ގޮނޑި ގެއްލިފައިވޭތޯ ސާފުކޮށް ދިނުމަށް އިލްހާމް އިލެކްޝަންގައި އެދިއްޖެ
އިލެކްޝަންސް ކޮމިޝަން މިހާރު ވައްތަރީ ސިޔާސީ ކަންކަން ކުރާ ޕީޕީއެމް އޮފީހަކާ
ގޮނޑި ގެއްލިފައިވާ ކަމަށް ކަނޑައަޅާފައިވާ އިލްހާމް އަހުމަދު
ރައްޔިތުންގެ މަޖިލީހުގެ ގޮނޑި ގެއްލިފައިވާ ކަމަށް ކަނޑައަޅާފައިވާ ދަނގެތީ ދާއިރާގެ މެންބަރު އިލްހާމް އަހުމަދު އޭނާގެ ގޮނޑި ގެއްލިފައިވާކަން ރަސްމީކޮށް އަދިވެސް އަންގާފައި ނުވާތީ އެކަން ސާފުކޮށްދިނުމަށް އިލެކްޝަންސް ކޮމިޝަނާއި މަޖިލީހުގައި އެދިއްޖެއެވެ.
އިލްހާމް އިލެކްޝަންސް ކޮމިޝަންގެ ރައީސް އަހުމަދު ސުލައިމާނަށް ފޮނުވި ސިޓީއެއްގައި ވިދާޅުވެފައިވަނީ އޭނާގެ ގޮނޑި ގެއްލިފައިވާ ކަމަށް ބައެއް މީޑިޔާތަކުން ޚަބަރު ފަތުރާތީ އިވޭ ކަމަށާއި ނަމަވެސް އިލެކްޝަންސް ކޮމިޝަނުން ވެސް އަދި ރައްޔިތުންގެ މަޖިލީހުން ވެސް ރަސްމީކޮށް އެކަން އަދި އަންގާފައި ނުވާ ކަމަށެވެ. އަދި އެއްވެސް އިދާރާއަކުން މަޖިލީހުގެ މެންބަރުކަމުން ވަކިކޮށްފައިވާކަން އަންގާފައި ނުވާތާނގައި ޢާއްމު އުސޫލުން ރައްޔިތުންގެ މަޖިލީހުގެ މެންބަރުންނަށް ލިބިދޭ އިނާޔަތްތަކާއި ހެލްތު އިންޝުއަރެންސް ކަނޑާލާފައިވާއިރު އަޅުގަނޑުގެ މެންބަރުކަން ގެއްލިފައިވޭތޯއާއި ގެއްލިފައިވާކަމަށް ކަނޑައަޅާފައިވާނަމަ އެކަން ކޮށްފައި ވަނީ ޤާނޫނު އަސާސީގެ ކޮންމާއްދާއެއްގެ ދަށުންކަން އަދި ކޮން ޝަރުޢީ ހުކުމަކުން ކަން އޭގެ ސަބަބު އަންގައި ދިނުމަށް އެދިފައިވާ ސިޓީއަށް މިއަދާ ހަމައަށް ވެސް ޖަވާބެއް ދީފައި ނުވާ ކަމަށެވެ. އަދި ގޮނޑި ގެއްލިފައި ނުވާނަމަ އިނާޔަތްތައް ހިފަހައްޓާފައި ވަނީ ކޮން ޤާނޫނެއްގެ ކޮން މާއްދާއެއްގެ ދަށުންކަން ހާމަކޮށް ދިނުމަށް މިމަހުގެ 12 ވަނަ ދުވަހު އެދިފައިވާއިރު އަދިވެސް ޖަވާބެއް ލިބިފައި ނުވާ ކަމަށް ވިދާޅުވެފައިވެއެވެ.
އިލްހާމް ވިދާޅުވެފައި ވަނީ ރައްޔިތުންގެ މަޖިލީހުގެ މެންބަރެއްގެ ގޮނޑި ގެއްލޭނެ ގޮތް ޤާނޫނު އަސާސީ އާއި ސިޔާސީ ޕާޓީތަކުގެ ޤާނޫނުގެ އިތުރުން ސުޕްރީމް ކޯޓުގެ ހުކުމާއި އެކޯޓުގެ އަމުރުން ސާފުކޮށް ބަޔާން ކޮށްދީފައިވާއިރު އެމަބްދައުތަކުން އިލްހާމްގެ ގޮނޑި ގެއްލެން ޖެހޭ އެއްވެސް ސަބަބެއް ނެތްއިރު އިލެކްޝަންސް ކޮމިޝަނުން އިލްހާމްގެ ގޮނޑި ގެއްލިފައިވާކަން ކަނަޑައެޅީ ކޮން ގޮތަކަށް ޤާނޫނު އަސާސީއާއި ޤާނޫންތައް އަދި ސުޕްރީމް ކޯޓުގެ ހުކުމާއި އަމުރު ކޮންގޮތަކަށް މާނަކޮށްގެންތޯ ވީހާވެސް އަވަހަށް އަންގާލަ ދެއްވުން އެދިލައްވާ ކަމަށެވެ. އަދި ސުޕްރީމް ކޯޓުން ނިންމާފައިވާ ނިންމުންތަކުން އެކޯޓަށް ލިބިދޭ ބާރުތަކަކީ ކޮބައިކަމާ އެބާރުގެ ދަށުން ނިންމާފައިވާ ނިންމުންތަކުން އިލްހާމްގެ ގޮނޑި ގެއްލިފައި ނުވާ ކަމަށް އެކޯޓުން ކަނޑައަޅާފައިވާ ކަމަށެވެ. ނަމަވެސް ސުޕްރީމް ކޯޓަށް ލިބިދޭ ބާރުތައް އިލެކްޝަންސް ކޮމިޝަނަށް ލިބިދޭ ކަމަށް މާނަކުރުމަކީ އެކޯޓުގެ ނިންމުންތައް އިލެކްޝަނުން ހިތުހުރި ގޮތަކަށް މާނަކުރުން ކަމަށް އިލްހާމް ވިދާޅުވެފައިވެއެވެ.
އިލްހާމް ވިދާޅުވީ އިލެކްޝަންސް ކޮމިޝަނަކީ ރައްޔިތުންގެ މަޖިލީހުން އައްޔަން ކުރާ މެންބަރުންތަކެއްގެ މައްޗަށް އެކުލެވިފައިވާ، އެއިދާރާ ފަންކްޝަން ކުރަންވީ ގޮތް ކަނޑައެޅިގެން ވަކި ޤާނޫނެއްގައި ބަޔާން ކުރެވިފައިވާ މިނިވަން މުސްތަޤިއްލު އިދާރާއެއް ކަމަށެވެ. ނަމަވެސް މިއަދު ފެނިގެން ދަނީ އިލެކްޝަންސް ކޮމިޝަނަކީ މިނިވަން އިދާރާއެއްގެ ބަދަލުގައި ސިޔާސީ ހަރަކާތްތަކެއް ހިންގާ ޕީޕީއެމްގެ އޮފީހެއްގެ ގޮތުގައި ކަމަށް އިލްހާމް ވަނީ ވިދާޅުވެފައެވެ.
އިލްހާމް ވަނީ ބާރު އޮތީތީ އެބާރު ނަހަމަ ގޮތުގައި ބޭނުން ކޮށްގެން މީހުންނަށް އަނިޔާ ކުރެވިދާނެ ކަމަށާއި އެހެން ނަމަވެސް އެކަން ކުރާ މީހުންނާ ހަމަޔަށް ޤާނޫނު އަރާހަމަކުރާނެ ކަމާ ހައްޤުތަކަށް އަރައިގަންނަ ބަޔަކާ އާޚިރަތް ދުވަހުން ސުވާލު ކުރެވޭނެކަން ހަނދާން ކޮށްދީ އެކަމާ ގުޅޭ ކީރިތި ޤުރުއާނުގެ އާޔަތެއް ވެސް މާނައާ އެކު ސިޓީގައި ހިމަނާފައެވެ.
މީގެ އިތުރުން އިލެކްޝަންސް ކޮމިޝަންގެ އަމަލު ކުށްވެރިކޮށް ޤާނޫނު އަރާ ހަމަކުރުމުގެ ކުރިން ޤާނޫނީ އިމުގެތެރެއަށް ރުޖޫއަ ވުމަށް ވެސް އިލްހާމް ވަނީ ގޮވާލައްވާފައެވެ.
