އދ. ގެ ޚާއްޞަ ރެޕަޓުއަރ އޮން ދަ އޮކިއުޕައިޑް ޕެލެސްޓީނިއަން ޓެރިޓަރީޒް - އިޓަލީގެ އިންސާނީ ޙައްޤުތަކާ ބެހޭ ވަކީލު ފްރަންޗެސްކާ އަލްބަނީޒް، މި ރިޕޯޓު އެކުލައްވާލާފައި ވަނީ ޤައުމުތަކާއި، އިންސާނީ ޙައްޤުތަކުގެ ދިފާޢުކުރާ ފަރާތްތަކާއި، ކުންފުނިތަކާއި، އަދި އިލްމުވެރިންގެ 200 އަށް ވުރެ ގިނަ ހުށަހެޅުން ތަކަށް ބިނާކޮށެވެ.

ހޯމަ ދުވަހުގެ ރޭ ޝާއިޢުކުރެވުނު މި ރިޕޯޓުގައި ކުންފުނިތަކަށް އިސްރާއީލާ އެކު މުޢާމަލާތް ހުއްޓާލުމަށާއި، ބައިނަލްއަޤްވާމީ ޤާނޫނު ޚިލާފުވެފައިވާ ކަމަށް ތުހުމަތު ކުރެވޭ ކުންފުނިތަކުގެ ވެރިންނަށް ޤާނޫނީ ޒިންމާ އުފުލުވުމަށް ގޮވާލާފައި ވެއެވެ.

"ޣައްޒާގެ ދިރިއުޅުން ފުހެލެވެމުން ދާއިރު އަދި ވެސްޓް ބޭންކްގައި ހަމަލާތައް އިތުރުވަމުން ދާއިރު، އިސްރާއީލުން ނަސްލު ފުހެލުން ކުރިއަށް ގެންދާ ސަބަބު މި ރިޕޯޓުން ހާމަވެއެވެ: އެއީ ގިނަ ބަޔަކަށް މާލީ ބޮޑު ފައިދާ އެއްވާ ކަމަކަށް ވާތީއެވެ،" އަލްބަނީޒް 27 ޞަފްޙާގެ ރިޕޯޓުގައި ލިޔުއްވާފައިވެއެވެ. އޭނާ ތުހުމަތު ކުރުއްވާފައި ވަނީ "އިސްރާއީލުގެ ނަސްލީ ތަފާތުކުރުން ތަކާއި ހަނގުރާމަ އާއި ވިޔަފާރި ކުންފުނިތަކާއި މާލީގޮތުން ގުޅިފައިވާ" ކަމަށެވެ.

އިސްރާއީލުން ޣައްޒާގައި ހިންގަނީ ނަސްލު ފޮހެލުމުގެ އަސްކަރީ އޮޕަރޭޝަނެއް ކަމަށް ބުނާ ބުނުން މީގެ ކުރިން ދޮގުކޮށްފައިވެއެވެ.

އިސްރާއީލުން މިހެން ބުނާ އިރު އޮކްޓޯބަރު 7، 2023 އިން ފެށިގެން ޣައްޒާގައި ހިންގަމުންދާ ހަނގުރާމައިގައި 56،000 އަށްވުރެ ގިނަ ފަލަސްތީނު މީހުން މަރުވެފައިވާ ކަމަށް ޣައްޒާގެ ޞިއްޙީ ވުޒާރާއިން ބުނެފައިވެއެވެ. އަދި މުޅި ޣައްޒާ ވަނީ ފުނޑުފުނޑު ކޮށް ވީރާނާ ކޮށްލާފައެވެ.

މި ރިޕޯޓުގައި ކުންފުނިތައް ބަހާލާފައިވަނީ ދާއިރާ ތަކަށެވެ. އެގޮތުން އަސްކަރީ ނުވަތަ ޓެކްނޮލޮޖީ ދާއިރާ ފާހަގަ ކޮށްލެވެއެވެ.

މި ރިޕޯޓުގައި ލޮކްހީޑް މާޓިން އަދި ލިއޮނާޑޯ ފަދަ ހަތިޔާރު އުފައްދާ ކުންފުނިތަކުގެ ނަން ހިމަނާފައިވެއެވެ. އަދި އެ ފަރާތްތަކުގެ ހަތިޔާރު ޣައްޒާގައި ބޭނުން ކޮށްފައިވާ ކަމަށް ތުހުމަތު ކޮށްފައި ވެއެވެ. މީގެ އިތުރުން ކެޓަޕިލަރ އަދި ހަޔުންޑާއި ފަދަ ބޮޑެތި މެޝިނަރީ ސަޕްލައިކުރާ ފަރާތްތަކުގެ ނަން ހިމަނާފައިވެއެވެ. އަދި އެ ފަރާތްތަކުގެ އާލާތްތައް ފަލަސްޠީނު ސަރަޙައްދުތައް ސުންނާފަތި ކުރުމަށް ބޭނުން ކޮށްފައިވާ ކަމަށް ބުނެފައިވެއެވެ.

ކެޓަޕިލަރުން ކުރިން ބުނެފައިވަނީ އެ ފަރާތުގެ އުފެއްދުންތައް ބޭނުން ކުރެވޭނެ ކަމަށް އުންމީދު ކުރަނީ ބައިނަލްއަޤްވާމީ އިންސާނިއްޔަތާ ބެހޭ ޤާނޫނާ އެއްގޮތަށް ކަމަށެވެ.

އަލްފަބެޓް، އެމެޒޮން، މައިކްރޯސޮފްޓް، އަދި އައިބީއެމް ފަދަ ޓެކްނޮލޮޖީގެ ބޮޑެތި ކުންފުނިތަކުގެ ނަން ހިމަނާފައިވަނީ "އިސްރާއީލުގެ ސަވެއިލަންސް ނިޒާމާއި ޣައްޒާގެ ހަލާކުކުރުމުގެ މައިގަނޑު ބައިވެރިން" ގެ ގޮތުގައެވެ.

އަލްފަބެޓަބެޓުން ކުރިން އިޒްރޭލުގެ ސަރުކާރާއެކު ވެފައިވާ 1.2 ބިލިއަން ޑޮލަރުގެ ކްލައުޑް ސަރވިސަސް އެއްބަސްވުން ދިފާޢުކޮށްފައިވެއެވެ. އެ އެއްބަސްވުމަކީ އަސްކަރީ ނުވަތަ އިންޓެލިޖެންސް މަސައްކަތްތަކަށް އަމާޒުކޮށްފައިވާ އެއްޗެއް ނޫންކަމަށް ބުނެފައިވެއެވެ.

މި ރިޕޯޓަކީ އިސްރާއީލުން ގާނޫނާ ޚިލާފަށް ހިފާފައިވާ ބިންތަކުގައި އާބާދު ކުރަމުން ގެންދިއުމުގައި އެހީތެރިވެ ދޭ ކުންފުނިތަކުގެ ކުރީގެ އދ. ގެ ޑޭޓާބޭސް އިތުރަށް ފުޅާކޮށްފައިވާ ރިޕޯޓެކެވެ. މި ޑޭޓާބޭސް އެންމެ ފަހުން އަޕްޑޭޓް ކޮށްފައި ވަނީ 2023 ގެ ޖޫން މަހުގައެވެ. މި ރިޕޯޓުގައި އައު ކުންފުނިތައް އިތުރުކޮށް، ހިނގަމުންދާ ޣައްޒާގެ ހަނގުރާމައާ ގުޅުންހުރި ކަމަށް ބުނާ ކަންކަން ތަފްޞީލު ކޮށްދީފައި ވެއެވެ.

މި ރިޕޯޓު ބުރާސްފަތި ދުވަހު 47 މެންބަރުންގެ އދ. ގެ އިންސާނީ ޙައްޤުތަކުގެ ކައުންސިލަށް ހުށަހެޅޭނެ އެވެ. މި ކައުންސިލަށް ޤާނޫނީ ގޮތުން ބަނދެވޭ ބާރުތަކެއް ނެތް ނަމަވެސް، އދ. ގެ ތަޙްޤީޤު ތަކުން ތައްޔާރު ކޮށްފައިވާ ލިޔެކިޔުންތައް ބައެއް ފަހަރު ބައިނަލްއަޤްވާމީ ދަޢުވާ ތަކަށް މަޢުލޫމާތު ފޯރުކޮށްދީފައި ވެއެވެ.

އިސްރާއީލާއި އެމެރިކާ މިއަހަރުގެ ކުރީކޮޅު މި ކައުންސިލުން ވަކިވެފައިވެއެވެ. އެއީ އިސްރާއީލާ ދެކޮޅަށް ތަޢައްޞުބު އޮތްކަމަށް ބުނެއެވެ.