އަލް އަރަބިއާއިން ދެއްކި ރިޕޯޓްގެ މައްސަލަ ޤަތަރުން އައިކާއޯއަށް ހުށަހަޅައިފި

ސައުދީ އަރަބިއާގެ އަސްކަރިއްޔާގެ ފައިޓަރ ޖެޓަކުން، ޤަތަރު އެއާވޭޒްގެ ފްލައިޓަކަށް މިސައިލް ހަމަލާއެއް ދޭ މަންޒަރު ރަމްޒުކޮށްދީ، ސައުދީގެ އަލް އަރަބިއާ ޓީވީން ދެއްކި ރިޕޯޓްގެ މައްސަލަ ޤަތަރުން، އދ ގެ ވައިގެ ދަތުރުފަތުރާ ބެހޭ އިދާރާ، އިންޓަރނޭޝާނަލް ސިވިލް އޭވިއޭޝަން އޯގަނައިޒޭޝަން (އައިކާއޯ) އަށް ހުށަހަޅައިފިއެވެ.

ޤަތަރުން އައިކާއޯއަށް ހުށަހެޅި މި މައްސަލައިގައި ބުނެފައިވަނީ، އަލް އަރަބިއާ ޓީވީން ދެއްކި ރިޕޯޓަކީ، ޤަތަރުގެ ޤައުމީ އެއާލައިނުން ދަތުރުކުރާ ފަރާތްތަކަށް ބިރު ދެއްކުމުގެ ގޮތުން ހިންގާފައިވާ އަމަލެއް ކަމަށެވެ.

ޤަތަރުން ހުށަހެޅި މައްސަލައިގައި އިތުރަށް ބުނެފައިވަނީ، ސައުދީ އިސްވެ އޮވެ، ޤަތަރާއި ދެކޮޅަށް ހިޞާރު ކުރުމުގެ ފިޔަވަޅުތަކެއް އަޅައިގެން އުޅޭ ޤައުމުތަކުން، ޤަތަރު އެއާވޭޒްގެ ފްލައިޓަކަށް ހަމަލާދީ ވައްޓާލާ މަންޒަރު ދައްކައިދޭ މަންޒަރުތަކެއް ޓީވީން ދެއްކުމަކީ ބައިނަލްއަޤުވާމީ ޤާނޫނުތަކާއި ޚިލާފުވުން ކަމަށެވެ.

އެގޮތުން، 1944 ގެ ޝިކާގޯ ކޮންވެންޝަނާއި، އިންޓަރނޭޝަނަލް އެއާ ޓްރެފިކް ސަރވިސް އެގްރީމެންޓާއި، އިންޓަރނޭޝަނަލް އެއާ ލޯ ގެ އިތުރުންވެސް ބައިނަލްއަޤުވާމީ އެކި މުއަހަދާތަކާއި އެ ރިޕޯޓް ޚިލާފުވާކަމަށް ޤަތަރުން ވަނީ ބުނެފައެވެ.

ޤަތަރުން ހުށަހެޅި މައްސަލައިގައި އެދިފައިވަނީ، އެ ޤައުމެއްގެ ވައިގެ ސަރަޙައްދުގައި ދަތުރުކުރާ އުޅަނދުތަކުގެ ސަލާމަތާއި ރައްކާތެރިކަމަކީ އެ ޤައުމެއްގެ ޒިންމާއެއްކަން ހުރިހާ މެންބަރު ޤައުމުތަކަށް ހަނދާން ކޮށްދިނުމަށެވެ.

އޯގަސްޓް 9 ވަނަ ދުވަހު އަލް އަރަބިއާއިން ދެއްކި ރިޕޯޓްގައި ބުނެފައިވަނީ ޤައުމެއްގެ ވައިގެ ސަރަޙައްދަށް ވަންނަ އުޅަނދަކީ ނުރައްކަލެއް ކަމަށް ބަލައި އެ އުޅަނދެއް ވައްޓައިލުމުގެ ބާރު، ބައިނަލްއަޤުވާމީ ޤާނޫނުތަކުން ކޮންމެ ޤައުމަކަށްވެސް ލިބޭ ކަމަށެވެ.

މި ރިޕޯޓްގައި ހިމަނާފައިވާ އެނިމޭޝަނުން ފެންނަނީ، ސައުދީ އަރަބިއާގެ އަސްކަރިއްޔާގެ ފައިޓަރ ޖެޓަކުން، ޤަތަރު އެއާވޭޒްގެ ފްލައިޓަކަށް މިސައިލް ހަމަލާއެއް ދޭ މަންޒަރެވެ.

މީގެ އިތުރުން ޤައުމެއްގެ ވައިގެ ސަރަޙައްދަށް ވަންނަ އުޅަނދަކީ ނުރައްކަލެއް ކަމަށް ބަލައި، އެ އުޅަނދުގެ ދަތުރު ހުއްޓުވައި، އޭގައި ތިބި ފަޅުވެރިންނާއި ދެކޮޅަށް ދައުވާ ކުރުމުގެ ބާރުވެސް ބައިނަލްއަޤުވާމީ ޤާނޫނުތަކުން ކޮންމެ ޤައުމަކަށްވެސް ލިބޭ ކަމަށެވެ.