ސައުދީ އަރަބިއްޔާ އާއި އިރާގާ ގުޅިފައިވާ "އަރާރް ބޯޑަރު" ސައުދީން ހުޅުވާލަނީ
ސައުދީން ވަނީ ހޯމަ ދުވަހު އިރާގާ އެކީ ޖޮއިންޓް ޓްރޭޑް ކޮމިޝަނެއްވެސް އުފައްދަން ނިންމާފައި
"އަރާރް ބޯޑަރު" ސަރަހައްދު
ސައުދީ އަރަބިއްޔާ އާއި އިރާގާ ގުޅިފައިވާ "އަރާރް ބޯޑަރު" ސައުދީން ހުޅުވާލަން ނިންމައިފި ކަމަށް ސައުދީގެ މީޑިއާ ރިޕޯޓުތައް ބުނެފިއެވެ.
މިއީ 1990 ގެ ފަހުން މި ބޯޑަރު ސައުދީން ހުޅުވާލަން ނިންމި ފުރަތަމަ ފަހަރެވެ. ރިޕޯޓުތައް ބުނާގޮތުން ސައުދީން އެ ބޯޑަރު ހުޅުވާލަން ނިންމީ މުދާ ގެންދިއުމަށެވެ.
ސައުދީގެ "ދަ މައްކާ" ނޫހުން ރިޕޯޓުކޮށްފައި ވަނީ ސައުދީ އަަދި އިރާގުގެ އޮފިޝަލުން ބޯޑަރު ހުރި ސަރަހައްދު ހޯމަ ދުވަހު ބަލާފައިވާ ކަމަށެވެ.
"އަރާރް ބޯޑަރު"، ހައްޖު މޫސުމާ ދިމާކޮށް ކޮންމެ އަހަރުކުވެސް ސައުދީއަށް ހައްޖުވުމަށް ދާން ބޭނުންވާ ފަރާތްތަކަށް ހުޅުވާލައެވެ.
އިރާގުގެ އޮފިޝަލުން ބުނާގޮތުން "އަރާރް ބޯޑަރު" ސަރަހައްދަށް ދާން އޮންނަ އިރާގު މަގު، އިރާގު އަސްކަރިއްޔާ އިން ދަނީ ރައްކާތެރިކޮށް ބަަލަހައްޓަމުންެނެވެ.
ސައުދީ އިން "އަރާރް ބޯޑަރު" ބަންދުކުރީ އިރާގުގެ އޭރުގެ ރައީސް ސައްދާމް ހުސައިން ކުވައިތް އަށް އެރުމާ ގުޅިގެން ސައުދީ އާއި އިރާގު ގުޅުން ކަނޑާލުމާއި ގުޅިގެންނެވެ.
