ރިޔާސީ އިންތިޚާބުގައި ރައީސް ޞާލިޙް ވާދަ ކުރެއްވުމަށް އެދި އެމްޑީޕީގެ ގިނަ މެމްބަރުން ޝުއޫރު ފާޅު ކޮށްފި
ރައީސް ޞާލިޙްގެ ފަސް އަހަރުގެ ތެރޭގައި، ކޮވިޑްގެ ހާލަތު ކުރިމަތިވި އިރު ވެސް ރަށް ރަށުގައި ހިންގާފައިވާ ތަރައްޤީގެ މަޝްރޫއުތަކާއި އިޖްތިމާއީ ގޮތުންނާއި އިގްތިސާދީ ގޮތުން ރާއްޖެ އަށް ގެންނެވި ހެޔޮ ކުރި އެރުންތައް ރައްޔިތުން ފާހަގަ ކުރޭ
އެމްޑީޕީގެ މެމްބަރުން ބޭއްވި ބައްދަލުވުމުގެ ތެރެއިން
ކުރިއަށް އޮތް ރިޔާސީ އިންތިޚާބުގައި ކުރީގެ ރައީސް އިބްރާހީމް މުޙައްމަދު ޞާލިޙް (އިބޫ) ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) ގެ ޓިކެޓުގައި ވާދަ ކުރެއްވުމަށް ތާއީދުކޮށް އެމްޑީޕީ ގެ ގިނަ މެމްބަރުން ޝުއޫރު ފާޅު ކޮށްފި އެވެ.
ރައީސް ޞާލިޙަށް ތާއިދު ކުރާ ގިނަ އަދަދެއްގެ މެމްބަރުން އާދީއްތަ ދުވަހުގެ ރޭ ބޭއްވި ބައްދަލުވުމުގައި، 2028 ވަނަ އަހަރު އޮންނަ ރިޔާސީ އިންތިޚާބުގައި ރައީސް ޞާލިޙް ވާދަ ކުރެއްވުން އެއީ އެމްޑީޕީ އަށް އިންތިޚާބު ކާމިޔާބު ކުރުމަށް އޮތް އެންމެ ރަނގަޅު ގޮތް ކަމަށް ޝުއޫރުފާޅު ކުރި ފަރާތްތަކުން ވަނީ ބުނެފައެވެ.
ކުރީގެ ވަޒީރުންނާއި، ކުންފުނިތަކުގެ މެނޭޖިން ޑިރެކްޓަރުން އަދި ރައްޔިތުންގެ މަޖިލީހުގެ ކުރީގެ ގިނަ މެމްބަރުން ހިމެނޭ ގޮތުން ބޭއްވި އެ ބައްދަލުވުމުގައި ގިނަ ބަޔަކު ވަނީ ބައިވެރިވެފަ އެވެ.
ރައްޔިތުންގެ މަޖިލިހުގެ ކުރީގެ ރައީސް އާއި މާލޭ ސިޓީގެ މޭޔަރު ވެސް ވަނީ ބައްދަލުވުމުގައި ބައިވެރިވެ ވަޑައިގެން ރައީސް ސާލިހް އިންތިޚާބަށް ނުކުންނެވުމުގެ މުހިންމު ކަމާ ބެހޭ ގޮތުން ވާހަކަ ދައްކަވާފައެވެ.
މީގެ އިތުރުން އެ ބައްދަލުވުމުގައި މިވަގުތު މާލޭގައި ތިއްބެވި ބައެެއް ރަށް ރަށުގެ ކައުންސިލް މެމްބަރުން ވެސް ބައިވެރިވެޑައިގަތެވެ.
އެ ބައްދަލުވުމުގައި ބައިވެރިވި ގިނަ އަދަދެއްގެ އެމްޑީޕީ މެމްބަރުން ވަނީ 2028 ގެ ރިޔާސީ އިންތިޚާބާއި އަންނަ އަހަރު އޮންނަ ކައުންސިލް އިންތިޚާބު އެމްޑީޕީ އިން ކާމިޔާބު ކުރަން ޖެހޭ ކަމަަށް ފާހަގަ ކޮށްފަ އެވެ. އަދި އިންތިޚާބު ކާމިޔާބު ކުރުމުގައި ޕާޓީގެ ލީޑަރޝިޕް ގުޅިގެން މަސައްކަތް ކުރުމުގެ މުހިންމު ކަން ވެސް ވަނީ ފާހަގަ ކޮށްފައެވެ.
ރާއްޖޭގައި މިހާރު އޮތް ޑރ. މުއިއްޒުގެ ސަރުކާރުން ގައުމުގެ ކަންކަން ކުރިއަށް ގެންދާ ގޮތުން ރައްޔިތުންނަށް ކުރިމަތިވަމުންދާ ދަތި ތަކާއި އުނދަގޫތައް ފާހަގަ ކުރަމުން، އެމްޑީޕީގެ ހެޔޮ ވެރިކަމެއް އަލުން ރާއްޖެ އަށް ގެންނަން ޖެހޭ ކަން ބައްދަލުވުމަށް ހާޒިރުވި ފަރާތްތަކުން ވަނީ ފާހަގަ ކޮށްފައެވެ.
ޝުއޫރު ފާޅު ކުރި ބައެއް ފަރާތްތަކުން ބުނެފައިވަނީ، ރައީސް ޞާލިޙްގެ ފަސް އަހަރުގެ ތެރޭގައި، ކޮވިޑްގެ ހާލަތު ކުރިމަތިވި އިރު ވެސް ރަށް ރަށުގައި ހިންގާފައިވާ ތަރައްޤީގެ މަޝްރޫއުތަކާއި އިޖްތިމާއީ ގޮތުންނާއި އިގްތިސާދީ ގޮތުން ރާއްޖެއަށް ގެންނެވި ހެޔޮ ކުރި އެރުންތައް ރައްޔިތުން ފާހަގަ ކުރާ ކަމަށެވެ.
ރައީސް ސާލިހް މި ބައްދަލުވުމުގައި ބައިވެރިވެ ވަޑައިގެންފައެއް ނުވެއެވެ. އަދި އެމަނިކުފާނުގެ ފަރާތްޕުޅުން އަދި އިންތިޚާބަށް ކުރިމަތި ލައްވާކަން އިއުލާނު ކުރައްވާފައެއް ވެސް ނުވެއެވެ.
މީގެ ކުރިން، 2028 ގެ އިންތިޚާބުގައި ވާދަ ކުރައްވާނެތޯ ރާއްޖެޓީވީ އިން ސުވާލު ދެންނެވުން، އެކަމާ ރައީސް ޞާލިޙް ދެކޮޅު ހައްދަވާފައި ނުވެ އެވެ.
މައުލޫމާތު ލިބިފައިވާ ގޮތުގައި މިވަގުތު އެެމަނިކުފާނު ހުންނެވީ އަމިއްލަ ދަތުރުފުޅެއްގައި ރާއްޖެއިން ބޭރުގައެވެ.
