ސައުދީ އަރަބިއްޔާގައި މިނީ ސްކާޓެއްލައިގެން އަންހެން ކުއްޖަކު އުޅެނިކޮށް ފެންނަ ޥީޑިއޯއެއް ތަހުގީގު ކުރަނީ

ސައުދީ އަރަބިއްޔާގެ ޒުވާން އަންހެން ކުއްޖަކު މިނީ ސްކާޓަކާއި ކޮރްޕް ޓޮޕެއްލައިގެން ޢާއްމުތަނެއްގައި ހުރި ވީޑިއޯއެއް އޭނާ އަމިއްލައަށް ޕޯސްޓް ކުރުމުން އެ ގައުމުގެ އިދާރާތަކުން އެކަން ތަހުގީގުކުރަން ފަށައިފިއެވެ.

"ޚުލޫދް" ނަމަކަށް ކިޔާ މޮޑެލް ޝެއަރ ކޮށްފައިވާ ކްލިޕަކީ އުޝައިޤިރްގައި ހުންނަ ގަދީމީ އިމާރާތެއްކައިރީގައި އޭނާ ހިނގާ މަންޒަރެވެ.

މި ފްޓޭޖްގެ ވާހަކަ ސައުދީ އަރަބިއްޔާގެ ސޯޝަލް މީޑިއާގައިވަނީ ހޫނު ބަހުސަކަށްވެފައެެވެ. ސައުދީގައި އޮންނަ ހެދުން އެޅުމުގެ އިސްލާމީ މިންގަނޑާ ޚިލާފްވެފައިވާތީ އޭނާ ހައްޔަރުކުުރުމަށްވެސް އެއްބަޔަކު ގޮވާލާފައިވެއެވެ.

ބައެއް ފަރާތްތަކުންވަނީ އޭނާގެ ދިފާއުގައި ވާހަކަ ދައްކައި އޭނާގެ ހިތްވަރު ގަދަކަމަށް ބުނެ ތައުރީފް ކޮށްފައެވެ.

ސައުދީ އަރަބިއްޔާގެ އަންހެނުން ލާންޖެހެނީ ދޫކޮށް މުޅި އިސްކޮޅަށް ފަހާފައި ހުންނަ އަބާޔާ އެވެ. އެއާއެކު އާއްމު ތަންތާގައި ބުރުގާ އަޅަންޖެހޭނެއެވެ.

ހަފްތާ ބަންދުގައި ސްނެޕް ޗެޓްގައި އާއްމުކޮށްފައިވާ މި ވީޑިއޯއިން ފެންނަ ގޮތުގައި ޚުލޫދު ފެންނަނީ ވެރިރަށް ރިޔާޒުގެ އުތުރުން 155 ކިލޯ މީޓަރު ދުރުގައި ނަޖްދު ޕްރޮވިންސްގައި އޮންނަ ތަރިކައިގެ ގޮތުގައި ރައްކާތެރިކުރެވިފައިވާ އުޝައިޤިރް އަވަށުގެ ހުސް މަގެއްގައި ހިނގާ މަންޒަރެވެ.

ނަޖްދް އަކީ ސައުދީ އަރަބިއްޔާގެ އެންމެ ގަދީމީ އެއް ސަރަހައްދެވެ.

އެއީ 18 ވަނަ ގަރުނުގެ ތެރޭގައި ވައްހާބިޒަމް ފެށިގެން އައިތަނެވެ.

ޓްވިޓަރގައި މި ވާހަކަ ހޫނު ބަހުސަކަށް ވެފައިވާއިރު ދިފާއުގައި ވާހަކަ ދައްކާ ބައެއް ފަރާތްތަކުންވަނީ އެމެރިކާގެ ރައީސް ޑޮނަލްޑް ޓްރަމްޕް މެއި މަހު ސައުދީއަށް ޒިޔާރަތްކުރެއްވިއިރު ރައީސް ޓްރަމްޕްގެ އަނބިކަނބަލުން މެލަނިއާ ޓްރަަމްޕް އަދި ދަރިކަނބަލުން އިވަންކާ ޓްރަމްޕްވެސް އަބާޔަ ނުވަތަ ބުރުގާއެއްވެސް ތުރު ނުކުރައްވާކަމަށް ބުނެފައެވެ.