އަރަބި ލީގުގެ ބައްދަލުވުމެއްގައި ބައިވެރިވެ ވަޑައިގަތުމަށް އީރާންގެ ޚާރިޖީ ވަޒީރު އައްބާސް އަރާގްޗީ، ތުރުކީގެ އިސްތަންބޫލަށް ވަޑައިގެންފި ކަމަށް މީޑިއާ ރިޕޯޓުތައް ބުނެފި އެވެ.

މީޑިއާ ތަކުގައި ބުނެފައިވާ ގޮތުން މިހާރު އިސްރާއީލާއި އީރާނާ ދެމެދު ހިނގަމުން އަންނަ ހަނގުރާމައާ ގުޅޭ ގޮތުން މަޝްވަރާ ކުރުމަށް ބާއްވާ އިސްލާމިކް ކޯޕަރޭޝަން (އޯއައިސީ)ގެ ޖަލްސާގައި ބައިވެރިވެ ވަޑައިގަތުމަށް އަރާގްޗީ އިސްތަންބޫލަށް ވަޑައިގެންފައި ވަނީ ހޮނިހިރު ދުވަހުގެ ވަގުތެއްގަ އެވެ.

ތަސްނީމް ނިއުސް އެެޖެންސީ އިން ރިޕޯޓު ކޮށްފައިވާ ގޮތުގައި މި ބައްދަލުވުމުގައި އަރަބި ލީގުގެ 40 އެއްހާ ޑިޕްލޮމަޓުން ބައިވެރިވެ ވަޑައިގަންނަވާނެ އެވެ. މި ޖަލްސާގައި އިސްރާއީލް އިން އީރާނަށް ދިން ހަމަލާއާ ގުޅޭ ގޮތުން ޚާއްސަ ގޮތެއްގައި މަޝްވަރާ ކުރެވޭނެ ކަމަށް، އަރާގްޗީއާ ހަވާލާދީ މީޑިއާ ތަކުގައި ވަނީ ބުނެފަ އެވެ.

އޯއައިސީގެ ބައްދަލުވުމަށް ވަޑައިގަތުމުގެ ކުރިން އަރާގްޗީ ވަނީ ޖެނީވާގައި އިނގިރޭސިވިލާތް، ފްރާންސް އަދި ޖަރުމަނުގެ ޚާރިޖީ ވަޒީރުންނާ ވެސް ބައްދަލު ކުރައްވައިފަ އެވެ. އެ ބައްދަލުވުމުގައި ވެސް ވަނީ ހަނގުރާމައާ ގުޅޭ ގޮތުން ޤައުމު ތަކުގެ ޚާރިޖީ ވަޒީރުންނާ އެކު މަޝްވަރާ ކޮށްފަ އެވެ.

އީރާން އިން ނިއުކްލިއާ ހަތިޔާރު އުފެއްދުމުގެ މަސައްކަތް ކުރަމުންދާ ކަމަށް ބުނެ، އިސްރާއީލް އިން އެ ޤައުމަށް އަމާޒުކޮށް ހަމަލާ ދީފައި ވަނީ މިދިޔަ ހަފުތާގެ ތެރޭގަ އެވެ. އޭގެ ބަދަލުގައި އީރާނުން ވެސް އަންނަނީ އިސްރާއީލަށް އަމާޒުކޮށް ވަރުގަދަ ހަމަލާތަކެއް ދެމުންނެވެ.

އެކަމާ ގުޅިގެން މި ފަހުން ވެސް އަރާގްޗީ ވިދާޅުވެފައި ވަނީ، އިސްރާއީލްގެ އަނިޔާވެރިކަން ހުއްޓާލައިފި ނަމަ، އީރާނުން ޑިޕްލޮމަޓިކް މަޝްވަރާތަކަށް ތައްޔާރަށް ތިބި ކަމަށެވެ. 

ތުރުކީގެ އަނަދޮލު ނިއުސް އޭޖެންސީ އިން ބުނެފައިވާ ގޮތުގައި، އޯއައިސީގެ މި ޖަލްސާ ނިމުމުން އޯއައިސީގެ ފަރާތުން ބަޔާނެއް ނެރޭނެ އެވެ.